THUTHLUNG KILHIMNAK

Hminsin: Cangantui dinhmun theifiang dingin, "Casiartu Hnenah" timi siar hmaisa aw.

[6.1]

Zumnak In Zangfahnak Ah
Hlan ihsin lothlo khaw fate hrekkhat pawl cu anmahte hmuandum tuahin an rak pan-aw khawm hai ih khua le can a rung rei vivo tikah khawpi ah an ra cang. Cuih hmuan tuah milian pawlih leiram a kauh a bit ih zirin an nawr vivo ih hanghnah hangrah leh sangvut tivek pawl khal tuihlan bangin ei le in an khopkham thei nawn lo. Culawng silo in ruahpi surnak, tilik nak khatlam ah van ruah ti harsatnak, rial a si lole rinlo rialruah tivek ruangah  nuntu khawsaknak khal a harsa vivo. Cuvek in milai nunnak leh thilri khal tampi an hlohral phah a si.

[6.2]

Nikhua a thatlo can a hleice in vanruah reipi a kan can ahhin lolam thlairawl cu an phan um zet.  Tidai umlonak ruangah pangang an suak ciamco ih thlairawl pawl cu a no tuk  mi siseh, a tar tuk mi siseh, a derdai cia mi pawl khal an siat thluh. Cuti ih nikhua a that lo rei tuk tikah a minung zate tiangin an hloral vivo.

[6.3]

Culai ah ranvulh milian pa pakhat in khawsung ah mi a ko khawm hai ih thu a ruah hai.  Tikhur pakhat tidai thazet suahnak a um ti thu a sim hai. Cui tikhur cu amai hmuan dum sungah a um ih tikhur dang hmuahhmuah an kan thluh can khalih kanglo a si ruangah thaten a tuamhlawm. Cumi cu a suangtuahnak men a silo zia thungai thlakin a sim hai. Cun dawhhna dang khal a neih velo thu, ti khai tikah hridai leh pung hman tul lo in kut ih suah mei theih khop a si thu, a khai duh cun mai hridai le pung cio thawn ol-ai ten a lak in ti thiang te cu an ra khai theu thu khal a sim vivo.

[6.4]

Mi hrekkhat cun cupai thu ruahmi cu, thil thalo tuah duh ruangih bum le anmah uk duh ruangah tin an ruat ih an thin a phang. A dang pawl in, a hmuan sungah cuvek tikhur um ti an thei dah silo ih anmah hrem duh ruangih bum ah an ruat ve ih feh duhlo in ruah sur hlan tiang an hngak. Curuangah a dang mihrek khat lala cun hi pai umtu zia hi an ringhlel, ziangahtile hi pai tidai hi alak khalin siseh kan va khai ahcun a harsat ve tikah  a man in cawh leh thotho ding an ti. cuti'n milianpa cun khawpi pawl kha a lakih tidai ra khai cio hai dingin a sawm ko nan mi hrekkhat pawl lawngin an zumih an ra khai hai. A  ra khaitu pawl cu an hnianghnar dutdo ih, a ra khai duhlo tu pawl cu van ruah a surlo ruangah an harsa hai ih natnak tiangin a thlen hai.

[6.5]

Tikhur ti cu mi hmuahhmuah hrangah a lakih pek mi laksawng a si ko nan a zumih a tin  sungih thun hna a thiamtu pawl hrang lawngah tin khatin tidai thun ding an hmu thei. An tithawl a khah tikah tikhur ka ih an hnuhsuah bangin hi tidai ngahnak ahcun zuamnak a tul ve tinak a si. Tithawl leh hridai tikhur taw ih thlaknak kha zumnak a siih cucu tuannak in a hun sawmso, a sinan khai tithawl sungih tidai kha cu amah te khai dang tul nawnlo ih ziangtihman in ti danglam hran khal a tul nawnlo. Cuvek ciah in tuannak tello zumnak cu khaisuah lomi tikhur sung thawl thawn a bangaw ih, cumi cun laksawng a si thu in theihter. Curuangah cui tikhur sung tidai vekin Pathian ih pekmi zangfahnak hi mi hmuahhmuah hrang a si. Zumnak le rinnak hi tin le a khainak hri vek an siih kan hnen ihsin karhzai ding an si. Thimnakah---tikhur taw ih tin pawl khan zumnak umzia an phuangsuak ih cucun kan zumnak hi a nungih a cangvai a si ti a theihter.

[6.6]

Rundamnak hi mi hmuahhmuah hrangah alak ih pek mi a si. Pathian in kan phulo a duhdawtnak le lainatnak in coter mi a si. Zangfahnak hi khui ah a hmang tile rundamnak ti khal a si ve. Cucu zumnak thawn a bangaw ih rundamnak ti khal zangfahnak ti thawn a bangaw ve.

Johan 3:16
16. Ziangahtile Pathian in leilung hi a duhdawt zet ruangah a Fapa neihsun a pek ih amah zumtu hmuahhmuah cu thi lo in kumkhaw nunnak an nei ding.

Efesa 2:8-10
8.  Ziangahtile nannih tla cu Pathian zangfahnak in run mi nan siih cucu nanmah in silo Pathian thilpek a si.
9. Cucu tuannak in silo in, cu lole a uangaw pang ding
10.Kannih cu Pathian ih sersiam mi kan siih kan hrangih a tumtah cia mi thil tha cu tuah sak dingah Khrih Jesuh thawn kan pehzom awknak thawngin siamthar mi kan si zo.

[6.7]

Cuih Pathian ih zangfahnak hi mi hmuahhmuah hnenah pek a si zo, a sinan mahte zumnak cun ngah theih thil a silo, cui tuannak cun Anih a dungsipter theilo ih minung thawn a hlatter sinsin.

Rom 11:29
29. Ziangahtile zo a hril, zo a thlawsuah ti thu ahcun Pathian in a thinlung a thin dahlo.

Dungthluntu 10:34
34. Piter cun a thawh ih, Pathian cun zokhal bangran ten mi a zoh a si ti kha a tu ihsin ka thei.

[6.8]

Cui laksawng cu thleidannak umlo in mi hmuahhmuah hrangah a si. Pathian ih Fapa neihsun zumtu pawl hmangin, cumi cun mi a rundam thei a si, Khrih zumnak in, “zumnak ruangah zangfahnak ih rundam kan si" (Jn.3:16). Hi thu hi kan mahte kan sim aw theu kei uh. Zumnak in, zumnak in, zumnak in Pathian ih pekmi laksawng zangfahnak cu zumnak in a lakin kan hmu ti thu hi. Hi laksawng hi ziang ti zawng khalin laksal theih ci a si nawnlo. Hi zumnak tello cun Pathian ti lungawi a theihlo ih a si lole ziangmawti zawng khal in cui laksawng cu ti danglam a theih lo. Cui laksawng ngah theinak umsun cu zangfahnak tidai sungih hnimawk, ciah awknak lawngin a si.

Hebru 11:6
6. Zumnak lo cun zohman in Pathian lungawi ter a theih lo; ziangahtile Pathian a pantu in Pathian a um a si, tile amah hawltu hnenah laksawng a pe a si, ti an zum a tul a si.

[6.9]

Curuangah Pathian zangfahnak kan co theinak, cohlan tlak kan sinak cu zumnak lawng te hi a si. Cui zumnak cu Pathian hnen ihsin ra mi laksawng a siih A thu thawn bangrep ten in umter.

Rom10:17
17. Curuangah zumnak cu thu thangtha theihnak in a ra ih thuthang cu Khrih kan phua nnak in a ra.     

II Timote 3:15
16. Bible Ca Thianghlim cu na nauhak te lai ihsin na thei zo ti kha hngilh hlah aw. Cui Ca Thianghlim cu Khrih na zumnak sungin rundamnak ah a lo thlentu, fimnak a lo petu a si.

[6.10]

Cui zumnak congah thei ding ahcun Pathian aw kan theih a tulih kan mahte kan zirih kan hliakhlai a tul a si.

II Timote 2:15
15. A hnatuan a zahpi lotu leh Pathian thudik thuthang tha cu dik zetih a simfiangtu si dingah Pathian lungkimnak ngah dingin zuam aw.

[6.11]

Cui Pathian thu cu kan hna lawngin kan thei a si ahcun kan zumnak hin hmun a co ve thei lo ih mah le mah kan bumaw theu. A si, zumnak taktak cu a dikih Pathian thu kha a dongsong in a cangvai.

I Korin 2:5
5. Curuangah nan zumnak cu minung parih phun mi silo Pathian cahnak parih phun mi a si sawn.

Jeim 1:22
22. A thu kan theih takah ti in nanmah le nanmah bumaw hlah uh. Nan theih mi kha a tuahsuak tum uh.

[6.12]

Cun kan zumnak cu A thu kan thlunnak le hnatuan tha kan tuannak ah a hmuh theih. Kan dan thlunnak lole tisa hrang kan tuannak silo in kan hnatuan cu zumnak ih rahsuah Jesuh Khrih duhdawtnak a si.

Thesalon. 1:3
3. Ziangtintile nan zumnak nitin nan nun danih a langnak thu duhdawtnak nan neih ruangah nasa takin hna nan tuannak thu leh kan Bawipa Jesuh Khrih sungih ruahsannak nan neih mi a hngetdan pawl thu thlacamnak in kan Pa Pathian hnenah kan sim ringring.

Efesa 2:10
10. Kannih cu Pathian ih sersiam mi kan siih kan hrangih a tumtah cia mi thiltha cu tuar suak dingah Khrih Jesuh thawn kan pehzom awknak thawngin siamthar mi kan si zo.

I Johan 2:3-4
3. Pathian ih thupek mi kan thlun ahcun amah theitu kan si ti a fiang a si.
4. Mi pakhat in Pathian ka thei a ti na in a thupek mi a thlun lo ahcun thuphan per a siih a sungah thudik a um lo.

[6.13]

Hnatuannak kan timi hi zumnak ih rahsuah a si, kan rak kol mi zumnak hlun a hloh veten kan zumnak thar kha kan hmang thei ih Pathian zangfahnak kan hmang thei ve a si.

Jeim 2:14-26
14. U le nau pawl mi pakhatkhat in zumnak ka nei ti hmansehla a tuannak ih a hmuh lo ahcun ziangso a thathnem, cui zumnakin a runsuak thei ding maw?
15. Nan Khrihfa unau lakah mipa siseh nunau siseh hnipuan a tlasam mi leh ei bar ding a neilo mi an um tibang sehla,
16. Cu pawl hnenah, “ Pathian in lo thlawsuah hramseh, hlum te in um awla rawl tha te in ei uh,” ti ah nan timi cun an nunnak ih a tul mi nan pek silo ahcun ziangso a thahnem.
17. Cubangtukin zumnak khal a si, tuahnak a tello ahcun zumnak cu a thi a si.
18. Sikhalsehla mi hrekkhat in, mi pakhat in zumnak a nei ih a dang pakhatin zumnak a nei an ti ding, ka thu lehnak cu; tuannak umlo ih zumnak lawng a nei mi i hmuh awla kei in ka tuannak in ka zumnak ka lo hmuh ding ti hi a si.
19. Pathian pakhat lawng a um ti nan zum a silo maw? Cuti nan zum cu a thazet, sikhal sehla khuavang pawl khalin Pathian pakhat a um ti an zum ve. A sinan an tih ih an khur thlauhthlo.
20. Mi a pawl, tuahnak umlo cun zumnak cu thuphan a si ti ka lo hmuh nan duh maw?
21. Ziangtinso kan pu Abraham cu Pathian thawn rualremnak an co? A fapa Isak biaktheng parah Pathian hnen thawinak hrangah a pe ih cui a tuahnak thawngin rualremnak a co a silo maw?
22. Cucu nan thei lo maw? A zumnak leh a `uannak an feh tlang. A tuahnak ruangah a zumnak a famkim a si.
23. Cule Ca Thianghlim in, “ Abraham in a zum ih cui a zumnak thawngin Pathian in a miding ah a co a si.
24. Hiti a si ruangah a zumnak thawngin silo in a tuahnak thawngin Pathian thawn rualremnak a co ti nan thei a si.
25. Hlawhhlang nunau Rahab thuhla khalah cuti thotho a si. Israel mi thlingthlatu pawl thate'n a zoh hnu ah zin dang in an tlansuak theinak dingah a bawm, cubangtuk in a tuah ruangah Pathian thawn rualremnak an co a si.
26. Cuti a si ruangah taksa ruangpi cu Thlarau locun a thih bangtuk in zumnak khal tuahnak tel locun a thi ve.

[6.14]

Tulai ah mitam pi cun zangfahnak kha an zumnak taktak silo in co an beisei cio. A tulsam lai cu, cui kan zumnak cu ziangin kan langter ding? Cucu tuannak ihsin langter ding  kan si.

Jeim 2:17,18
17. Cubangtukin zumnak khal a si tuahnak a tel lo ahcun a thi a si.
18. Sikhalsehla mi hrekkhat in, mi pakhat in zumnak a nei ih a dang pakhat in tuahnak a nei an ti ding, ka thu lehnak cu; tuahnak umlo ih zumnak a nei mi i hmuh awla kei in ka tuahnak in ka zumnak ka lo hmuh ding ti hi a si.

Matthai 25:31-40
31. Jesuh in, “ Mi Fapa cu Siangpahrang vekin vancung mi hmuahhmuah thawn a rat tikah Siangpahrang tohkham parah a to ding.
32. Miphun hmuahhmuah cu a hmai ah khawm theh an si ding. Cule tukhal in tuu le me a then bangin mi hmuahhmuah cu a then ding.
33.Mi tha pawl cu a vorhlam ah a ret dingih mi thalo pawl cu a kehlam ah a re ding.
34. Cule Siangpahrang cun a vorhlam a um mi pawl hnenah, ra uh, ka Pa ih a thlawhsuah mi pawl! ‘Ra uhla leilung tuahtir ihsin nan hrangih remcia mi vancung uknak hi ra co uh,
35. Ziangahtile ka ril a rawn tikah rawl in pe, ka ti a hal tikah tidai in pe, mikhual ka si laiah nan inn ah in tlungter.
36. Hnipuan nei lo ka si tikah hnipuan in pe, ka nat laiah in tuamhlawm, thawng ka tlak
lai ah in veh,’ ti ah a ti ding.
37. Cule midang pawl cun ‘Bawipa ziangtikah so na ril a rawn kan lo hmuh ih rawl kan lo pek?
38. Ziangtikah so mikhual na siih kan lo hmuh ih kan inn ih kan lo thlen ter; hnipuan na neih lo ih hnipuan kan lo pek?
39. Ziangtikah so na nat leh thawng na tlak kan lo hmuh ih kan lo veh? tiah an ti ding.
40. Siangpahrang in, ‘Thungai in ka lo sim: hi ka unau nautabik parih nan tuah mi cu ka parah nan tuah a si’ tiah a ti ding.

[6.15]

Cui Pathian zangfahnak cu kan zaten zumnak dik thawn ngah theih mi a si. Himi hi mi hmuahhmuah hnenah rak pek cio si hmansehla a zumnak thawn a pehtlaih awknak rahsuak mi hmuh theih ih a um a tul. Curuangah mihrek khat cun an nunpi thei nan a neta ah an tlansan sal theu. Kan simduh mi cu Pathian zangfahnak le thutiam pawl an co hnget zo kan tinak a si.
Demas ih thu kha ruat aw ( Kol. 4:14;ITim.4:10)
Alexander leh Hymenaeus ( I Tim.1:20;II Tim.4:14)
Na thinlung in ruat aw ( Matt.10: 22,24:13)
Sual umzia thu cing ringring aw ( I Sam.28:3-19)

I Korin. 16:13
13. Thinlung fimte in um uh, nan zumnak sungah hngetzet in ding uh; raltha in um uhla a cak mi si ko uh.

Matthai 10:22
22. Keimai ruangah mikip in an lo hua ding. Sikhal sehla a netnak ni tiang a tang theitu cu runsuak an si ding.

[6.16]

Lawr Khawmnak
Zangfahnak kan timi hi a lak ih in pek mi laksawng kan phulo mi thil a siih cu cun in rundam ih, a hlosal thei nawn lo, Jesuh a ratsal lai hlan lo sawmnak ca bangin on cia ringring a si.

I Piter 1:13
Curuangah hnatuan thok dingah nan thinlung timtuah cia in um uh. Tiarcia in um uhla Jesuh Khrih a lang tikah nan ngah ding mi thlawsuah laksawng parah nan ruahnak zaten bun uh.

[6.17]

Hi laksawng cu zumnak lawngin kan khawlkhawm thei, cumi cu Khrih kan zumnak in.

Rom.5:2
2. Zumnak thawngin kan co mi Pathian ih zangfahnak sungah Amah in in thlenpi ih cui zangfah nak sungah a tu hi kan um. Curuangah Pathian ih zangfahnak kan tawm aw ding tiah ruahsannak kan nei ih kan thin a nuam.

[6.18]

Zangfahnak hi mi hmuahhmuah hrangah ngah theih a siih co theih a si ko nan cumi co ve theinak cu zumnak lawng hi a siih “Zumnak ih zangfannak” kan timi cu a si. Cui zangfahnak lole rundamnak cu a hlosal theilo nan zumnak hi cu a hlosal thei. Na ruahsannak le zumnak hi Saul, De mas leh Alexander pawl ih zumnak vek a si ahcun, Pathian ih zangfahnak tello cun zianghman a cang theilo. Kan co mi laksawng zangfahnak hin in bawh ringring nan zumnak a tello a si ahcun zianghman a rah a langsuak theilo ih rundamnak tak khalah mi a thlenpi thei lo.

[6.19]

Zangfahnak In Rundam Nan si
Zangfahnak ih rundam kan si thu hi zianghman a rinhlelh um lo. Pathian in a minung pawl hi a zangfahnak le ngaidamnak co cio dingin a phunphunin in hniksakih tikcu can sunglawi tla in pe, cutin kan phulo laksawng kan ngah a si. Cun ngaidamnak cu sawmnak ca bangin mi hmuahhmuah hrangah a si.

Johan 3:16
16. Ziangahtile Pathian in leilung hi a duhdawt zet ruangah a Fapa neihsun a pekih amah a zumtu hmuahhmuah cu thilo in kumkhua nunnak an nei ding.

[6.20]

Pathian cun zohman thleidannak umlo in a sawmnak cu a kauhter vivo. Cutin cui zangfahnak cu mi zapi hrang a si ruangah cui Pathian thatnak zar cu kan to thei thluh a si.

Dungthluntu 10:34
34. Piter cun a thawh ih Pathian cun zozo khal a bangran ten mi a zoh a si, ti kha a tu ihsin ka thei.

[6.21]

Pathian in mi hmuahhmuah a duhdawt ih a run zo ti’n kan thu kan cemter thei, curuangah zangfahnak tlunah zianghman belhcih a tul nawn lo. Kan simbet hrih ding, “Pathian in leitlun (a sung um mi hmuahhmuah) a duhdawtnak ruangah a Fapa neihsun a pe, zokhal a zumtu hmuahhmuah hloral lo in kumkhaw nunnak an neihnak dingin.” Curuangah zangfahnak cu zumnak lawngih ngah a si- cuvek in -zumnak cu rundamnak a si. Thil ziangsi maw pom thei ding ahcun zumnak a tul hran lo.

[6.22]

Zumnak In
Zumnak kan timi hi pomhngetnak diktak a tello ahcun Pathian lung ti awi a theih cuang lo. Zangfahnak hi tlamtlingzet hmansehla mi hmuahhmuah ih co ding a si hran lo, thil pakhat te ruangih co ding a si. Pathian ih sawmnak cu tikauh vivo a si ko nan a pomtu pawl hrang lawngah thathnemnak a nei ih culo pawl hrang ahcun ziangtik hmanah a tak in a co ve theih lo.

Johan 3:15
15. Zokhal a zumtu hmuah an hlohral lo ih kumkhaw nunnak an neih theinak dingah

[6.23]

Na rualpa hmunhla ih a um mi pa hin paisa retnak zungah na hrang paisa a lo retsak thu a lo sim tikah ziangtin na ruat. I bum tum a si maw, i capoh men a si ti’n na ruat men thei, cucu na rinhlelh ruangah tla a si men thei, cu lole amah kha na zum ban lo nak ruangah tla a si thei, curuangah cui na rinhmainak cun a kumkhua’n na rel lo hmanah na thinlung in na hngilh dahlo a sinan na thathnem pi ve lo. Cuvek a si laksawng cu a lakih pek cia a si zo ih cucun na nun a lo thlakthleng dingih duhnung nun a lo pe ding, a sinan na puangzar cuang lo. Cucu a si Pathian rundamnak, na puansuah ding mi a si. Siangpahrang ih ruai ropi theh thu kha ruatsal hman ziangruangah a si pei Jesuh hin hi thu a zirh.

Luka 14:16-24
16. Jesuh in cupai hnenah cun, “ Hlanlai ah mi pakhat a um ih rawl darnak puaipi a tuah ih cutawk ahcun mi tampi a sawm.
17. Rawl ei can a cut tikah a sawm cia mi pawl hnenah a hnenum a thlah. ‘ Ra thlang uh ziang hmuahhmuah a kim zo’ ti ah a ti.
18. Sikhalsehla pakhat hnu pakhat ‘ka man lo’ ti in puhmawh ding an hawl fingfing. Pakhat pa in ‘Lo pakhat ka lei ih ka va zohta a tul a si. I rak ngaithiam aw,’ ti ah hnenum pa cu a ti.
19. Adang pakhat pa in, ‘ cawcang khuah nga ka lei ih a tu ah an tha maw tha lo ka hniksak ta ding a ti. I rak ngaithiam hram aw’ a ti ve.
20. Adang pakhat in ‘Tubaihte ah nupi ka thi ngelcel ih ka ra thei lo ding a ti lala.
21. Hnenum pa cu a kir ih cui thu pawl cu a bawipai hnenah a sim theh. A bawipa cu a ai a thok ih a hnenum pa hnen ah, ‘Zamrangzet in khawsung lamzin pi le innlak zin ah va feh awla mi farah, mi zonzai, kutke zeng, mitcaw leh kezeng pawl rak hruai aw’ ti ah a fial.
22. Reilo te ah hnenum pa cun ‘Bawipa, na thupek mi vekin ka tuah theh zo; a sinan umnak tampi a lawng lai,’ ti ah a ti.
23. Curuangah a bawipa cun, ‘ khua pakhat le pakhat karlak lamzin pi le lamzin te hmuahhmuahah va feh awla ka inn a khah theh lai hlanlo mi ratpi aw.
24. Fiangte in ka lo sim: ka rak sawmcia mi pawl sungin zohman in ka zanriah dar mi an tep lo pei,’ ti ah a sim.

[6.24]

Cui Pathian zangfahnak rundamnak kan comi cu el theih lo. Cucu Bible ih simdan a si ih thlaraulam thilpek a si fawn. A tlun ih kan sim mi unau pawl bang hin puhmawhnak hawlin a ratsal ding can a thlen tikah a eltu silo in lungkim ih a ngaitu sawn kan si ding a si. A sile hi a lakih pek mi laksawng hi ziangtin kan co thei ve ding? Kannih in kan co thei dan ding cu zum ih pom hi a si mai. Hi laksawng khawm lai ahhin kan zumnak a dungtolh sal theu. Kan sim hrih ding, zumnak dungtolh kan timi hi ziangha a si? Cucu zumnak rin hngetnak a si. A sile rin hngetnak cuteh ziangha a si? Cucu “kan ruahsan mi kan ngah tengteng ding, ti zum leh kan mit in kan hmuh theilo mi a um rori a si, ti zum khi a si."

Hebru 11:1
1. Zumnak nei timi cu kan ruahsan mi kan ngah tengteng ding, ti zum leh kan mit in kan hmuh theilo mi a um rori a si, ti zum khi a si.

[6.25]

Ruahsannak ti hi ziangha a si? Cucu rundamnak thlawsuah khi a si.

Rom 8:24
24. Ziangahtile ruahsannak lawngin run mi kan si. Kan ruahsan mi kha kan hmu thei a si ahcun ruahsannak a si ngaingai lo. Zo so mit in a hmuh thei mi cu a ruahsan dah?

Titas 2:13
13. Cutin a lian kan Pathian leh runtu Jesuh Khrih ih sunlawinak a lang ding ti in kan ruahsan mi Ni sunglawi cu kan hngak a si.

[6.26]

Hmuh theihlo kan timi cu ziangha a si? Khrih ih a veikhat langnak taksa in, tin kan ti thei, thimnakah-Taksa ih in umpinak kha. Kanmah hi cu cui a taksa ih umpinak congah tu cu kan silo.

Johan 20:29
29. Jesuh in Thomas hnenah, “ I hmuh ruangah na zum a si maw? Keimah i hmulo nan a zumtu cu mi thlawsuak an si,” ti ah a ti.

[6.27]

Hi thu simfiangnak dingah, taksa lenglam langnak hi zumnak diktak a si. Zumnak hi Pathian thu nung ihsin ra irhsuak mi a si. Pathian ih thu theihnak ihsin ra suak mi a si fawn.

Rom 10:17
17. Curuangah zumnak cu thuthang tha theihnak ihsin a ra ih thuthang tha cu Khrih kan phuannak in a ra.

II Timote 3:15
15. Bible Cathianghlim cu na nauhak tet lai ihsin na thei zo ti kha hngilh hlah aw. Cui ca Thianghlim cu Khrih Jesuh na zumnak sungin rundamnak ah a lo thlentu, fimnak a lo petu a si.

[6.28]

Curuangah hi thuthang tha hi Pathian ihsin rung a siih zumnak lawngih ngah theih mi a si. Kan cohlan ngeingei a tul ih cui a cohlangtu pawl hnen ahcun huham le a fa si theinak a pe a si.

Johan 1:12
12. Mi hrekkhat cun an sangih an zum; curuangah Pathian fate can theinak thu a pe.

[6.29]

Hi zumnak cu kil that locun a hlosal thei, thimnak ah-ruahsannak zumnak hi hlohter a theih.
Saul leh Demas zumnak hin ruat tha aw.

I Samuel 28:12-16
12. Nunau cun Samuel cu a hmuh tikah a rak ciamco. “Ziangahso i bum? Saul siangpahrang na si si!” ti ah a ti.
13. Cutikah Saul in, “ Tih hlah aw. Ziangso na hmuh” ti ah a sut. Nunau nu in, “ leilung sung ihsin mithi thlarau pakhat a hungsuak ka hmu” a ti.
14. Ziangvekso a si? ti ah Saul in a sut. “A hungsuak mi cu patar pa a si. Korfual pi a hruk,” ti ah nunau nu cun a ti. Cutikah Samuel a si ti kha Saul cun a thei ih upatnak in leilung ah a kun.
15. Cule Samuel in Saul cu, “Ziangahso i hnaihnok? Ziangahso i kirter sal?” ti ah a sut. Saul in, “ Ka van a sang ngaingai a si. Filistin mi pawlin in do ih Pathian in i dungtun zo. Ka thusuh mi pawl i let lo. Profet in siseh, mang in siseh, i let hrimhrim nawn lo. Curuangah ziangso ka tuah ding, ti i simtu dingah ka lo ko a si,” ti ah a ti.
16. Cutikah Samuel in, “ Ziangahso Pathian ih a lo dungtun hnu ah le na ralih a can hnu ahcun i kawh duh?

II Timote 4:10
10. Demas cu hi leilung a duhsawn ruangah i tlansan ih Thesalonika khua ah a feh zo. Kresen cu Kalati pengah a feh ih Titas cu Dalmatia pengah a feh.

[6.30]

Cui thu cu thlaici vorh tahthimnak thu in Amah Jesuh rori in a zirh.

Luka 8:13
13. Lungsedap lakih a tla mi thlaici ih khihhmuh mi cu, Pathian tongkam cu an thei ih lungawizet in an pom. A sinan an thinlung sung thukpi ah a pil lo. Tikcu tawite sung an zumih hniksaknak can a thlen tikah a tlusal mi pawl an si.

[6.31]

Hi thu hi kan pom lo a si ahcun Bible ca ih a sim mi Jesuh ih thu kha kan el rori cu a si mei. Zumnak hi Pathian ihsin ra mi a siih cun kanmah le kanmah hi kan zohfel awk a tul, cui kan rundamnak hna kha tih leh khur cingih tuan in kan zumnak khan Pathian ih zangfahnak a lang suak ding a si.

II Timote 2:15
15. A hnatuan a zahpi lotu leh Pathian thudik thuthang tha cu dikzet ih a simfiangtu si dingah Pathian lungkimnak ngah dingin zuam aw.

Filipi 2:12
12. Curuangah ka duhdawt mi ka rual le uh, nan hnen ka um lai ih ka thu nan thlun ringring vekin le cuhnak hman in a thupi sawn mi cu nan hnenih ka um lo canah ka thu nan thlun ding hi a si. Runnak famkim nan ngahnak dingah tihzah le thia cingin tuan rero uh.

Rom 11:20
20. Cumi cu a hman a si. Annih Judah mi pawl cu an zum lo ruangah tan an si; nannih cun nan zum ruangah hi hmun hi nan luah. A sinan curuangah puarthau in hngal pang hlah uh! A tih in tih sawn uh.

[6.32]

Jesuh Khrih thawn kan karlak ih hna hi kanmah ah a thumaw aw. Demas leh Alexander cu an sual riai, an pahnih in thu ngaihtuahtu an si, anmah vek kan si pangah cun kan tlu ve dingih thlarau thihnak kan tong ve pang ding.

Jeim 5:19-20
19. U le nau pawl, nanmah lakah pa khatkhat thutak ihsin a pial ih a dang pakhat in a hruaikir a si ahcun,
20. Zinpeng ihsin misual a hruaikirtu in cui misual thlarau cu thihnak ihsin a runsuak dingih a sualnak khal tamzet hmansehla ngaidamnak a ngahter ding a si, ti hi cing ringring uh.

Rom 6:23
23. Ziangahtile sualnak ih hlawhman cu thihnak a si; sikhalsehla Pathian ih laksawng cu kan Bawipa Jesuh Khrih thawn kan pehzom awknak thawngin kumkhaw nunnak a si.

[6.33]

Zumnak dik cu rinnak ah a hngataw aw. Mi tampi cun an fimnak in Jesuh Khrih an zum ih cucun in rundam an ti. A sinan Bible ih zirhdan zumnak thawn bangaw lo in a silo zawngin an theihpalh theu. Khuavang pawl khalin an zum ko a sinan an zumnak cu Khrih ah an bun lo. Hitin sim sehla cu thawn a bang aw,  " na rak zumcia zo ka zum,'' cun a dang mi pakhat in "nangmah ka lo zum," ti thawi thil bang aw a si. Jeim cabu in bum kan ol thu in sim mi cu zumnak thu thawn pehpar in a si. Ziangruangah a si pei Pathian in Jeim hnen ihsin zumnak dik thu in sim?

Jeim 2:14-26
14. U le nau pawl mi pa khatkhat in zumnak ka nei ti hmansehla a tuahnak ih a hmuh lo ahcun ziangso a thahnem? Cui zumnak in a runsuak thei ding maw?
15. Nan Khrihfa unau lakah mipa khal siseh, nunau khal siseh hnipuan tlasam mi leh eibar ding a neilo mi an um ti bang sehla
16. Cu pawl hnenah, "Pathian in lo thlawsuah hramseh. Hlumte'n um uhla rawl thate'n ei uh," ti ah nan timi cu an nunnak ih tul mi nan pek silo ahcun ziangso a thathnem?
17. Cubangtuk in zumnak khal a si, tuahnak a tello ahcun zumnak thi a si.
18. Sikhalsehla mihrek khatin, " mi pakhat in zumnak a nei ih a dang pakhat in tuahnak  a nei," an ti ding. Thu lehnak cu, " Tuahnak umlo ih zumnak lawng a nei mi in hmuh aw la kei in ka tuahnak in ka zumnak ka lo hmuh ding," ti hi a si.
19. Pathian pakhat lawng a um, ti nan zum a silo maw? Cuti nan zum cu a thazet. Sikhalsehla khuavang pawl khal in Pathian pakhat a um ti ah an zum ve; a sinan an tih ih an khur thlauhthlo.
20. Mi a pawl tuahnak a umlo ahcun zumnak cu thuphan a si, ti ka lo hmuh nan duh maw?
21. Ziangtinso kan pu Abraham cu Pathian thawn rualremnak an co? A fapa Isak biaktheng parah Pathian hnen thawinak hrangah a pe ih cui a tuahnak thawngin rundamnak a co a silo maw?
22. Cu cu nan thei lo maw? A zumnak leh a tuahnak an feh tlang. A tuahnak ruangah a zumnak a famkim a si.
23. Cule Ca Thianghlim in, " Abraham in Pathian a zumih cui a zumnak thawngin Pathian in miding ah a co," a si a timi a kim. Curuangah Abraham cu, " Pathian rualpi," ti ah kawh a si.
24. Hiti a si ruangah minung cu a zumnak lawng silo in a tuahnak thawngin Pathian thawn rualremnak a co ti nan thei a si.
25. Hlawhhlang nunau Rahab thuhla khalah cuti thotho in a si. Israel mi thlingthlatu thate'n a zoh hnu ah zin dangin an tlansuahnak dingah a bawm; cubangtuk in a tuah ruangah Pathian thawn rualremnak an co a si.
26. Cuti a si ruangah taksa ruangpi cu Thlarau lo cun a thih bangtuk in zumnak khal tuahnak locun a thi ve a si.

[6.34]

Himi thu ahhin a thupibik ih tumtah mi pakhat a um. Pathian ih zangfahnak laksawng cu a hmun kumkhua ih, zohman in ziangtik hmanah co bet in an hlon ral thei dahlo.

II Timote 2:13
13. Rintlak lo kan si hmanah Anih cu rintlak a si ringring; ziangahtile anih cu amah le mah a kalhaw thei lo.

Rom 11:29
29. Ziangtin mi a hril ti leh zovek a thlawsuah ti thu ahcun Pathian in a thinlung a thin dah lo.

[6.35]

Curuangah Pathian ih zangfahnak cu nangin na hloter theilo, a lo sawmnak cu na nunnak cem tiangin a si. Na hlohter thei mi zumnak sawn cu Pathian zangfahnak a lo pomlut ter tu nangmai zumnak kha a si. Hi thu cu hmailam ah khan thuthimnak thawn kan sim zo.

[6.36]

Ziangtin pakhat cu rundamlo mi ah a can thei? A rinhlelhnak leh zumlonak ruangah a si. Cui zumlonak langtertu cu thutak pialsannak hi a si, cumi cu- Jesuh thuthang tha le nunnak thunung umcia thlun duhlo nak hi a si.

I Piter 1:9-11
9.  Ziangahtile Jesuh Khrih sungih nan umnak in tumtahnak nan neih mi nan thlarau damnak cu nan co ngah a si.
10. Rundamnak thu hi profet pawlin an hawl mi le zingzoi mi a rak si; Pathian in a lo pek ding mi hi zangfahnak laksawng thuhla hi profet pawlin an rak sim sung mi a si.
11. Ziangtikah so cui can cu a ra thlen ding ti ah hawlsuah an rak tum mi a si. An sungih a ummiKhrih ih Thlarau in Khrih ih a tuar ding mi harsatnak leh cui hnu ih a co mi cu sunlawinak thu a
rak sim cia tikah a tui can hi a sawh mi can cu a si.

II Piter 3:17
17. Sikhalsehla ka duhdawt mi tla, nan hrangah cun hi mi cu nan theihcia mi a si. Curuangah ralring zetin um uh; cin leh dan neilo mi pawlin an lo hruaisual lonak dingah le him zetih nan umnakhmun ihsin nan tlak lonak dingah ralring te'n um uh.

I Korin 15:1-2
1. Ka u le ka nau tla, nan hnenih ka rak phuan mi thuthang`ha kha a tu ah lo theihter sal ka duh. Cuih thuthang tha cu nan pom cia mi leh nan zumnak hnget zetih a dinnak hmun a si.
2. Na hnenih ka phuancia mi Thuthang Tha a si ih hnget zetin na pom  a si ahcun run mi na si. Nan pom hnget lo a si ahcun zumtu nan si hi a lak a si ding.

[6.37]

Hminsin:: Bible hin Pathian zangfahnak thu hi tampi'n simfiang a tum lo a sinan zumnak ih tuah ding mi cu sau pi'n a rel ve thung. Ziangah a si pei? Taksa kan si ruangah a si pei maw, taksa cun Khrih hi ol-ai ten a theihhngilh mei theu, hnatuan a fial ruangah a si pei maw? A hnatuan in fialnak ah. A si Pathian ih zangfahnak cu a hngetkhoh sihmansehla kan zumnak cu kan kilkhawi that lo ahcun a tam in a mal thei, curuangah a cangvaih a tul.

Jeim 1:22-25
22. A thu kan theih takah a tawk ti men in nanmah le nanmah bumaw hlah uh. Nan theih mi kha a tuahsuak tum uh.
23. A theih lawng a thei ih a tuahsuak lotu cu thlalang ah a hmel a zoh aw tupa bangtuk a si. Cupa cu thlalang ah a hmel a zoh aw ih a si vek cekci in a hmu aw.
24. Felzet ih a zoh awk hnu ah a feh ih hmakhatte ah ka hmel ziangvek a si ti a thei aw nawn lo.
25. Sikhalsehla a luat tertu, a famkim mi dan kha felzet in a ruat ringringtu cu a thei men tu leh a hngilhtu men silo in a tuansuak tu a si; cuti a tuahsuak ruangah Pathian ih thlawsuah mi a si ding.

[6.38]

Khrih Sungah
Khrih sungih um kan timi hi ziangha a si? Dingfelnak thawn a felnak kan thlun ahcun Khrih sungah kan um, thimnak ah- A keneh kan thlun a sile amah ah kan um tinak a si.

I Johan 1:7
7. Sikhalsehla amah cu tleunak sungih a um vekin kannih khal tleunak sungih kan um ahcun pakhat le pakhat pawlkomnak kan nei ih a Fapa Jesuh Khrih thisen in kan sualnak hmuahhmuah a tlengfai a si.

[6.39]

A dungthlunnak ah a hnen ihsin kan tlukbah ( hmakhat te ah) a si hmanah kan sual kan phuan a tul.

I Johan 1:9
9. Sikhalsehla Pathian hnenah kan sualnak kan phuan ahcun zumtlak le a dingmi a si ruangah kan sual in ngaidam dingih kan mawhnak hmuahhmuah a thiangfai ter ding.

[6.40]

Amai palcia zo mi neh thlunlo in kan um ih kanmai duhnak zawngin kan feh a sile thei cingih sualnak tuah ringringtu kan si ding. Kanmai duh hrilnak men hin kan zumnak hi kan tlansan ding a silo. Cuti kan ti a sile rundamnak hi zuamtheih thil ah kan ruat dingih, a venhimnak thu, zangfahnak thutiam a neih mi kan colo ding.

[6.41]

Hiti kan ti tikah Pathian rundamnak lengah kan um tinak  a si maw, A zangfahnak ti mi ahhin? Si lamlam lo, a zangfahnak kan ti mi thu ahcun in ngaihsaknak ruangih thuthlung a tuah mi thu rel duhmi sawn a si. Hi thu ahhin Pathian ih in kawhnak thu hi ruatfel takih tuah mi a si. A zangfahnak hi kan co vivo dingah a ruat thei, ruatlo tla a si thei tinak a si. Cui a thukamnak ih humhimnak hi kan congah nawn lo. A hnen ihsin dungsip kan tum lai a sile, amah in silo in kanmah in kan hlat vivo, cun a thu kan ruat lo ih a kawhnak kan ngaihven lo ih, Amah zianghmanlo vekah cangin, thuanthu phuahcop le ruahnak men a rak si ahcun, kannih hi mawlmang le mithi vakvai vek kan si ding.

II Thessalon 2:10-12
10. A hloral ding pawl hnen ahcun a thalo zet mi mibumnak phunphun a hmang ding. Cupawl cu an hloral ding, ziangahtile rundamnak ngahnak ding a um mi thudik kha an duhlo ih an cohlang fawn lo.
11. Curuangah Pathian in an lak hnatuan dingah sual palhnak huham a thlak ih a hmanlo mi kha an zum.
12. Cuti cun thudik zumlo in sualnak lam a hriltu pawl cu siatralnak an thleng ding.

Suahlannak 33:19
19. Cutikah Bawipa in, " ka sunlawi zia cu ka lo hmuh dingih Bawipa tin kan hmin cu na hmai rori ah ka phuang ding. Ka duhduh mi parah lainatnak le zangfahnak cu ka pek ding.

Rom 9:15-18
15. Ziangahtile Moses hnenah, " zangfah ka duh mi parah ka zangfah ding; zawnruahnak neih ka duh mi parah an zawn kan ruat ding," ti ah a ti.
16. Curuangah ziangtinkim ahhin minung ih duhnak le tuahnak ruangah silo in Pathian ih zangfahnak a um ruangah a si theh a si.
17. Izip Faro siangpahrang thu khalah Ca Thianghlim in, " Nangmah cu siangpahrang ah ka lo tuah ih leilung hmuahhmuah ah ka cahnak huham na langter ih ka hmin na thanternak dingah ka lo hril a si," a ti.
18. Curuangah Pathian in a duhmi poh kha a zangfah ih a duh mi poh kha an thinlung a ruhter a si.

Kolose 2:8
8. Ralring uh! Minung fimnak, zianghman santlaihnak neilo pakhat le pakhat bumawknak fimnak hmang tahrat in zianghman in sal ah lo tuah hlahseh. Cubangtuk fimnak cu Khrih hnen ihsin a ra mi a silo; minung leh van leh lei karlak ih uktu thlarau pawlih thuhla zirnak ihsin a ra mi a si.

[6.42]

Pathian hi thuanthu leh suangtuahnak vek men ahcun ziangtinso kan canter thei ding? A thupibik mi zumnak nei si lo hi cun,--  Pathian ih zangfahnak tanta cun a cang theilo.

[6.43]

Kanmai lam in a mal maw a tam simaw kan theitawk in kan zuam rero ih Khrih dung kan thlun ahcun, kan tlukbah rero hmanah zumnak ahcun kan um lai thotho a si Khrih kan zumnak cu. A sinan hi leitlun ahhin Khrih tello in kanmai duhdan in kan nung men a si ahcun, kan zumnak cu kan hnawl ih Khrih kan duhdawt lo, a thu kan thlun duhlo, zumnak kan tlansan tinak a si. Cutin Pathian ih zangfahnak; Pathian ih a lakih pek mi laksawng kan tlansan pang a si ahcun cui zangfahnak cu kan hmang tangkai theilo ding, ziangahtile cui a lak ih pek mi laksawng cu zumnak locun kharpit in a um a si.

[6.44]

Pathian hnen ih zumnak kan neih mi tello cun leitlun thilri dawinak thinlung a suak ih, cuvekin thuawihnak le zumnak cun duhdawtnak ih a hrinsuah mi dingfelnak cu a suahter a si. Zumnak locun Pathian ti lungawi a theihlo ih, zumnak kan nei kan timi le zumnak cu a umcia mi thil a si kan ti rero mi pawl hi kan tuahnak ihsin an lang. Duhdawtnak thinlung in a suak mi Amai hrang ih kan tuah mi hnatuannak pawl a hleice in kan zumtu unau pawl hnen ih kan tuahnak in.

[6.45]

Matthai 25:40
40. Siangpahrang in, 'Thungai in ka lo sim: hi ka unau nautabik pakhat parih nan tuah  mi cu ka parah nan tuah a si,' a ti ding.

I Johan 2:3-4
3. Pathian ih thupek mi kan thlun ahcun amah a theitu kan si ti a fiang a si.
4. Mi pakhatkhat in Pathian ka thei ti ah a ti nain a thupek mi a thlun lo ahcun thuphan per a si ih a sungah thudik a um lo.

[6.46]

Tuannak Pawl
Pathian fate pawlih tuahthatnak pawl hi zangfahnak ruangih pekmi rundamnak tihnget tu an silo. Tamphawlawng pi cu an mawng zo: laksawng khal pek a si zo. Pathian fale pawl hin an sungih irhsuak mi zumnak in cui hna cu an tuan sawn a si; cui an tuannak cu an zumnak langter tu a siih, zumnak cu hmuh theihlo sihmansehla, thil umcia  a sinak tarlang tu a si ti thu anmah le midang khal in bum mi an si lo zia khal a fiangter bet. Ziangruangah hi zumnak hi langsuah ter a tul? Ziangruangahtile hi mi lawng hin Pathian ih laksawng pek mi ngah a theih ruangah le hihi a tulbik mi kan thilti theinak umsun a si ruangah a si. Zumnak ruangih zangfahnak le Pathian zangfahnak hi thildang ihsin ngah theihmi an silo, zumnak lawngin a si ti hi theihhngilh hlah.

[6.47]

Zumnak
Tu ahcun Thuthang Tha ih thupitnak kan thei thlang. Mi zapi hrangah Pathian cun a zangfahnak a pe hai ih cucu zumnak ih ngahtheih mi a si, cule amah thawn kan rualrem aw thei. Cui zumnak cu theihnak in a ra, - cui Thuthang Tha kan theih mi cu amah te ra suak mi silo in kan thlarau hna ngei, kan thlarau hna kan thonnak in kan theihsuah mi a si.

Rom 10:17
17. Curuangah zumnak cu theihnak in a ra ih, cui theihnak cu Pathian thu in a si.

Jeim 1:22
22. A thu kan theih takah a tawk ti men in nanmah le nanmah bum aw hlah uh.

[6.48]

Kan theihnak hi a menmen a si kan ti ahcun kan bum aw a si; thilsual tuah kan si. Tuahthatnak hicun Pathian ih zangfahnak laksawng hi a co theihlo, ziangkim hi Pathian ih laksawng in tuan a si sawn. Zumnak locun Pathian lungawiter a theihlo. Zumnak locun a luangliam mi zangfahnak laksawng hrangah zianghman a tuahsuak theihlo, cuti locun kan zumnak cu a thi mi vekah a cang. Mi pakhat hin thlaici a cin tikah tampi a ngah theinak ding ahcun a thlaici kha a thih ta a tul vekin kan zumnak khal cuvek thotho a si.

[6.49]

Cui thlaici Pathian thu cu kan sungah a nung. Cui ci cu a nun tikah a karhzai vivo ih kiangkap mi pawl in an cing cio hai a si. Cubangin Pathian thu a simi cinung khal a karhzai ih a karhzai sinsin ih rah tampi a rah, a thang vivo, cucu zumnak kan ti mi cu a si. Zumnak ih rahsuah cu tuansuahnak hi a si.

IH SIN:

[6.50]

Duhdawtnak
I Johan 4:16
16. Cule kanmah rori in Pathian ih in duhdawtnak cu kan theiih kan zum a si. Pathian cu duhdawtnak a siih duhdawtnak thawi a nung mi poh cu Pathian sungah a nung mi a si ih Pathian khal a sungah a nung ve.

Thu Thlunnak
I Johan 2:3-4
3. Pathian ih thupek mi kan thlun ahcun amah a theitu kan si ti a fiang a si.
4. Mi pakhatkhat in Pathian ka thei a ti na in a thupek mi a thlunlo ahcun thuphan per a si ih a sungah thudik a um lo.

Dingfelnak
I Johan 2:29
29. Khrih cu a ding a si ti kan thei ko; curuangah a ding mi a tuahtu cu Pathian fate a si ti thei uh.

U le Nau Duhdawtnak
I Johan 4:21
21. Khrih ih in pek mi thukam cu hitin a si: zokhal Pathian a duhdawttu cun a unau khal a duhdawt ve ding, ti a si.

[6.51]

Zangfahnak
Zangfahnak kan co kan timi hi ziangha a thathnemnak um? Amah kan duhdawtnak, a thu kan thlunnak leh kan tuan rah pawl hin hi zangfahnak hi kan ti tam in kan ti mal theilo ih a thleng khal kan thleng theilo. Ziang hmuahhmuah hi Pathian pek mi laksawng an si. Pathian in a zangfahnak cu ol ai ten a tuldan vekin a fa le pawl hnenah a pe hai. Zangfahnak hi amai laksawng a siih cumi cu zumnak in ngahtheih mi a si. Cui zangfahnak kan timi hi kan co ruangah zianghman thathnemnak dang cu a um lo, zumnak kan neih
lawngah a sor theih a si. Hi hi Pathian hnen lawng ihsin ra mi a siih zumnak cu Pathian ih tongkam suak theihnak ihsin a si.

[6.52]

Zangfahnak kan tluksan ti hi thil cangthei teh a si maw? Si e..Hi zangfahnak tluksan ding ahcun cucu na neih hmaisat a tul. Zokhal dan thlunnak ih dingfel a tumtu pawl cu zangfahnak an tluksan ih rundamnak an co ban lo. Dan ih hnatuannak (dan thlunnak ih vanram co tumnak) le zumnak ihhnatuan hi danglamnak a um maw? A si ko, kan thiamconak cu tuahnak (zumnak ihsin) a si, ti lawng hman silo, dan thlunnak cun a silo lawlaw.

Galati 5:4
4. Nanmah lakah Dan thlun tahrat in Pathian hmaiah thiamco ternak ngah a tumtu cu Khrih thawi an pehzom awknak hi nan sattan zo a si.

Jeim 2:22-26
22. Cucu nan theilo maw? A zumnak leh a tuahnak a feh tlang, a tuahnak ruangah a zumnak a famkim a si.
23. Cule Ca Thianghlim in, "Abraham in Pathian a zum ih cui a zumnak thawngin Pathian in miding ah a co a si," a timi a kim.
24. Hiti a si ruangah minung cu a zumnak lawngin silo a tuahnak thawngin Pathian thawn rualremnak a co ti nan thei a si.
25. Hlawhhlang nunau Rahab thuhla khalah cuti thotho in a si. Israel mi thlingthlatu pawl thaten a zoh hnu ah zin dang in an tlansuaknak dingah a bawm; cubangtuk in a tuah ruangah Pathian rualremnak a co a si.
26. Cuti a si ruangah taksa ruangpi cu thlarau locun a thih bangin zumnak khal tuahnak locun a thi ve a si.

[6.53]

Non Leuhleuh
Hi thu na zirh tikah zangfahten ti sual pang hlah aw. Tu le tu sim non mi tampi a um hi,  nun pitling na neih le neihlo zohnak silo in Bible sungih tarlang mi theihfiangnak ding sawn ah a si. Cumi cu zirhtu hmuahhmuah ih Zirhtu, Thlarau Thianghlim in bungtin le cang dangdang ih a sim rero mi a si. Cumi cun kan sungah tleunak thar a run thunlut, curuangah hiti'n phun dangdang in ka rel ve nak a si.

[6.54]

Thusuh Sannak
Hi thu hi ol-ai ten a sannak hram kan hmu thei. Zumnak hi tuannak in a rah hmuh ding  a um lo ahcun zumnak kan neilo tinak a si: ih a thi a si. Kan zumnak kha tuahnak in a bom lo ahcun Pathian pek mi laksawng zangfahnak thil netabik hi zumnak locun a ngah theih lo. Pathian ih laksawng zangfahnak (si lole ihsin) cu zumnak lawngih ngah theih thil a si. Cui a rundamnak cu a zangfahnak silo'n kanmai zuamnak hi cun a ngah theihlo.  Pathian zangfahnak hi kan hloh theilo nan kan zumnak lawngte kan tlansan thei. Curuangah zumnak cu a kai in a tumsuk thei ih cuitlunah fiangfai hnai lo vek tla'n a um thei. Zumnak hi a tawp thei, thimnak ah-kan thih tikah. Jesuh Khrih a ratsal tikah rundamnak hrangah zumnak leh ruahsannak pawl hi a rung ti kau vivo lai ding. Cui Pathian zangfahnak, kan zumnak cun sualnak leh thihnak ihsin zalennak in pek ih tlunah kumkhaw nunnak laksawng in pe cih a si.

I Piter 1:3-5
3. Kan Bawipa Jesuh Khrih ih Pa le Pathian cu thangthat uh si, in zangfahnak a tum ruangah Jesuh Khrih cu thihnak in a thoter ih nunnak thar in pe zo. Curuangah a nung mi ruahsannak in kan khat ih,
4. Pathian in a minung pawl hrangih a ret mi ro cu co dingah hngakhlap in kan um. Cui ro cu nan hrangah vancungah a lo retsak ih a siat theilo mi zohman ih ruk theilo mi leh a ziam theilo mi an si.
5. Ni netabik ah langter dingah a tu ih retcia mi rundamnak cu zumnak thawngin Pathian huham ih kilven mi nanmah ih co ding ro a si.

[6.55]

Zirhternak Sual pawl hin zumnak hrekkhat an siatsuah zo.

II Timote 2:18
18. An pahnih in a dik mi lamzin in an pial a si. Annih in, "thawhter sal mi kan si zo," an ti ruangah zumtu hrekkhat pawlih zumnak an vaivuan ter.

[6.56]

Jesuh Khrih ih keneh kan thlunnak ahhin Pathian fale pawl ih tidan vekin zumnak in kan tuan a si.

Galati 3:26
26. Zumnak thawngin nan zaten Pathian ih fa nan siih Khrih Jesuh thawn nan pehzom aw zo.

[6.57]

Taksa ih kan umlai khal ahhin hi zumnak hin fa kan sinak cu a famkim ter, cucu Khrih ih ratsal ni tiangin ti hngetkhoh a si ding. Cui fa sinak cu kan zumnak kan tluksan lai hlanlo kanmah ah a um ringring a si.

Kolose 1:23
23. Cuti a si ruangah nan hramtohnak a hnget mi parah khal fek zetin zumnak thawn ding ringring uh, thuthang tha nan theihnak ihsin nan congah mi ruahsannak thawn zohmanin lo then hlah hai seuh. Thuthang Tha hrangah keimah Paul hi hnatuantu ka siih leilungtlun khua zakip mi hmuahhmuah hnenih sim mi thuthang tha a si.

Rom 8:23-25
23. Sersiam mi lawng silo in Pathian laksawng hmaisabik Thlarau a co ih a teptu kanmah khal hi kan taksa ruangpi luatnak ding le Pathian fa cannak ding hngak in kan pumsa sunglam in kan hrum kan ai ve a si.
24. Ziangahtile ruahsannak lawngin run mi kan si. Kan ruahsan mi kha kan hmuhthei a si ahcun ruahsannak a si ngaingai lo. Zo so a mit ih a hmuhthei mi cu a ruahsan dah?
25. Sikhalsehla kan hmuhthei lo mi kan ruahsan a si ahcun thinsau te'n kan hngak a si.

[6.58]

Jesuh Khrih a ratsal tikah kan ruahsannak pawl hi a takin kan hmu dingih in tiamkam mi kumkhaw nunnak hi a takah a rungcang leh ding a si.

Thuphuan 20:6
6. Hibangtuk in mithi thawhsalnak a hmaisabik ih a teltu cu mi lungawi le mi thlawsuak kan si. Veihnih thihnak in an tlunah thu a nei nawn lo. Pathian leh Khrih hrangah puithiam an tuan dingih amah thawn kum thawngkhat sung an uk ding.

[6.59]

Ngaithiamnak le rundamnak pawl hi Lalpa in a kauter dingih thawhlehnak hmaisa ih a t eltu pawl cu thih hnihnak in a neh nawn lo ding.

Thuphuan 20:12-13
12. A thi cia mi pawl cu a tum a sen in bawi tohkham hmai ah an din ka hmu. Ca uk pawl a kau,' cui hnu ah nunnak ca uk timi ca uk dang pakhat an kau lala. Mithi pawl cu cui ca uk sungih an hnatuan mi an rak khum cia vekin an thu then a si.
13. Cule tifinriat in a sungih um mi mithi pawl a hun suah. Thihnak le mithi khua khalin a hrencih mi mithi pawl an hun suah ve: an zaten an hnatuan cia mi vekin an thuthen an si.

[6.60]

An hmin hmuahhmuah cu Tohkham var thuthennak ah Tufano cabu sungih nganmi vekin thuthen an si ding.

[6.61]

Pathian Kan Si Sisehla Cu!
Khrihfa pawl cun zohman in an thinlung taktak cun thurin dang menmen cu cawn men an tumlo ding. Pathian in duhthlannak in pe in, a si lole kanmah hi Pathian rak si sehla cu kumkhaw nomnak van ramah kan rualpi tha le sungkhat laina pawl hi kan hruailut thluh ding. Pathian kan rak silo hi cu a buaithlak nasa. Curuangah zianghman kanmah ten thu bawhcah theinak kan nei lo.

[6.62]

Kan lungduh mual in liam san zo tu pawl khi kan thih hnu ah hmuhsal kan duh cio. Kannih khal cui lamzin kan feh hlanah mi tampi kan hmai ih rak fehcia zo pawl kan hmu ve leh ding. Cui hmun ahcun kan lungduh pawl mei leh kat tili pi ih hremnak lamzin an zawh ding le an thlen ding hmuh cu zo in a duh pei?

[6.63]

Tulai kawhhran hrekkhat ahcun sual ihsin rundamnak hi dawi thil vek tiangin an hmang men hai. Cutin zumlo tu pa khatkhat an kosuak ih thudik le thuhman a si mi Pathian hnen ih sualphuannak vek an nei ter, an ka in mipi hmai ah an sal ter ih cuti an phuansuahnak cun an rundamnak cu kumkhaw hmun mi tluk ah an ruat ter. Cutin mipi hlasahnak hmai ahcun hla in "ka sinak bangin"  ti in an au ve satliah mei. Hi bangpawl ih sual phuannak cu reilo te sung hrang a si. An sualnak cu mipi hmai ah an phuang ko, Jesuh khrih hrangah thukamnak nei in ca tla an ngan, cuvek in cabu te tla Johan cabu tvk, an zem ih an neih ruangah le cuvek ih an tuahnak ruangah kumkhaw nunnak nei in an thei aw mei.

[6.64]

Thu Ol-ai te A Si

Pathian insang si hi thil ol te a bang, a si, sir awknak a neitu le Pathian ih ngaidamnak huham thar a co ngahtu hrang ahcun a ol te  ko. A sinan mi hrekkhat pawl cun vanduai ah hi thu hi pomngah lo in anmai phur hlimhlop nak ih rak co ngahtu khal an um. Hi ban g pawl hi a langte ih piangthar pawl dinhmun a si. Theih tul mi cu Pathian in hmurka lawng a zoh lo; thinlung lam sawn a zoh ti hi a si. Cubang pawl cu thlaici lungto par ih a tla mi vek an si ih hram thuk an nei lo.

Matthai 13:5-6
5. A thenkhat cu leilung malnak lungsedap lakah an tla ih leilung a sah lo ruangah thlaici cu hmakhat te ah a to.
6. A sinan ni a sat tikah a to pekte pawl cu an thi sal; an hram in leilung thukpi a dawh theilo ruangah an car cing thluh.

[6.65]

Hi tivek thinlung nei mi Khrihfa pawl cu ziangtik hmanah an zumnak a thang thei lo ih rah khal an rah thei hai lo: rei lo te sung cu an langsar vungvo nan an ziam leh mai theu. Mi rinum kan ti mi pawl teh ziang tin? Kawhhran hrekkhat cun an theihfiang dan in, an zirh veikhat rundam si cun van kai ding ti leh ziangtik hmanah Pathian ih an rundamnak cu a hlo theilo an ti. Cun hivek zirhnak khal hi Bible ih zirh dan a silo, tuksum za thil a si! Cun mi hrekkhat ve fawn cun zokhal Pathian hnen ihsin tlansuak pawl cu an sual ngaidam theih a si nawn lo tin an zirh ve, hi khal hi thuphan thotho a si.

Luka 8:13
13. Lungsedap lakih a tla mi thlaici ih khihhmuh mi cu, Pathian tongkam cu an thei ih lungawi zetin an pom. A sinan an thinlung thukpi ah a pil lo. Tikcu tawite sung an zum ih hniksaknak can a thlen tikah a tlusal mi pawl an si.

Jesuh Khrih na zum theilo a sile zo ha na zum thei ding?

[6.66]

Thinlung takih Jesuh Khrih a dil tu cu an thih tikah Lalram an thleng ding ti zum mei hin thinlung ahcun hnangamnak mi a pek thei zet, a sinan cu ti a si fawn lo.

[6.67]

Bible Khalin Hitin A Sim
Bible ih sim mi " vei khat rundam catuan daih" timi hi bible bungcang tampi ah kan hmu thei ih a sinan vun ruah that ahcun belhcian a dawl thluh lo, kan thlirthla sal kei uh.

Filipi 1:6
6. Curuangah nanmah sungih hnatuan tha a thoktu Pathian in Khrih Jesuh ih Ni a ra thlen hlan tiang nan parah a tuansuak ding ti ah ka ring.

[6.68]

Hitawk ih "Amah" timi Thlarau Thianghlim thu hi zangfahten ruat tha aw. Hi pa hin thutak pumhlum ah in hruai lut ding, hi hna hi Thlarau Thianghlim ih tuan mi hna tha a si ih a hleice in a famkim ( Efe.1:30). Thlarau Thinghlim ih tuansuah rundamnak hi bumawknak in a tisiat theilo a sinan kanmai lam ih duhnak sawn hin in tibuai sawn theu ( Filip.2:12). Curuangah kannih cu tacik khen mi kan si ko nan cui tacik  (seal) cu thukamnak tacik a si (Efe.1:13). Cui thukamnak cu a tlangpi thu in kanmai parah a thumaw aw ih a net tiang tuar thei a tul (Matt.10:22).

[6.69]

Kannih hin duhthlan theinak kan nei, cucu rundam kan si hnu khalah in laksak lo: Pathian in vanram sangka zin ah in hnuk in in khawng rero lo. Thlarau Thianghlim cu kan thlarau nunnak kilkhawi tu a siih sualnak ih nekcepnak pawl in hlon sak sawn. Anih cu in ticak tu le humhim tu a si ko nan hngelhnget takin um aw: a cemnet tiang thlah hlah ( Mk. 13:13).Thungai in kan ti a si le (Jesuh) in kan nunnak in kilveng nan kanmai lam ih duhthlannak a tul. Cuvek thotho in "Ziangtik hmanah ka lo suahsan in ka lo tlansan dahlo ding" ti ah Jesu'n a ti. A sinan Bible ih in suh mi cu Jesuh hi kan thlun ding maw, kan tan ding?

Hebru13:5
5. Tangka duh hlah; nannih nan neih mi ah nan lungkim uh. Ziangahtile Pathian in," Ka lo tlansan lo ding ih ka lo hnong lo ding," in ti.

[6.70]

Hiti tlan a sim hrih, "Zohman ka Pai kut ihta cu an la theilo ding," a ti, a sinan A kutsungin kan tlansuak theilo a ti maw?

Johan 10:28-29
28. An hnenah kumkhaw nunnak ka pek ih ziangtik hmanah an thi nawn lo ding. Zohman in in long thei fawn lo ding.
29. Ka hnen ih I petu ka Pa cu ziangzongza hnakin a tum ih amai kilkhawinak sung ihsin zohman in an long thei lo ding.

[6.71]

Hitawk ah, Amah in kumkhaw nunnak in pek zo thu a rel. Ziangruangah? Cang kul hluan sarih nak hi siar aw, " Ziangahtile in thlun ruangah a si" timi nan hmu ding. Curuangah kumkhaw nunnak hi Jesuh Khrih dungthlunnak in a si ih Amah kan thlun tikah a kut ihta khal siseh Pai kut ihta khal siseh zohman in an laksak thei nawn lo. Jesuh hi kan thlunsal lo a sile ziang kan cang ding?

I Korin 15:1-2
1. Ka u le ka nau tla, nan hnen ih ka rak phuan mi Thuthang Tha kha tu ah lo theihter sal ka duh. Cui Thuthang cu nan pom cia mi le nan zumnak hnget zetih a dinnak hmun a si.
2. Nan hnen ih ka phuan cia mi Thuthang tha a si ih hnget zetih nan pom a si ahcun run mi nan si. Nan pomhnget lo a si ahcun zumtu nan si hi a lak a si ding.

[6.72]

Kan hngilh lo ding mi cu kannih hi Pathian ih thukam mi Thlarau hna kan tuan rero ti hi a si. Curuangah a tikcu a thlen tikah in kam cia mi pawl in pe leh ding a si. Kannih cu Khrih ihsin kumkhaw nunnak kan ngah. Kan thinlung in Jesuh cu Lal a si ti kan zum ih kan pom a si ahcun thihnak in nehsak tu khal a si (Rom 10:9-10). Jesuh hi kan Lal a si lo ahcun kan sualphuan dan a sual ih; in tiamkam cia laksawng rundamnak ngahnak ah a tling thei lo. Lal ih kan pom ahcun kan nunnak ah kimcang takin in luahkhat tu a si. Na ca siarnak lawng hi pom mai aw hlah, nangmah le mah kha zohfiangaw awla Pathian thu hi na fiangfai mai ding.

I Johan 1:7
7. Sikhalsehla amah cu tleunak ih a um vekin kan nih khal tleunak sungih kan um ahcun pakhat le khat khal pawlkomnak kan nei ih a fapa Jesuh ih thisen in kan sualnak hmuahhmuah a tlengfai a si.

[6.73]

Tleunak sungih kan um a si ahcun, Amah tleunak a si vekin, midang unau pawl thaw khalin pawlkomnak kan nei ih a thisen in kan sualnak hmuahhmuah cu in tlengfai sak ding. A va mak em! A sinan cui tleunak zin (thutak leh dingfelnak tleu) sung kan feh lo a sile ziangtin, thimnak sungih feh thotho ah, kan sualnak hmuahhmuah cu a tlengfai thotho pei maw? A tlengfai thotho ding a si ahcun, "... a sile"  ti mi hi a tul lo dingih, sualsirnak khal a tul lo ding. Cang kua cemnak tiang siar vivo aw.

I Johan 1:9
9. Sikhalsehla Pathian hnenah kan sualnak kan phuan a si ahcun(..a sile) zumtlak le a ding mi a si ruangah kan sualnak in ngaithiam dingih kan mawhnak hmuahhmuah a thiangfai ter ding.

[6.74]

Bible ih Pathian thukam tongkam tumbik "... a sile" timi thu hi kan sim hrih ding. Hi tongfang ih a simduh mi cu kan tehton lai ding mi thil a sawhkhih duh. " Sikhalsela Pathian hnenah kan sualnak kan phuan a si ahcun zumtlak leh a ding mi a si ruangah kan sualnak in ngaithiam dingih kan mawhnak  hmuahhmuah khal a thiangter ding." Ka nolh hrih ding, " kan sualnak kan phuan ahcun." Kan sual kan phuan lo ahcun a thianghlim mi kan si thei ding maw? A sannak cu a olte a si, KAN SI LO ti hi a si mai! Khrihfa hin Pathian thu a tluksan thei lo a si ahcun Jeim cakuat hin ziang a simduh?

Jeim 5:19-20
19. U le nau pawl, nanmah lakah pakhat khat thutak ihsin a pial ih a dang pakhat in a hruaikir a si ahcun,
20. Zinpeng ihsin misual a hruaikir tu in cui misual thlarau cu thihnak ihsin a runsuak dingih a sualnak khal tam zet hmansehla ngaithiamnak a coter ding a si, ti hi cing ringring uh.

[6.75]

Zangfahten kannih unau za hnenih in sim mi thu hi cing ringring aw, kan unau Khrihfa pawl ho khaw in sawhkhih. Hitawk ah fiangfai te'i in sim mi cu Khrihfa si zo mi sual ih a kir tikah (Khrihfa hi sual ah a tluksal theih) a unau Khrihfa dang pawl kha lamzin bitnak ah a hruai hai ih, rundam ngah cia zo pawl kha thlarau thihnak ah a hruailut leh sal thei a si. Curuangah Jesuh Khrih rundamnak ihsin a pialsal thei a si. Khuavang Setan riantu pawl khal hin Jesuh hi an tih ve ngaingai cingin catuan hremhmun hi an pumpelh thei cuang lo. Curuangah Jesuh Khrih theihnak lawng hi a tawk famkim hrih lo. Na rundamtu si thei ve ding ahcun a pakhatnak ah na Lal ah pom awla: Anih cu na nunnak ah thu neitu cungnungbik a rung si ding.

Jeim 2:19
19. Pathian pakhat lawng a um, ti nan zum a silo maw? Cuti nan zum cu a tha zet. Sikhalsehla khuavang pawl khalin Pathian pakhat a um ti an zum ve; A sinan an tih ih an khur thloh thlo.

Matthai 7:22-23
22. Thuthen Ni a thlen tikah mi tampi in, ' Bawipa, Bawipa, na hmin in Pathian thu kan sim, na hmin in khawsia tampi kan dawisuak ih mangbangza tampi kan tuah,' ti ah ka hnenah an ti ding.
23. A sinan kei cun, 'ka lo thei dah lo! Ka hnen ihsin tlan uh, nannih mi thalo pawl!' ti ah ka ti hai ding.

[6.76]

Mi tampi hin Khrihfa kan si an ti aw nan a taktak lo an tampi, anmah ten an bum aw! Rundamnak kan ngah hmang an ti nan an rak ngah deuh lo. Hibang pawl hi Setan in khawi nuam a va ti zik hai em, thutak khal an hawl lo ih rundam fa ka si cu an ti aw ve. Mi malte lawng ih co ding mi thutak thu theih hi an hriarhal lo.

Matthai 7:14
14. Sikhalsehla nunnak sungih luhnak kotka cu a fiak ih a fehnak lamzin khal a har; curuangah a thlengsuak tu cu an malte a si.

[6.77]

A tu ih kan nunnak a cem tikah kan luat hmang ding an ti ko nan Khrih ih thuthennak tongtu ding  an si, ruahsannak mit cu an meng kau zet nan, "ka hnen ihsin suak uh ka lo thei lo" timi a tongkam dongtu ding pawl an si (Matt.7:21-23). An dam sungah an thlaraulam hruaitu pawlin " Vei khat rundamnak catuan daih" ti ih rak zirh mi pawl an si. Na korzal sungih thil hlo vek cun na hloh thei lo men thei. A sinan na canral lan thei ti cu Pathian thu ah fiagzet in a um. Pathian in a ram sung thleng dingah zohman a hranhram in a nor dahlo. Pathian in sal kaih in mi a kai dahlo. Mi tawnhremtu cu Setan sawn a si Pathian a si lo. Mi pakhat in Pathian in i tawnhrem a ti ahcun a Pathian hnatuannak kha a tak a silo tinak sawn a si.

[6.78]

Amah Kan Thei Ti Hi Ziangtin Kan Thei-aw Thei Ding?
Zumtu lem pawl lakah hin bumawknak le a karhzai vivo fawnih, ziangtin rundam mi kan si ti kan theih awk thei ding? Pathian in, tuurual pawl in thu ngai cak in an hna a za dingih cui pawl diriamnak ah phuahcop thu cu tuukhal tu pawl in an zirh nak ding can a thleng leh ding ti a thei cia. Sualnak sir aw ding ko ih an zirh lai hlanlo ahcun Pathian ram minung si theinak ding thu a um lo. Thang vek ih a awksual tu cu Pathian thu cikfel loin minung thu an thlun sawnnak kha a si.

II Timote 4:3-4
3. Mi in a dik mi zirhawknak kha thlun duh lo in anmai duh mi sawn an thlun can a ra thleng ding. Cule theih an duh mi lawng phuang dingah zirhtu saza tampi anmai hrangah an lak ding.
4. Thudik kha ngai duh nawn loin an dungtun dingih a diklo mi thuanthu menmen sawn an ngai duh ding.

[6.79]

Kannih cun A thu in pek mi vekin kanmah le kanmah thu kan sut aw dingih, a thupi bik mi thu bawhcahnak felfai cu a hnuailam ih Bible cang hmangin kan tuah ding a si.

I Johan 2:3-4
3. Pathian ih thupek mi kan thlun ahcun amah a theitu kan si ti a fiang a si.
4. Mi pakhat in Pathian ka thei a ti nain a thupek mi a thlunlo ahcun thuphan per a siih a sungah thudik a um lo.

[6.80]

Kannih teh kan nunnak ahhin a tleu mi Pathian thu hi kan sunsak ve maw? Mi tampi cun hi thu kan siar veten kan hngilh mei theu. Hi Bible bungcang ahhin zianghman na cing nawn lo a sile a tlun ih Bible cang kha ruat tha sal aw.

[6.81]

Elnak Thudang
"Veikhat rundam catuan daih" timi tongfang thu zirhnak elnak a um sal. Himi ih an sirhsan theu bik mi cu hi hi a si. Johan 3:16 cun hitin a ti, "zokhal a zumtu hmuah an hlohral lo ih kumkhaw nunnak an neih theinak dingah."  Bible ih  " lo ding" a timi ruat tha sal aw,  "men ding" ti a si lo. Massachusett ih phunhra tlawngta pawl hi zanlam nazi 2:00 ah tlawng an tum ih tlawng ta pawl hi nazi 2:30 ah an inn thlen ding a si, a sinan tlawngta hrekkhat pawl cu an nu le pai beiseinak vekin an tuah thei hai lo. An tlawng tum cu zanlam nazi 2:00 a si ko nan. cuvekin in kawhnak ruahsannak kan neih mi khal cu a si. Tlawngta pawl cu tlawng an tum cio nan a tikcu ciah ah an thleng hai kherkher cuang lo. " Ngei ngei ding" tile "Men thei" timi an danglam aw nasa. Curuangah Pathian Lalram cu a net tiang a hngak theitu pawl (Mark.13:13) hrangah a si. Mi pakhat cu sual ruangah a thi a si ahcun, cupai nunnak hrangih zonzai zet in hnatuantu pawl cu a lakih tlanzuam aw rero men ah an cang ding a si. A hnuailam ih Bible cang te hi kan sim sal leh kei uh.
Thaten siarsal aw.

Jeim 5:19-20
19. U le nau pawl, nanmah lakah pakhat khat thutak ihsin a pial ih a dang pakhat ih a hruai kir a si ahcun,
20. Zin peng ihsin misual a hruaikir tu in cui misual thlarau cu thihnak ihsin a runsuak dingih a sualnak khal tamzet hmansehla ngaidamnak a ngahter ding a si, ti hi cing ringring uh.

Matthai 10:22b-Sikhalsehla a net tiang a tang thei tu cu runsuak an si ding.

[6.82]

Jeim 5:19-20 ah Khrihfa unau dungtolhnak ih thi mi thu kan hmu. I Korin 15:1-2 khalah hin kan  theih tul mi dinhmun pakhat a um. Kannih khal kumkhaw nunnak roluah tu ding kan si ahcun Dungthluntu pawlih an rak zirh mi hi kan zir thiam a tul ve nasa. Kan zir duh lo a sile ziang kan cang ding?

I Korin 15:1-2
1. Ka u le ka nau tla, nan hnenih ka rak phuan mi Thuthang Tha kha a tu ah lo theihter sal ka duh. Cui Thuthang cu nan pom cia mi le nan zumnak hnget zetih a dinnak hmun a si.
2. Nan hnenih ka phuan cia mi Thuthang Tha a si ih hnget zetih nan pom a si ahcun run mi nan si ding. Nan pom hngetlo a si ahcun zumtu nan si hi alak a si ding.

[6.83]

A tlunih kan rel cia zo bangin Dungthluntu pawlih thuzirh mi kan thlun lo a sile siatralnak kan tong ding. Zumnak in nitin kan tuan le tuah dingah a hnuai ih Bible cang in ralrinnak in pe.

Filipi 2:12
12. Curuangah, ka rual le uh, nan hnen ka um laiih ka thu nan thlun ringring vekin le, cuhnak hmanin a thupi mi sawn mi cu, nan hnenih ka um lo canah ka thu nan thlun ding hi a si. Runnak famkim nan ngahnak dingah tihzah le thia phah in tuan rero uh.

[6.84]

Jesuh in sal santlai lo a relnak thu Matthai18:32-35 leh Matthai 25:24-30 ahhin ziang an cang ti ruat tha sal aw.

Matthai 18:32-35
32. Cutikah siangpahrang bawipa in cui hnenum pa cu a ko ih, 'Nang sal tha lo. I dil ciamco ruangah i bak mi hmuahhmuah ka lo olh a si.
33. Na parah zangfanak ka neih vekin na hawipi parah zangfahnak neih ve ding mawi na si,' tiah a ti.
34. Siangpahrang cu a thin a heng ngaingai ih cupa cu a leiba zate ih a sam theh hlanlo thawngah a thlak, a ti.
35. Cule Jesuh in "zokhal nan unau kha nan thinlung ngaingai in nan ngaithiam lo a si ahcun vancung ih a um mi kan Pa in cui hnen umpa bangtuk in a lo tuah ve ding a si," ti ah a netabik ah a sim.

Matthai 25:24-30.
24. Cule thawngkhat a ngahtu pa kha a ra lut ih "Bawipa, nang cu mi ti fekfek na si ti ka thei; na tuh lonak ah a rah na la ih na vorh lo nak khalah rawl na khawm.
25. Cuti a si ruangah ka lo tih ih na tangka cu leilung sungah ka phum. Zohhnik! Hinah a um ko,' ti ah a ti.
26. Cut tikah a bawipa in nang hnenum thalo, mi ze pa! Thlaici ka tuh lo nakah ka la ih ka vorh lo nakah ka khawm cu na thei taktak maw si?
27. Cuti a si ahcun ziangah so ka tangka cu ka ra kir tiangih tangka thang thawn ka ngah thei nak dingah tangka retnak ah na rak ret lo.
28. Hi ti a si ruangah hipa hnenih tangka cu la uhla thawnghra a neitu pa hnenah pek uh.
29. Ziangahtile a neitu pawl cu pekbelh an si dingih a hleifuan in an nei ding. A sinan zianghman a nei lo pa hnenin a neihsunte hman kha laksak a si ding.
30. Hi thathnemnak neilo hnenum pa hi a leng khawthimnak ah hlon uhla cutawkah tap ai in a h acang rial seh" ti ah a ti.

[6.85]

A San Theihlo Thil
Jesuh Khrih a rat tikih a pek ding mi kumkhaw nunnak hi a sinak simfiang lo in Thukham Thar Cabu sungah a hleice in Thuthang tha cabu sungah kan hmu hnuaihni. Laksawng hrekkhat pawl cu pek cia zo ih simfiangnak a um: cuvek thotho in kumkhaw nunnak thu khal pekcia a sinan simfiang a si cuanglo. Nu le pa hrekkhat pawl hin an fa le pawl degree an lak canah kutken fawn (automobile phone) pawl tla an pe theu, cumi cu a san te a um ruangah pek mi a si. A si ko, mawtaw khal hi fa le pawl hrang ahcun alak ih ngah cu a si ko: nu le pai man pek cia mi a si, ih khui hmunah, ziangtik canah, hman ding ti cu nu le pa ih fial dan a si. Cuvek a si rundamnak khal A fa le pawl hrang ahcun simfiang khal sehla fianglo khal sehla an ta a si mai. Bible sungih rundamnak thu a relnak tinah a san le umzia khal a tarlang vivo. Cui rundamnak cu a lak ih pek mi cu a si ko nan, Jesuh Khrih zum a tul tin a tambik in a rel. Cucu a tul mi san a si pei maw? Cumi ngahnak ding ahcun Dan thlunnak in teh a si maw? Mawtaw cu alak a si ti cu a dik ko, zo in a man an rak pe, a tul mi si pawl le thih hnu rosiah ( life insurrance) le a hman dan ding tiang in a tul lai. Cuvek in rundamnak tleu khal hi alak cu va si hman sehla a sungih um in fial a si lo maw, hmansuah dingin?

[6.86]

Zumnak ih ka unau leh ka saza pa Clip Brogden cun, " Thinglamtah hnatuan thuah hnih" timi ca a rak ngan. Cui a cabu sung ahcun Piter ih thu le a dang thu pawl khal hitin a rak ngansuak:

"Khrih cun kan hrangah zohthim dingah in tuarsak ih cui a keneh cu na thlun ding a si," (I Piter 2:21) a ti. Khrihfa pakhat hnenah hitin thu sut sehla, " Thinglamtah hnatuan hi na pom maw? ti in. Mi tampi cun ka pom ko an ti cio ding. Cule cui Thinglamtah ih hnatuannak cu ziangha a si ti in sutbet sehla, Jesuh Khrih cu kan sual ruangah leitlun mi hmuahhmuah hrang Thinglamtah parah khenbeh a tuar an ti cio ko ding. A tha ve pam ko e a sinan a diklo men thei. Hitin sut sehla a tha sawn ding, " Thinglamtah ih hnatuannak thuahhnih" kha na pom zo maw? ti in. Hitin Khrihfa hrekkhat pawl hi sut sin hman, thupolh awknak vekin saupi pi'n an lo let ding. A sile cui, "Thinglamtah ih hnatuannak thuahhnih" kan timi cu ziangha a si? Hi thu hi mi tampi cun an thei lar vio nan mi hrekkhat cun Thinglamtah a khatlam zawng lawng an rak thei ngah.

[6.87]

Hitivek in kei khal thinglamtah ih Jesu'i kan hrang a thihnak thu hi kap khatlam zawng lawng in ka rak zoh ringring. Cucu zapitheih a siih mi hmuahhmuah ih zirh mi khal a si. Cui thinglamtah par ahcun ka hrangah khehbeh A tuar ih a nun a liam. Ka sual ngaidamnak dingah ka hrangah a thisen sunglawi a thlet. Culawng hman silo in Bible cun Pathian in Jesuh parah kan zate sualnak cu a burh a ti. Baptist tu Johan cun hitin a ti, " Pathian Tufano leitlun sualnak a phurtu khi" ti'n. Cui a thihnak cun raithawinak a hmuhsak. Curuangah kannih kha a tuan zo mi sungah kan luh thei ve nak a si. Kannih hi thinglamtah parah Amah thawn pumkhat ah in tuah. Kan leiba in samsak zo ruangah Pathian hnenah lungawi za a si. Kannih in kan pek a tul nawn lo. Thinglamtah parih va feh ve tla a tul nawn lo, kan sualnak ruangah va khenbet awk ve tla a tul nawn lo. Ka sim duh mi cu Khrihfa zate deuhthaw in thinglamtahnak thu hi kan fiang cio. Thuthang Tha ih hrampi khal a si. Siarcawklo thusimtu pawl in zumtu pawl hnenih an phuan mi thu ih hrampi khal a si. Cu cu Thutak a si ruangah phuansuah ih a um tik lawngah Pathian hnen ah lungawinak kan nei a si.

[6.88]

Thinglamtah thu khatlam zawng zohsal ding kan nei lai. Cumi cu mi zapi theih tlak ih phuan le rel a si dah lem lo. Mi tampi in, " Misual pawlih thinglamtah" ti'n rel in, Jesuh cu Rundamtu, an Ai awhtu khalah an pom cio ko. Jesuh hi kan ai awhtu a si, kan ai ah thinglamtah parah a thi ti khal hi thudik a si ko. A sinan kan sim zo bangin thinglamtah ih hnatuan thuahhnih timi a um lai hrih. Piter khalin hi thu a rak ngan lai ah a ai a puang nasa ve. " Khrih cun kan hrangah in tuarsak ih, cawn tlak mi si dingin in tan ta, curuangah a keneh na thlun ding" a ti. Khrih hin kan HRANG ah a tuar: cucu a pakhatnak a si. A sinan ZOH THIM DING ah ti hi a pahnihnak a si. Curuangah thinglamtah ih hnatuannak hi thuah hnih kan tinak a si. A pakhatnak cu kan ai in awhsaknak hi a siih a pahnihnak ah Anih cu kan zohthim ding mi a si. A hmaisa thu simfiangnak dingah  thinglamtah cu Amah rori'n a pu. A pahnihnak ahcun kanmah in kan pu ve. Thinglamtah ih hnatuan veikhatnak kha cu misual pawl hrangah a si ih a veihnihnak cu a Thluntu pawl hrangah a si. Curuangah Jesuh ih rak sim mi cu thinglamtah lamzin cu a bi te ih zin harsa a si a ti. Cui kotka cu kan khualtlawn thawhnak lawng a si ih: kan vawrtawp a si hrih lo. Curuangah kotka ih kan um ahcun lamzin zawh kan tul lai tinak a si. Pakhat lawng cu a dang hrangah a famkim deuh lo. A sinan kotka ih kan um cun zin ah kan feh a tul tinak a si. Kot cun lamzin ih fehnak in tuahsak a sinan kot cu a netnak a si hrihlo. Lamzin thawhnak ah silo in lamzin tawpnak lawngah Nunnak cu a um. "Misual pawlih thinglamtah" kha kotka a si. Ziangruangah tile Jesuh cu kan ai awhtu a si. Tu cun a lamzin kan zawh thei ve thlang "Dungthluntu pawl thinglamtah kan timi cu a Lamzin kha a si. Curuangah tu cun amah zohthim in kan feh thlang ding. An danglam awknak teh na thei thei maw? Jesu'i rak sim mi nunnak neitu pawlih zawh mi lamzin cu a bi te ih a harsa a timi kha Amah Khrih a si. A bitnak san cu Amah Lawng Lamzin a si ruangah a si. A sinan ziangruangah hi lamzin hi a harsa? A hrekkhat hrang ahcun Jesuh hi kan ai awhtu ti hnakin kan zohthim mi ti hi a ol sawn men ding. Thu dangdang in sim sehla, Jesuh hi kan Lal ti hnakin kan Runtu ti hi a ol sawn men ding. Thla ka cam tikah ka ai awhtu ti leh I runtu ti hin kan ti theu. A sinan ka zohthim ding mi le ka Lalpa ding a si sawn, diktak ih a keneh ka thlun ahcun a hnen ih tluklut nak hi a tul lo. Ziangruangah? Pakhatnak ahcun " misual pawlih thinglamtah" ka hrang i tuah sak zo nak hi ka pom thlepthlep. Cuti a sinan an pahnihnak  "Dungthlun tu'i thinglamtah" hi cu keimai ta a si ih ka Lalpa dungthlun nak dingah a si. Hi hi cu reilo te sung kotka lan hlan sung thil a sinan a lamzin cu san sung zawh ding mi a si. Piter in hi thinglamtah hnatuan thuahhnih thu hi a rak ngan nan Matthai 26-sungah amah khal in a thei ringring lo ti cu a fiang.

[6.89]

Jesuh cu kan ai awhtu le ziangkim ih kan zohthim ding mi a si thu Matthai 16-sungah a bung pumpi'n a sim. A pakhatnak ah aiawh saknak thu a sim. Dungthlun pawl hnenah Jerusalem ih a feh ding thu leh harsatnak a ton ding thu, an that dingih ni thum ni ih a thawh sal ding thu a sim hai. Hi hi a sualnak ruangah a si pei maw? Si hlah ee, kan sualnak ruangah a si sawn. Curuangah Anih cu ai awhtu kan tinak a si. Hi thu hi Piter in a theih tikah a tan zet nan Jesu'n a kawk. Hi thu hi theihfiang har na ti maw? A sinan Jesuh cu a her ih Piter cu a kawk ta mai. Hi hi thil umdan a si ko. Jerusalem ah ka feh dingih leitlun misual pawl hrangah thihnak ka tuar ding a ti. Ai awhnakhnatuan hi theh ko ka tuan ding a ti. A sinan cui Jesuh ih taksa thihnak hnakin thinglamtah hnatuan thuahhnih hi a thuk sawn. Cun Jesuh cun hmakhat te ah a sim thok mi cu AMAI thinglamtah thu silo in ANMAI thinglamtah thu a sim hai: " Cule Jesuh in mipi le a dungthluntu pawl cu a hnenah a ko ih, "Zokhal keimah i thlun duhtu cu amai duhnak tanta sehla, a thinglamtah pu in i thlun seh. Ziangahtile zokhal amai nunnak hum a duhtu cu a nunak a sung ding; a sinan keimai hrang le Thuthang Tha ruangah a nun a liamtu cu a nunnak a hum ngah ding a si."(Mk. 8:34-35).

[6.90]

Piter cun Jesuh thinglamtah parih khenbeh lo ding leh thihnak tuarter lo dingin a zuam. Culai ah A LALPA lawng silo in anmah pawl khal khenbeh ding an si thu Jesu'n a sim, cuitlunah zokhal mai harsatnak poisa lo in mai thinglamtah cio phur ding an si thu a sim bet. A netnak ah Piter in a nun ih a zirsuah bangin kannih khal kan zirsuah ve a tul. Jesuh cu kan zohthim mi le kan aiawhtu a si. Kan Lal leh Rundamtu khal a si. Cuitlunah Zinbi le Lamhar khal a si. Mi pakhat hin a huham le cahnak a ringhlel a sile a lungawinak a mal dingih, rinumnak khal a tlasam ding, cuitlunah hi Thlarau leh Thutak ahhin a tlasam ding, cucu mi pakhat ih thinglamtah thu hmuhdan in a tah theih. An hmuhdan ah, Jesuh in thinglamtah IHSIN a rundam hai maw a si lole thinglamtah HRANGAH a run hai maw? A rahsuah a si lole tlaksiatnak ihsin a lang mei. Curuangah cui thinglamtah hnatuan thuahhnih tello cun ziangtik hmahah thil tuahsuak thei mi a um dah lo. Curuangah thu
suhnak ra suak thei mi cu: Jesuh cu an Lal silo in Rundamtu lawng a si thei pei maw? A dung thlun si loin a rundamnak ka co ngah thei pei maw? A kotka ah lut loin a Lamzin ka zawh thei ding maw? Hi thu pawl hi ruat tha sal hman: Sualnak tuah rero cingin ka thih hnu ih ka fehnak ding vanram lam hoi in lungsi takin misual pa ih thlacam vek khan thla ka cam thei ve maw? Hi tivek ih thusuhnak a tuah awtu pawl cun an thinlung in a thu lehnak an ngaihtuah rero. Thinglamtah kha hoinak hmun hnih a nei. Ruat a tul mi cu: hoi khatte lawng kha cun a cang theilo.Curuangah thinglamtah ih hnatuannak thuahhnih kha a hrekkhat te lawng kan pom a si ahcun thinglamtah thu hi diktak in kan thei ngah hrih lo tinak a si. Jesuh ih thu khal ol ai tukin kan sim ih, olsam zawngih zumlo tu hnen thusim mei, le thlacam mei cu thuthangtha dang , a diklo mi thu simtu kan si. Lamzin umlo Kotka lawng a um a si ding.

[6.91]

Cuvek ciah in milian tlangval pa khal Jesuh hnenah a ra ih hitin thu a sut, kumkhaw nunnak ka ngah theinak dingah ziang ka tuah ding? A ruah mi cu a thih tikih vanram kai ding ringawt lawng a si. Cuvek ciah in Khrihfa tampi hin an ruahnak le phurnak leng ah ziangkim an tuah. Thungai ih kan sim a si ahcun Jesuh ih rel mi thawi kan khaikhin a sile malte lawng a sim ih, "na thih tikah vanram na feh ding" ti in. A sinan nasa tei a rel leh mi cu Pathian ih thulunnak leh leitlun nun lai ihsin rah tampi suah dingin a sim. Rundamnak co duh pa milian tlangval pai hnenah Jesuh cun rundamnak silo in dungthluntu nun a rak zirh sawn. " Jesuh cun a zoh ih, a duhdawt zetih hitin a ti,' tlaksam mi pakhat te na nei lai: va feh awla na thilri pawl va zuar awla mi farah pawl va zem hai aw, cule vanram ah na ro na khawl ding a ti: cule nangmai thinglamtah la in phur awla i ra thlun ding' a ti. A sinan a theih tikah a riahsia lungngai in a kirsal, ziangahtile anih cu milian a siruangah a si. Cutikah Jesuh cun a thluntu pawl a zoh vivo ih,  " milian pawl vanram co ding hi ziangtlukin a harsa!" (Marka 10:21-23). " Ziagtlukin van ram luh a OL" tilo in  "hihi ziangtlukin A HARSA" a ti sawn. Hi thinglamtah hnatuan thuah hnih hi milian hrangih a si vekin mifarah hrang khalah thil harsa mi a si. A dungthlunnak ah hin mi tampi cu riahsia le beidong ih a kirsal mi tampi an um. Ziangahtile thinglamtah ih hnatuan thuah khatnak lawng an pom ruangah a si. Hi milian tlangval pa hin Jesuh kha a ai awhtu dingah a pom ding cu ka zum lo, ziangahtile Jesuh lawng kha thinglamtah parah a thi, kei ih thih tulnak a um lo! ti'n a ruat. Cuvek cu a si thutak dodaltu pawl cu. Thutak kan timi cu thinglamtah ih hnatuan thuah hnih sawn hi a si an pahnih hin kan kai ding maw kan thlah ding, a sinan pakhat lawng thlun ih pakhat tan ding hi cu thil cang thei a si lo.

[6.92]

A thu kan thlunnak ahhin rundamnak hi fiang te'i kan sim lo a si ahcun mi malte lawngin rundamnak an ngah ding. Hi thu ah fiang tei sim ding ka thei. Hi hi Jesuh ih sim mi a si,  "Malte lawng a hmu" (Matt.7:14b).Cuti a sile kannih in teh ziang kan tuah ding? Mai harsatnak thinglamtah pu paih lo, zirhtirnak dik lo pawl maw a silole mah le mah khal hua aw ih Jesuh thlun pawl kha ha thazang kan pek deuh ding? Zianghman puhmawh ding a um nawn lo. Cu ai in mi zohthim tlak nun nei sawn in Lamzin umsun Jesu'i Thihnak kha Nunnak lamzin a si thu maksak kha phuansuah zuam uh si; a Lamzin ah Amah thawn kan feh tlang dingih kan uk tlang ding kan ti ahcun a tuar khal Amah thawn kan tuar tlang ding a si: cucu a theitu lawng men silo in a tuansuak tu si in a thluntu dik si tum sawn uh si. Thudik hi co ngah cio dingah Jesuh in theihpitu ah in pom cio hram seh. Amen.

[6.93]

Adang Dawnkhamtu A Um Lai Hrih
Tu cu veikhat rundam catuan daih timi zirhter awknak ih an hman mi Bible catlang dang pawl leh an sirhsan mi ka rel hrih ding a sinan thate'i cikfel a si ahcun ker ong ih thlak vekin an dokthlongthluh. Hi thu diklo hi na el theh khal le an lar duhnak ruangah an ruahnak an thleng leh sal theu ding. A hleice in: Jesuh kan neih tikah a unau ah kan cangih rundamnak ro cotu Pathian ih insang kan si an ti. Pathian ih insang then si dingah na piang non sal a sile ziangtin saw nan sungkhat awknak a cem thei? Veikhat insang mipum rak si cia hnu kha kumkhaw mi a si thei? Hihi thil dik lo thil sual a si.

[6.94]

Naideuh In Zoh Aw
Pathian in Israel pawl a pehtlaih dan kha Jeremiah 3:8 thu ah zoh aw.

Jeremiah 3:8
8. Ka hnenih a ra kir lo ruangah le hlawhhlang ih a um ruangah Israel cu ka maak ih ka dawihlo khal cu Judah in a hmu theh ko. Sikhalsehla rintlak lo a si ve mi Israel ih unau nu Judah cun tihnak zianghman nei cuanglo in anih khal hlawhhlang a cang ve,

Na di a riam deuhlo a sile Rom 11:20-24 tiang hi siarbet aw.

Rom 11:20-24
20. Cumi cu a hman a si. Annih Judah mi pawl cu an zumlo ruangah tan an si; nannih cun nan zum ruangah hi hmun hi nan luah. A sinan curuangah puarthau in hngal pang hlah uh! A tih in tih sawn uh.

21. A hram thawn a peh aw ih a hnge ngaingai bangtuk a si mi Judah mi pawl hman a zuah lo ahcun, kannih tla cu in zuah ding tiah nan ruat aw maw si?
22. Hi zawn ahhin Pathian cu zangfah lainatnak a nei zet nan a thu a khoh zet thotho ti cu ka hmu a si. A bah a ril mi pawl hnen ahcun a thu a khoh zet, a sinan nannih hnenah cun zangfah lainatnak a nei zet. Cui zangfahnak sungih nan um ringring a si ahcun a lo zangfah ringring ding; a sinan nan um lo ahcun khiah-hlo nan si ve ding.
23. Cule Judah mi pawlin zumlo ih an umnak dinhmun kha an tlansan a si ahcun a hlanih an rak umnak ah khan retsal an si ding, ziangahtile Pathian cun a pehsal thei a si.
24. Nannih Zentail mi pawl cu hramlak ih kho mi oliv kuangih hnge bangtuk nan si ih nannih cu tan tahrat in, a dan a silo na in, cin mi oliv kuang thawn peh cih nan si. Judah mi pawl cu cin mi oliv kuang an si ruangah tan cia mi hnge hman si haisehla a kuang hlun ih pehsal cu Pathian hrangah a ol deuh ngaingai ding.

[6.95]

Pathian in an dinhmun ih zirin A thukam veikhat a thinsal thu kha a hlei in cang kul hluanhnih ih ta kha hminsin aw. Cucu "A thatnak ih nan um vivo a sile" an um duhlo a sile an co ding mi kha ruat tha aw. "Culo cun a lo hlonhlo pang ding." Tong dang ih kan sim a sile ka lo hnong ding tinak a si. Johan khalin a thuthang tha bu sungah a sim ve.

Johan 15:6
6. Zokhal keimai sungih a umlo mi cu sabit hnge an hlon ih a car mi bangtuk a si ding. Cubangtuk hnge pawl cu an khawm ih meisa sungah an hlon ih a kang theh.

[6.96]

Dungthluntu Johan hin sual thu hi phun hnih in a sim. Cu pawl tla cu mi hrangih thlacamsak ding le camsak lo ding thu a si. A neta deuh hi cun thlarau thihnak a khih hmuh, ziangahtile sual sirnak lawng hi cu cohlan tlak thil a si lo. Ziangruangah a si pei? Ziangah tile Pathian (Tharau Thianghlim) kan relsiatnak ruangah a si.

I Johan 5:16-17
16. Na unau pakhat khatin thihpi tlak a silo mi sualnak a tuah na hmuh ahcun Pathian hnenah thla camsak awla Pathian in luatnak a pe ding. Himi cu thihpi tlak a silo mi sualnak a tuahtu pawl hrangah a si. Sikhalsehla thihpi tlak sualnak a um ih cu mi a tuahtu pawl hrang ahcun Pathian hnenah thla camsak uh ka ti lo.
17. Thil tuahsual mi hmuahhmuah hi sualnak a si, sikhalsehla sualnak hmuahhmuah hi thihpi tlak sualnak an si lo.

[6.97]

Rundamnak co hnu ih sualtuah thu Hebrai cabu in in sim. Thlarau Thianghlim co ngah hnu ahcun zohman in kan zumnak thu in sut dah lo. Rundam fa lo cun zohman Pathian sunlawinak tep an um dah lo. Hi thurin thuhla ahhin kan mahte tanfung kan nei cio. Cun khatlam ah rinsan awknak khal in neihter sal, I Jn 1:9.

I Johan 1:9
9. Sikhalsehla Pathian hnenah kan sualnak kan phuan ahcun zumtlak leh a ding mi a si ruangah kan sualnak in ngaidam dingih kan mawhnak hmuahhmuah a thiangfai ter ding.

[6.98]

Khatlam zawng ahcun Hebru cabu ih sim mi thawn kan kalh aw pang thei.

Hebru 10:26-27
26. Thudik kan theihngah hnu ah sualnak kha thei cingin kan tuah vivo thotho a si ahcun sual thianfai theinak hrangah raithawinak zianghman a um nawn lo.
27. An hrangih a tang mi an covo cu a thleng cing ding mi Pathian thuthennak le Pathian a dodaltu pawl a kangfai thehtu ding tihnung za meisa kha tih thlohthloh in an hngak ding lawng a si.

Zumtu dungtolh pawl hi thlahthlam ta sehla an kuai sadarh thluh thei.

[6.99]

Kan Sual Tikah
Kan Khrihfa nunnak ahhin sual kan tuah ringring a sile kan dinhmun ziangvek a si ding ti hi Paul in fiangten a sim leuhleuh.

Rom 7:15-25
15. Thil ka tuah mi hi a tican ka thei theu lo, ziangahtile tuah ka duh mi kha ka tuah lo ih ka duhlo mi sawn kha ka tuah.
16. Tuah ka duhlo mi ka tuah ruangah hin dan cu a hman tin ka lungkim pi ti a lang.
17. Curuangah hiti ih a tuah rero tu ngaingai hi keimah ka si lo: ka sungih a um mi sualnak a si sawn.
18. Minung ka sinak taktak sungah hin zianghman thatnak a um lo ti cu ka thei. Ziangahtile a tha mi tuah duhnak thinlung cu ka sungah um hmansehla a tha mi ka tuah thei hrimhrim lo.
19. A tha mi tuah ka duh mi kha ka tuah lo: a thalo mi ka tuah duhlo mi sawn kha ka tuah a si.
20. Tuah ka duhlo mi ka tuah a si ahcun a sullam cu a tuahtu kha keimah ka silo ih ka sungih a nung mi sualnak a si sawn.
21. Curuangah kan sungih thil a can dan zia hi ka thei-a tha mi tuah ka duh tikah ka hrilsuak mi cu a tha lo hlir a si.
22. Ka sung muril in Pathian ih dan ahcun a lung a awi.
23. Sikhalsehla ka taksa sungah dan dang hna a rak tuan ve tu a um: cui dan cu ka thinlung sungin a tha a ti mi kha a rak dotu dan a si. Cumi cun ka taksa sungih hna a tuan mi sualnak ih dan hnuai ah sal bangin i tanter.
24. Thin nuamlo minung ka va si so! Thihnak lam ih i khortu hi taksa pum ihsi'n zoso i run suak ding?
25. Pathian hnenah thangthatnak um ko seh! Pathian amah in kan Bawipa Jesuh Khrih thawngin i runsuak a si. Ka si ding dan ngaingai cu hitin a si- Keimai bul cun ka thinlung lawngin Pathian dan cu ka thlun; a sinan minung ka sinak taktak cun sualnak dan ka thlun a si.

Ka ruahnak hi thli in a zuanpi ih cui ka sungih um mi cun sual a tuah. Cutikah ka thinlung in Pathian ih lom sal mi si a duh nan lom ih hnekin sual sal ah i tuah sawn.

[6.100]

Kannih hi sual kan tuah vivo a sile cui sualnak cun in opbet ringring ding. Culai ah Jesuh ah kan sualnak kan phuan a sile in ti thianghlim ding (I Jn. 1:9). Hi thu pahnih an danglam awknak hi zirhternak in a si ti kan sim zo. Hebru cabu sungah sual cu kan thlacamnak lengih um a si ti in kan ti zo ih cucun thihnak ah mi a hruailut ti in Johan cakuat pakhatnak ah kan hmu. Kan sim duhmi cu cui sual cun dingfelnak zin kan zawh rero lai ah in rak hnaihnok. An danglam awknak hi na theithiam zo maw? An danglam awknak cu ruahnak le thinlung ih tumtahnak theitu cu Thlarau Thianghlim a si: cucu thutak, Thlarau Thianghlim Pathian ih thutak puangsuaktu kha a si.

Hebru 4:12
12. Pathian ih thu cu a nungih a cak fawn. Kap hnih ih a hriam mi ralnam hnakin a hriam sawn. Nunnak le thlarau an ton awknak leh hlikhlok leh thlik an peh awknak tiang tlang ko in a sun thlek thei a si. Milai thinlung ih duhnak le ruahnak tla a thei thluh a si.

[6.101]

Thinlung cun Pathian rian duhnak nei theu hmansehla cahlonak ih kan tluk sal lok tikah a hmaisa ih Johan sim mi dinhmun ah kan tang a si. A sinan thutak kan theihngah hnu, Khrih hmangih theh zo mi rundamnak thukam sungah um zo si in kan thinlung duh mi hi kanmai duhzawng le cakhiar diriam zawng sualtuah mei ding lawng a si ahcun Jesui thisen ih theh zo mi thukamnak cu kan hrangah thathnemnak umlo ah kan canter a si. Cuti kan um vivo a sile Pathian thukam cia mi a hnatuan ding hi kan thlahdah vivo ding. Hitivek dinhmun ah kan hlohral zik tikah Pathian cun in thei leh theu.

Hebru 10:31
31. A nung mi Pathian kutsung ih tlak cu tuksum za a si.

[6.102]

Hi tivek Khrihfa pawl hi cun Pathian an dokalh ti hi kan pom hrimhrim ding a si ih cu pawl cun A hremnak khal an tong hai.

Hebru 6:4-6
4. Zumnak a tlansantu pawl cu ziangtin so sualsir awknak ah an kirsal thei nawn ding? Annih cu Pathian tleunak sungih a um dah mi an rak si; vancung laksawng a teptu an si ih Thlarau Thianghlim a cotu khal an rak si.
5. Pathian tongkam a thawt zia a thei ngahtu an siih a ra thleng ding mi san ih huham khal a teptu leh a thei ngahtu an si.
6. Cu cingin an zumnak cu an tlansan a sil! Cumi pawl sualsir awknak ih kir tersal ding cu a cang thei hrimhrim lo mi a si; ziangahtile Pathian Fapa kha thinglamtah parah an khenbet salih mi senpi hmai ah ningzak mualpho in an tuahsal a si.

[6.103]                                                        

Hi tivek dinhmun thu hi kan ngaihtuah hnik kei uh. Mi pakhat pa hin a inn saktu dingah tuanvo latu a ko. Ziangzat na rei ding ti ah a sut. Cule tuanvo latu (contractor) pa cun a theh tiangah cun zarh hlei ruk hrawng cu kan rei ko ding ti ah a ti. Cutikah inn neitu pa cun zarh hleiruk hrawngih theh thluh ih thawn thei dingin a inn sak cu a fial hai. Cutikah an ni tiamkam vekih an theh theilo a sile a thilri pawl kha thilri retnak khan ah a zaten a ret hnu ah an insang khal hotel ah buai celcel in an thawn aw dingih a hotel man, a thilri ret man, a thawn awknak man pawl kha a hlei in a pek a tul ding. Curuangah hi tivek ih buainak tong lo dingah tuanvo latu pa le a inn saktu pawl thawn lungkimnak nemhngehca a tuah ter hai. Cule zarh hleiruk a rung kim hnu khalah a inn cu sak theh theilo in an um ih a cembet tul mi sumpai hmuahhmuah cu a kuan ter thluh hai. Thimnakah, inn saktu cun a damlo, sizung um vek thawn an can khiah mi ah a theh theilo, tuanvo latupa cun ziangti'n a ruat a va si hmanah  inn neitu pa in a duh le malte lawng a pe ter thei, a mai thuthu a si. Hi mi ah innsak tuanvo latu pai dinhmun cu inn neitu pai rel dandan ah a thum aw a si. Mal te khal a pe thei cu lole an pahnih karlak ih thuhla hmuahhmuah a ngaidam thei.

[6.104]

Inn neitu pa hin an tikcu can tiamkam awk mi hlanih a hna cu theh thei dingin tuanvo latu pa cu a fial ruangah zamrang tei a theh thluh a tul a si. An pahnih hrangah a tha thei ding bikin an tuan. Tuanvo latu pa hin a hnialkalh pang a si ahcun a sumpai ngah ding hmuahhmuah cu a inn neitu pai kutah a um lai. Curuangah inn neitu pa cun a duhduh in a sumpai cu a zem thei a si lo le an bak awk mi hmuahhmuah khal a ngaidam thluh thei. Ziangahtile neitu pa a si ruangah a si. Tuanvo latu pa hin a tuan ding mi hna parah ziangtik hmanah rinsannak a nei thei lo. Cuvek ciah in a si kan Khrihfa nun khalah mai duhthu ruangih Pathian thukamnak a pahbal tu cun dinhmun zianghman a nei thei nawn lo, covo khal a nei thei nawnlo ih a nuntu khawsak nak ding hrang khal a caan thluh, kamcia mi cu.

II Piter 2:20-21
20. Kan Bawipa le in Runtu Jesuh Khrih pumpak in an theihnak raungah hi leilung borhhlawh sualnak sung ihsin an luat ih cuti ih an luat ngah hnu ah cui sualnakin a thlem ih a kaihtar ngah sal ahcun a hmasa hnakin a neta deuh cu a bese sinsin a si.
21. Dingnak lamzin an theih ngah hnu ah le thukam thianghlim an hnenih pek a si hnu ih an pialsan hnak cun zianghman theilo lawlaw in rak um hai sehla an hrangah a tha sawn.

[6.105]

Theicing rori ih sual kan tuah a sile Pathian ih thisen thuthlung cu  amai hmaika ah kan hmang thei nawn lo ding: himnak dang zianghman kan nei nawn lo. Pathianih Fapa neihsun cu thinglamtah parah kan kheng nawnsal tinak a si. A Fapa kha langhngan in ningzak le mualphoh kan tum tinak a si. Pathian fa ka si ticing in amai ral pawl mithmuh ah sualnak kan tuah hrim a si ahcun, Kan covo ding dinhmun cu Amai kut sung lawngah a um a si: kan dinhmun himnak ding hrang thuthlung a um nawnlo.

[6.106]

Pathian Thlarau In In Ko Lai a Si Ahcun
Pathian Thlarau in a dungthlun ding le a thu thlun dingah in ko lai a si ahcun ruahsannak a um lai tinak a si: Pathian ihsin khal a si cuang lo. Theicing sual timi hi kan sual mi thinlung in a thei timen a silo cangsuak an kan thinlung ih mizia ( lungput) sawn a si. Sualnak ih kan tluk pang can khalah ziang kan tuah timi cu kan thei ringring ko. Thusim ngailo fa nan hmu dah maw-a nu le pa ih thu sim mi cu a thei nan hmaiton in a zoh keukeu men ih a thlun duh cuanglo? Hihi theicing in luhlulnak ruangih thu lunlonak sual a si.  Zupi palang sin na on kha kutzung na neih men ruangah  na ong a silo, na nui mitsen remrem hmu cingin na thinlung a lo khuar ngah zo ruangah na ong thotho a si kha. Cuvekin Khrihfa pitling zet zo hrek khat pawl khal sual hi thei cingih tuah an tampi. Curuangah ngaidam theih mi sual le thlarau thihnak tiang mi hruaitu sual ti mi kan thliardang thei thlang. Hi ti hin sim sehla, Khrifa fala pakhat cu a tontaih lai ahcun an duatzet a sinan midang ahcun langhngan in lamzin ah a taksa a zuar aw.

[6.107]

Pathian ih zangfahnak laksawng cozo hnu khal ih Amah lo ih nung tu pawl bangin, i hnong pang ding ti na phang tuk lai a si ahcun Amah thawn nan pehtlaih awknak siat zo mi hrangah ruahsan nak a um lai tinak a si. Pathian lainatnak hman thleng hrihlo in A thukamnak na lan pang maw ti na theihfiang a tul. Amai  hnenah a lo hruai ih nan nunnak ah a kawhnak na thei lai a si ahcun a fa na si lai, hi bungcang pawl hin thazang rak la hrih aw.

Johan 6:44
44. I thlahtu pa in ka hnenin a kuat lo ahcun zohman ka hnenah an ra theilo ding; cuti ih ka hnenih a ra mi cu ni neta bik ah nunnak ah ka thoter sal ding.

[6.108]

Tlu Zo Hrekkhat Pawl
Thuthlung Hlun ih siangpahrang Saul kha tulai san ah si sehla cu leitlun thilah cun mi hlawhtling tak pa a si ding. A taksa pumruang a mawi ih tlunah mi tlunin thu neitu sangbik a si. Ral a thiam ih a thinlung a fim fawn. Israel siangpahrang a hung si hnu tla cun a hmin a thangih milian takaha hung cang, a sinan hiti dinhmun a si ruangah Pathian thutak a rak dokalh. Hi hi thil harsa zet a si ko nan Saul cun a rak tuah ta riai. Hi ti dinhmun ihsin Pathian hnenin a pial ih dawithiam hnen a pan. Pathian hmai ah thil zianghman silo mi ruat in a khawsa. A hlawh mi le a neih mi hmuahhmuah a sun thluh ih tlunah Pathian ral in a thi (I Sam.28:1-18). Pathian in a ral pawl kha ro a coter ih ram a luah ter mei tla hi theihthiam har za a si. Thuthlung Hlun thuanthu ah Pathian thei zo si A ral ih thi mi a um: curuangah Saul cu veikhat rundam catuan daih timi cu a silo. Thuthlung Thar khalah zohthim ding kan hmu ve: Dar sertu Alexander ih thuhla ah khan.

[6.109]

Paul ih piantharnak thu khalin kan hmu thei, anih hi kawhhran hringhro ih rak dodal rero tu a sinan a thlengawk hnu ahcun kawhhran sungih misual a kawktu, nunsimtu le dawntu ah a rung cang, a hnuai ah hin zoh aw.

I Timote 1:19-20
19. Thinlung thiang nei in na zumnak fekter aw. Mihrek cun a tha le a sia thleidan thiamnak thinlung an hman duh lo ruangah an zumnak an siatter theu.
20. Cubangtuk in mi lakah Himanias leh Alexander tla an telih an pahnih in ka hremih Satan kut sungah ka thlen ter. Hi bangtukih ka tuahnak cu Pathian an simsiatnak reh seh tinak ah a si.

II Timote 4:14
14. Dar sertu Alexander in harsatnak tumpi i pek. Bawpa in a tuahnak vekin a rul leh ko ding.

[6.110]

Pathian in Dungthluntu pawl kha huham hleice a pe ti mi leh kannih khal minung kan si vekin misual, thuthennak co tlak kan si ti kan theih ahcun hitawk ih Dungthluntu'i a kawk leh nun a sim mi tivek hi a Lalram uknak sung ahcun kan hmu lo ding  ti khal kan thei a si. A sile Pathian hmai ah tuannak ruangih dingfel thei an um dah maw? Dar sertu Alexander kha run mi member sungih siartelh a rak si dah nan, cuvek in Saul khal a net tiangih tang thei lotu a si. Minung a si ve mi Dungthlun pawl lawng huham hleice co ih an duh le mi sualnak thlah sak, duh lole thlahsak lo hi a si maw. Cuti a sile Alexander ih covo kha teh ziangtin na ruat.

Johan 20:23
23. Mi an sualnak nan ngaidam ahcun ngaidam nan si ding; nan ngaidam lo a si ahcun ngaidam lo nan si ding, ti ah a ti.

[6.111]

Nangteh Ziangtin?
kannih khal Pathian ih tiamkam mi pawl ngah tu ding kan si ahcun ziangvek dinhmun khal hi kan thlun thluh a tul. Pathian simmi pawl a hnuai ih catlang pawl ahhin zoh aw.

Kolose 1:21-23
21. Hlanah cun thil thalo nan tuah ruangah le nan ruah ruangah Pathian thawn nan rak hlat aw ih a ral nan rak si.
22. Sikhalsehla a tu ahcun, a Fapa taksa pum rori in thihnak a tuarnak thawngin Pathianin a rualpi ah a lo tuah. Cuti ih remnak a tuahnak cu a hmaika ah mi thianghlim, mawh nei lo le soiselnak neilo in thlenter a lo duh ruangah a si.
23. Cuti a si ruangah nan hram tohnak a hnget mi parah khan fek zetin zumnak thawn dinguh; Thuthang Tha nan theihnak ihsin nan congah mi ruahsannak thawn zohman in lo then hlah hai seh. Hi Thuthang Tha hrangah keimah Paul hi hnatuantu ka si ih, leilungtlun khua zakip ih mi hmuahhmuah hnen ih sim mi Thuthang Tha a si.

[6.112]

Voikhat ten Pathian ih thukham kha ruat tha sal aw cucu Thu in phuansuah a si, thimnak ah- "a sile" ti in. "Zumnak ah a um kumtluan a sile….. hi si hin thawn nawn aw hlah." Saul, Demas leh Alexander pawl cu an thawn ta riai. Kan thawn pang lonak dingin thlacam cio uh si. Kanmai duhhrilnak men hi cun thawn hlah uh si. Jesuh Khrih cun ziangtik hmanah thulunglo ih kan um ding hi in duh lo. Amai tleunak lamzin ih kan um ringring lawngah veikhat rundam catuan daih hi kan hrangah a si ve ding. 
      
[6.113]

Netabik Thucah
Kawhhran cun thurin pawl hi a phunphun ih then ding mi a rak hril thluh, a sinan tulai ahcun a cang theilo a netnak ahcun " Catuan Daih " ti mi ah an tawp. Buainak hi Pathian hnenin a ra lo (I Kor.14:33), u le nau thenthek awknak khal hi Pathian hnen in a si lo(I Kor.1:10). Tulai ah mi tampi in hi zumnak hi an pom thluh thlangih tu cun kan do in kan tlansan a cu ve thlang. Hi pawl in Pathian kha phaw ah an songih rinhlelhnak in an khat ih a netnak ah A thu khal an zum thei nawn lo. Curuangah kannih khal Pathian hnen in a si maw silo ti kha thei dingah thlarau bomnak khal taimak suah in dil le cikfel ding kan si. (I Johan 4:1) a sinan kan zumnak cu minung ah silo in Pathian ah a si (I Kor.4:6), Pathian in a ti ti ai ah: " Pathian hi dik sehla, minung in thuphan kan per hman ah" (Rom 3:4) kan ti sawn ding. Ziangruangah hngalnak ruangih cuvek thurin diklo dangdang cu kan hril theu?

[6.114]

Pathian ih zangfahnak hi a thleng aw dahlo, a laksawng khal a la kirsal lo cumi cu zumtu tin in zumnak in kan co ding mi rundamnak laksawng a si. (Rom 5:2). Zumnak hi khatlam zawngah a thangih tumzet ah a cang (Matt.8:10), a sinan khatlam zawngah cun a te vivo ih a tumsuk deuhdeuh (Matt. 8:26). Cui zumnak cu Pathian thu ah kan um ih kan nunpi tikah a thanglian ih, leitlun thil thu ngaihtuah ih kan um tikah a tenau vivo ve a si. Bawipai hrangih kan tuah mi thil tampi khal hi kan zumnak ti famkim tu men an si. ( Matt.9:29). tihnak kan neih can ah khin kan zumnak hi a tumsuk theu tla a bang (Lk.8:25) can a um. A thansoh sawn can khal a um thotho (Lk.17:6-7) a sinan cuai in a tlural thei nawn lo (Lk.22:32).

[6.115]

Kannih cu rinnak ih thianhlim ter mi kan si (Dung. 26:18), dingfel ter mi le Pathian zangfahnak kha zumnak ih a cotu kan si ( Rom 5:2). Cui zumnak cu kan hrial thei mi a si, a si lole cumi in hremhmun ah in fehter thei (I Tim.5:12). A sinan Pathian zangfahnak a thlengaw dahlo, kan zumnak sawn hi a thleng aw thei.

[6.116]

Kannih cu zumnak in kan feh (II Kor.5:7) kan ti tikah zumnak ih hngehdan kan zir a tul (II Kor.1:24). Curuangah biakinn feh tikah Pathian hnenah dil awla a sannak diktak a lo theihter sal ding. A si ko! Mi tampi in kan zumnak kha an pom hai nan an rak bum aw theu. Kan zumnak hi tlansan theih thil a si (II Tim.2:18). Hi tin kan ti, " kei silo in ka zumnak hi a tak a si," a sinan ziang ha kan thei tul mi cu? Duhdawtnak, thulunnak lole zumnak pawl hi an cangvaihnak (rah) tello cun thi an si thluh, thimnak ah tuahnak tel lo zumnak cu a thih bangin (Jeim 2:26).

[6.117]

Tuitum ih kan zir mi " Kumkhaw daih Kilhimnak" hi mi hrekkhat cun an an ruahnak le thinlung ih theihban lo thil in an ruat ih a pom an tum lo lawlaw. Sualsir ih lungthleng mei tumlo in, Pathian  Thu hi anmai duhdan ih merhkawi an tum ih cumi cun anmah siatsuahnak a thlenter(II Peter3:16). Pathian Thu hi theihthiam har tak thil a si, curuangah in hruaitu cu Thlarau Thianghlim si ringring hramseh, anih cu thutak ah in hruaitu a si ih a thu kan thlun ahcun kan tulmi hmuahhmuah in in zirh ding. Mihrek cun Pathian thu hi a duhsan mi silo zawng in an fehpi ciamco theu. A thu ngai ding cu an paih lem lo. Pathian cun a duhsan mi a rel ih, a rel mi cu a duhsan mi a si fawn. Pathian ih phuansuah awknak dong vek ah an ruat aw ih, Pathian Thu hi a tlar karlak khal siar thluh ding a si an ti. Cuti an tuah ruangah a Pathian Thu cu an hnawl rero a si.

[6.118]

U le nau pawl netabik thuruah ding ka lo tan ta duh, rosiah thurin pawl kha cu hrial in A hnatuan a zahpi lo tu le Pathian thudik Thuthang tha cu dik zet ih a simfiang tu si dingah Pathian lungkimnak ngah dingin zuam aw, ziangahtile nang cu Pathian Thuthang tha dikzet ih thliardang thei dingah Thlarau bomnak na ngah zo.

[6.119]

"Voikhat rundam catuan daih," timi zum thotho lai tu pawl hrangah ruah ding pakhat leh cu, Khrihfa pakhatkhat in thuphuan sungih um cia mi a bettu le la hlotu pawl kha ziang an cang ding?

Thuphuan 22:18-19
18. Keimah Johan in hi ca uk sungih ngan mi profet tongkam a theitu hmuahhmauh hnenah ralrinnak ka lo pek; profet tongkam tlunah zo khal thudang a bettu cu Pathian in a parah hi ca uk sungih ngan mi natsia hremnak kha a bet ve ding.
19. Cule zokhal hi ca uk sungih profet tongkam ngan mi hi kimten phuang lo in a phiat hlotu cu hi ca uk sungih ngan cia mi a co ding mi nunnak thingrah le Khawpi Thianghlim sungih luh theinak a co ding mi kha Pathian in a phiah hloh sak ve ding.

[6.120]

Ziangtin so mi pakhat ih hmin kha nunnak ca bu (lole thingkung) ihsin a rak um dahlo mi cu, an phiatsak thei ding? Nitin rundamnak hnatuan le tleunak sungih feh in khuitawk ah ka um, zo ta ka si ti na theifiang maw? Thuthlung dan hnuai ih a tuahsak zo mi thukam pawl cu a thluntu pawl hnen ah a pe ding a si. Annih cun "Pathian ih Thuthlung Kilhimnak," ti mi cu an congah zo.

 <Bung Hmaisa I A Sung Um Thu I Bung Neta>