DUHDAWTNAK LE KHRIH IH RUANGPUM

Hminsin:  Cangantui dinhmun theifiang dingin, “ Casiartu Hnenah” timi thu hi siar hmaisa aw.

[11.1]

Ruangpum Cangvaihnak
Kannih minung pawl hi mangbangza zetih tuah mi kan si. Nunnak ih a kilkhawi mi rungpum hin hna phun dangdang a tuan tu taksapeng tampi a nei. Taksapeng tin, hmuh theih siseh hmuh theih lo siseh, thu a petu cu ruangpum pi ih a thupit biknak hmun cu lu hi a si. Lu hi an pehtlaihawknak hmunpi a si: tong ding mi ruatsuaktu khal a si. Lu hin a harhdam mi taksapengpawl hmuahhmuah hi sunglam in awsuah loin thu a pe hai ih, cupawl hmuahhmuah cu lengah hmuh theih in an lang a si.

[11.2]

Sersiamtu in minung ruangpum hi A kohhran, A thlarau ruangpum, tahthimnak ih a hman hi mangbang ding a um maw? Kannih Khrihfa pawl hi kawhhran tiih kawh mi pumkhawm aw miburpi ih taksapeng pawl kan si (Heb. 10:25). "Kawhhran" ti mi hmin hin hmun khat te ih a um mi mi burpi lawng khihhmuh loin, hmun dang ta khal a khihhmuh thei. Bible ih sim vekin kohhran ti mi hmin hin khawte pakhat a si lole khawpi pakhat ih a um mi miburpi zaten a khihhmuh a si. A netabik ah, khawvel pum huap in kan ti a sile, leitlun ih a um mi, tlen mi hmuahhmuah, Bawipai ratnak ding a hngaktu hmuahhmuah a khihhmuh a si.

[11.3]

A fuhzet mi ruangpi tahthimnak hin hmuhsuah leh ding mi thudik thuthup pawl a phur a si. Cui thutak pawl hmuhsuak ih nunpi tu ding, Thlarau Thianghlim ih kaihhruai mi cun a thupi zet mi hi tahthimnak ih sim mipawl hi a hmu thei a si. Cuiruangah a si, kawhhran hi minung ruangpum vekih tarlang a sinak. Ziangruangah tile, kawhhran ih mangbangza a hnatuan, a pianhmang, a thanlen dan, le a tumtah mi pawl cu hi tahthimnak maksak hin famkim zetin a tarlang thluh a si. Kawhhran ih cangvaihnak pawl cu hi tahthimnak tel lo hin theihthiam theih a si lo.

[11.4]

Hi tarlang mi, el theih lo thudik cu Bible cang, a hleice in Korin kuat khat, bung hlei hnih, Efesa bung li, cang hlei hnih ihsin hlei ruk tiang, le Kolose bung khat, cang hlei riat, Khrih cu A ruangpum, kawhhran ih lu a si thu tarlangnak pawl hin nasa zetin a dik zia an fiangter a si. Kannih khal hmunkhat ih um miburpi ih taksapeng tin kan si vekin hi ruangpum ih taksapeng pawl kan si. Bible sung ahcun, kawhhran tiih siar theih mi, a fate bik mibur cu innsang pakhat, a si lole thenkhat ih ruahdan vekin innhnen kiangkap thawi pumkhawm aw hi a si (Rom. 16:5). Mipum pahnih lole pathum te lawng a um mi, kawhhran hmuahhmuah ih te bik hi khawte pum hlum a si lole khawpi pumhlum huap kawhhran pi ih tel ve a si, Efesa kawhhran bangin. Hi hman hin kan ruangpum pi a huap thluh hrih lo lai, ziangahtile khawte tin a si lole khawpi tin khal hi Khrih ruangpi ih taksapeng cio an si. Cuti a sile, ziangtin hihi ruangpum pi bangin kan suangtuah thei ding? Innhnen pumkhawm awknak cu kutzung ah kan ruat thei ih, khawte a si lole khawpi cu kutzung thawi a peh aw mi ngel ah kan ruat thei a si. Cun cui kutzung le kut cu ban thawn an pehzom aw ih a famkim mi ah a cang, Thukham Thar sungih tarlang mi Galati ram bangin kan hmu thei a si. Cutin a famkim mi ruangpi pakhat si dingin taksapeng pawl cu pakhat le pakhat an pehzom aw thluh a si.

[11.5]

Khrihfa tin ih kan tlun ding mi cui thlarau lam danpawl cu khawpi asilole ramthen ih kohhran mibur tin hrang khalah a tangkai a si. Cuiruang ahcun I Korin. bung 12 le Efesa 2:12-16 sungih zirhter mi dan le dun pawl hi kannih in tangkai zetin kan hmang ding a si. Thenkhat a si lole taksapeng pakhat in a dang pakhat hnenah, "Nang ka lo tul lo" a ti thei lo, cuti locun mai lennak hi mai hrangah tawk em em, lenglam bawmnak tul lo ih a ngai aw mi, Laodicea mi pawl vek kan si pang ding a si (Thuphuan 3:17). Khrih ruangpi ih taksapeng diktak pawl cu ruangpi ih a dang taksapeng pawl thawn rem cetci'n an pehtlai aw thluh a si. Taksa pumkhat ih taksapeng pawl si cingin, pakhat le pakhat kan cohlanawk lo a sile, ziangtin saw nunnak kan neih thei ding?

[11.6]

Bulpak pakhat a si lole miburpi in kan rel khal a sile, kan zaten Khrih ruangpi ih a pehzom aw ton mi taksapeng pawl kan si. Pehzom aw ti cu ziang a si? Mi pahnih lole cu hnakih tam umkhawm hi a si. An ra finkhawm aw ih lungrual tei an umkhawmnak hmun hi a si. Hi pehzom awknak in bulpak mai thuthu ih um si sawn loin thuawihnak sang sawn le cangvaihnak ah zalennak sang sawn pek a si thu a langter a si. Hi a ra finkhawm aw mi, hi pehzom awknak hin pakhat le pakhat kan tlaksamnak ah bawm aw ton ding, thlarau thilpek a dangdang kan co vekin pakhat le pakhat zawi aw ding, upat aw ding le lawm aw ton ding tla in forh a si. Pakhat le pakhat kan tlaksamnak phuhhruk aw ton in, Thlarau thilpek kan co mi kan  hlawm awknak in, ruangpi ih lu a si mi, Jesuh Khrih ih thu kan awih zia kan langter a si.

[11.7]

Kawhhran cu thlarau inn a si ih, taksapum cu tisa inn a si (1 Pit. 2:5). Pathian in hi kan hmuh thei mi, kan tham thei mi le kan theihthiam thei mi tisa pum ruangpi hi tahthimnak ah a hmang a si; tisa ih um lai kan si vekin, thlarau dar thlalang ih a lang mi kan sinak cu theihthiam a har zet. Curuangah hi hmuhtheih ruangpi hmangin, Pathian in A thlarau inn a si mi, kawhhran ih mizia le cangvaihnak pawl cu fiang zetin kan hnenah a tarlang a si. A si, Pathian in minung hi suahkeknak in thihri zomkhawm aw ih a din mi lawng silo in minung rungpi hi A kawhhran langfiangter tu ding thlarau inn ruangpi khalah a hmang a si. Cuiruangah Sam cangantu, David in maksak zet le mangbangza zetih sersiam a si thu a rel hi mangbang ding a um lo a si.

[11.8]

Ruangpi Ih Thuneihnak Le Nunnak
Ruangpi ih taksapeng hmuahhmuah, mit ihsin kezungpi tiang, lung le thin, thinlung ihsin kaiza thapi tiang, lu ih thuneihnak ihsin a cangvai mi an si. Taksapeng hmuahhmuah, hmuh theih siseh, hmuh theih lo siseh, an zaten an cangvaih dan kilkhawitu le cawmdawltu cu lu a si. Taksa peng tin, a tum siseh, a te siseh, an zaten lu ih thupek cohlang in le thlun in an cangvai cio a si. Cui thudik cu thlarau ruangpi, cucu kawhhran a si, khalah a dik thotho a si; zumtu tin in Khrih hnenah tuanvo kan nei ih zumtu tin ih nunnak cu Khrih hnen ihsin suak a si fawn. Ralkap burpi ahcun, a sangsang ten tuanvo an nei, ralkap in ralbawi hnenah, cun ralbawi in ralbawi uktu hnenah tiin a sangsang ten thuhla an theihter aw. A sinan ruangpi ahcun cucu a dik lo a si. Ruangpi ahcun taksapeng tin in lu hnenah thuhla an theihter hngal a si. A dik mi cu, nunnak cu zumtu pakhat ihsin pakhat hnenah a pe aw sawng vivo a si. Minung zo hnen khalah nunnak ti nung a luan lo a si ahcun cupa cu a siatral ding a si. Kan nunnak thisen cu thlarau lam ih kan sungkua a si mi, kanmah thawi a nai aw bik mi zumtu pawl hnen ihsin kan co a si ti hi kan theihhngilh lo a tul. Curuang ahcun, nunnak cu Khrihfa pakhat le pakhat hnen ihsin, kawhhran pakhat le pakhat hnen ihsin kan co, a sinan kan thuneihnak cu kan lu a si mi, Jesuh Khrih hnen ihsin a ra mi a si.

[11.9]

Kutzung cun a cangvainak dingah ngel hnen ihsin thupek a ngah a si lo, lu hnen ihsin a ngah sawn a si, cucu ngel a si lole ban tivek hrang khalah a dik mi a si. Sikhalsehla ngel zikih kutzung cun a nunnak ding hrang ahcun ngel parah a thum aw a si. Hi kutzung ih nunnak (thisen) cu kutzung le ngel karlak in kan hmehpit a sile, kutzung cu a thi ding. Cutivek thotho in, Khrih ih ruangpi a si mi, kannih khal thlarau nunnak neih peh vivo kan duh a si ahcun lu ih thuneihnak hnuaiah pakhat le pakhat pehzom awin kan um a tul a si.

[11.10]

Nunnak tiluang a cak lo a sile taksapeng pawl an tawntai dingih a luang cak a sile thazang le huham tam sinsin nei dingin kan ticak tinak a si. Thlarau ruangpum, kawhhran ih hardamnak le cahnak huham cu Pathian (Lu) thu a thlunnak le u le nau ih kan ruah mi zumtu pawl thawi rualrem awknak ah a thum aw a si. Hi Bible cang pawl hi na ngaihtuah dingah ka lo duhsak a si; Rom. 12:3-21, 1 Kor. 1:10-13, Efesa 4:12-16, Philipi 2:1-4. Hi Bible cang pawl na siar theh tikah, Korin kuat khat bung 12 le Johan kuat khat pumpi hi hrelh loin
siar aw, zumtu pawl lakih rualremnak hi lu hrang ahcun a thupi ngaingai a si. Taksapeng pawl an pehzom awk lo a si ahcun, ruangpum pi cu hna a tuan thei taktak lo a si. Satan in Cain cu kei hi ka naupa kiltu ka si lo ti dingin a sawhneh a si. Cui thudiklo sungah lut pang hlah uh si.

[11.11]

Mahte Todelhawk Le Somdawl awknak
Tui kum, ka fanu ih suah ni lawmman dingah thuhla khumnak cette (palm pilot) ka lei sak. Computer lamah thiamnak neilo le a hnatuan dan thei tam lo ka si ko nan, ka fanu hrang ahcun cui cette, mahte tha ih nung thei le thuhla khumnak cette cu a tangkai zet ding ti ka thei. Cui cette cu amah ten a famkim ko nan, computer ah pehzom tahratin cui cette sungih thu le hla pawl cu computer sung khalah tleng theih a si. A pakpak ten ruat hnik, mahte lawngih famkim mi khal hi a hmangtu in hnatuan ropi sawn a tuan theinak dingah ruat in tuah a rak si. Hi cekci hi Pathian in A kawhhran hrangih a tumtah mi cu a si lo maw? Kannih khal pawlkom fate, mahte nuam aw tawk inn hnen thawi inn pakhat ih pawlkom awknak a nei mi kan si, cucu khawpi lole khawte kawhhran ticaktu dingah ruat kan si, cu tivek thotho in annih khal ramthen le khawvel pum huap kawhhran tiih kawh mi Pathian ih sungkua thawn pehzom aw in, Pathian ih tumtah mi sang bik tuansuak ding kan si. Curuangah mahte cawm aw thei, tidam aw thei, le kilkhawi aw thei a si lole harsatnak le kiang le kap ih thilcang mi pawl tuar thei dingih tuah mi hi minung ruangpi vek thotho in zalen tak le mah le mah todelh aw ih hnatuan dingah kawhhran khal hi tuah that a si.

[11.12]

Tlaksam Mi Neilo

Dungthluntu Paul in hitin a ngan, "ei ding le hruh ding kan neih mi ahhin kan lung a kim ding a si" (I Tim. 6:8). Hi thu thawn pehpar awin Thufim, bung sawm thum, cang riat le cang kua, ah ruahnak thazet kan hmu thei a si.

Thufim 30:8-9
8 Thulolak le thuphan pernak pawl hi ka hnen ihsin hlatpi ah thawn hram aw: farahnak siseh lennak siseh i pe hram hlah; ka hrangih awm tawk rawl in i cawm aw:
9 Cuti locun ka puartlai dingih nangmah lo hnong tahrat in, zo saw BAWIPA cu? ka ti pang ding, a si lole ka farah dingih mi thil ru in, ka Pathian hmin zianghman lo ah ka can pang ding.

[11.13]

Hi thu kan theihfiang a si ahcun, ziangvek kawhhran khal hin ruangpi bangin mahte tohdelh awin hna a tuan ding hi Pathian ih tumtah mi a si ti kan theifiang ding. Minung ruangpum cun a tam sawn ahcun a tuldan ih zirin lenglam bomnak in a somdawl aw thei ih, kawhhran khal a tawn mi thuhla buai pawl hi sunglam ih Thlarau Thianghlim ih bomnakin pahtlang thluh dingih ruat mi a si, ti a langfiang. Mi pakhat in a sibawipa a va ton ringring a si ahcun cupa cu mi harhdam a si thei lo ih, kawhhran khal lenglam bomnak a tul ringring a si ahcun a harhdam mi kawhhran a si thei lo. Kawhhran pakhat ih nuhmei leh nu le pa neilo in a lenglam ih bomnak an tul ringring a si ahcun, cui kawhhran ih zumtu pawl in an tuanvo, pakhat le pakhat ngaihsak awk ding hi an thelh a si ti a fiang. Ram pumhlum ih harsatnak a si lole mahte rung thleng harsatnak pawl thu ahcun lenglam bomnak hi dil ding hrimhrim a si ko, a sinan ziangvek pawlkom awknak sung khalah farahnak, natnak le thih le hloh ti pawl hi cu thleng ding hrimhrim ah ruatin, pawlkom tin in cu tivek harsatnak pawl tifel thei dingin a timlam aw ding a si. Hi thu ahhin lenglam ih thlacam bomnak a tul lo tinak cu a si lo. Pathian ih sungkua kan si vekin ziangtik lai khalah thlacamnak cu unau dang pawl hnenah kan dil theiih dil ding awm khal a si.

[11.14]

Nungphung Dangdang
Kawhhran cu ram lian le milian umkhawm lak lawngah a thanglian ding ti a si lo, ziangvek ram, ziangvek nungphung, ziangvek mi lak khalah thanglian in pitling vivo ding a si sawn. Kohhran in inn le lo, paisa a si lole thil le ri a tul lo. A tul mi cu rinnak le taksa pumkhat vekih hnatuan duhnak thinlung lawng a si. Mi farah khawte ah kawhhran a nun theinak dingah ziang a tul? A tul mi cu rawl le hnipuan a si. Ram lian le a thangso mi khawpi ah teh kawhhran a nun theinak dingah ziang a tul? A tul mi cu rawl le hnipuan thotho a si. Milian siseh, mi farah siseh, mi nauta siseh, mi upa siseh, kan duh mi cu bangaw lo celcel an si nan, a thupi bik le a tlangpi ih kan tul mi cu a bang aw thotho a si. Duh mi thu ah hin kan ralrin a tul.

Saam 106:13-15
13 Annih in a tuahmi pawl an hngilh lohli; a thuronnak khal an hngak lo:
14 Ramthing ah nasazet in an cakhiar sawn ih, nelrawn ah Pathian an hniksak a si.
15 Cun anih in an dil mi cu a pe hai; a sinan an nunnak ah tumtawlnak a thlenter.

[11.15]

Pathian ih kawhnak in a pumkhawm aw mi kan si vekin, zumtu kanmah lakah lo theih lo ih nunnak ih kan tul mi, thuthimnak ah rawl, hnipuan, beunak inn leh si le vai tivek bomawknak hi, kan Bawipa in Samaria mi tha thuthimnak ih in zirh bangin (Lk. 10:25-37), tuah dingin kan timlam aw hrimhrim ding a si. Pursum leilawnnak tlaksiatnak ruangah siseh, ral ruangah siseh a mah te thleng harsatnak pi ruangah siseh, cu tivek bomnak tuah ding hi kanmah lawng ih ti pitlin thei lo can khal a um mei thei. Hi tivek caan ahhin, Jerusalem ih hremnak a rak thlen laiih an rak tuah vekin, lenglam bomnak khal a tul mei thei. Lenglam bomnak ka ti tikah, ka sim duh mi cu mai kawhhran pakhat a si lole pumkhawawknak lenglam ih Pathian sungkua tum sawn hnen ihsi bomnak khi a si. Hi tivek thu le hla ahhin, khawvel pumhlum ih um kan u le nau pawl in siang zetin Thlarau Thianghlim ih a tur dan ih zirin bomnak an pe thei, hlanlai kawhhran in bomnak Jerusalem kawhhran an rak pek bang khan.

I Korin 16:1-2
1 Tu ah mithianghlim pawl hrangih bomnak khonkhawmnak thu ah, Galatia ram ih kawhhran pawl thu ka rak pek bangin, nannih khal in cu tivek in tuah ve uh.
2 Kar khat ih ni hmaisa bik ni ah mitin in Pathian ih mal a sawm dan ih zirin khawlkhawm hai seh, cutin ka ra thlen tikah khonkhawmnak tuah a tul nawn lo nak dingah.

[11.16]

Peknak
Kawhhran tin in mai kawhhran sungih thlarau lam tul mamawh mi a phuhhruk sak ding lawng si loin, thlarau lam ih harhdam kawhhran a si ahcun, kawhhran dang ih tul mamawh mi khal a neih mi sung ihsin a hlawm ve ding a si (Dungt. 4:34, Gal. 5:13). Dungthluntu Paul cun amai hrangah le amah thawn hna a tuantu midang hrangah amai kut rori in hna a tuan a si. Curuangah innhnen thawi a pumkhawm aw mi kannih kawhhran te khal hin, Paul bangin, kanmai lakih mipawl lawng ngaihsak loin midang pawl ih tul mamawh mi khal bawm dingin kan timlam aw ding a si.

[11.17]

Khrihfa nitin nunnak ih a tulzet mi le theihsual theu mi thil pakhat cu peknak hi a si. Thilpek thu thawn pehpar aw in peknak ih kan thinlung put, duhdawtnak, phurnak, diklonak le tuanvo ah ngai ih peknak tivek pawl lakah in kaihruaitu ding Bible thawi milaw mi dan le dun pawl hi tui san ih Khrihfa malte lawngin an theithiam. Hi peknak thu ahhin Thukham thar sungah a felfai mi khihhmuhnak, thlun ding mi dan le dun, thupitter ding mi le theihnak malte lawng a um a bang. Curuangah mi tampi cu kirsal tahrat in, Thukham hlun ih a fial mi then hra ih then khat peknak thu hi an pom a si. Hi daan hi Israel Pathian in a rak uk lai ih hman mi a si; thlarau lam ih amah hruaitu pawl in uktu an tuah ih an rak kilkhawi lai ahkhan. Hi daan hi ram pakhat a si vekin Israel hnenih pek mi a si, a dang Moses ih dan pawl khal. Hi dan pawl hi tui san kawhhran hrangah tumtah a si lole pek a rak silo ih, cui dan pawl kawhhran in a thlun khal hi a palh a si.

[11.18]

Pathian Ih Mal In Sawmdan Zirin
Riahsiat za zet cu, thusimtu tampi in Mal. 3:10 hi an tuurual pawl then hra then khat pek lo ruangih kawknak ah an hman hi a si. "Pathian hniksak" lo ruangih mawh ih theihawknak thlarau an tuhlut, rinum zetih then hra then khat petu pawl cu theihfeng lo mi malsawmnak an tiamkam. Hi tivek zirhtirnak in Thukham Thar sungih kan hmuh mi peknak thu ih phurnak a thelh a si. Tah theih lo Khrih ih duhdawtnak cu bikhiah nei peknak in tah sawn lo in, bikhiah nei lo ih peknak thlarau sawn hi a tul mi a si nan (1 Jn. 3:16; 4:19). Then hra then khat peknak hi Thuthlung Thar ih peknak hrangah hmanrua a si lole, ziangmi so hmanrua a si ding? Hi thu sannak dingah Thukham thar zohsal hnik uhsi.

[11.19]

Thuthlung Thar ih Phuan mi
Thukham Thar ih thu hi thuneihnak sangbik a si. Tuanvo thu thawn pehpar awin Khrih ih daan in kan sia le tha theihnak a hmin lo a si ahcun buainak cu a tam tengteng ding. Hi zawn ahhin a si, then hra then khat peknak uar pawl an feh peng; peknak thu ah Thukham Thar ih a sim mi hi an lung a kim thei tawk lo a si. Thukham Thar in fiang zetih a sim mi cu Khrih duhdawtnak ihsin a puaksuak mi peknak diktak le hlanawknak cu thuthlung thar ahcun tuah dingin fial a si ih, then hra ih then khat cu fial mi a si lole thlun ding awm peknak ih dan khal kan u le nau hrangah a silo ti hi kan tarlang a si. A taktak ih ti ahcun, Thukham Thar hin then hra then khat thu a rel lo, a sinan peknak dan thu ah ringzet le fiang zetin a sim a si ti kan hmu thei.

[11.20]

Midang Ren Ding Zalennak
Galati 5:13
13 Ziangahtile u le nau tla, nannih cu zalennak ih kawh mi nan si; a sinan cui zalennak cu tisa hrangih can remcang ah hmang hlah uh, cuhnakin duhdawtnak thawn pakhat le pakhat rian aw uh.

[11.21]

Hi Bible cang ihsin a tlang pi thu ih kan zir thei mi cu, hi khawvel thil le ri ihsin zalenter zo mi Khrihfa pawl (Gal. 4:9-10; 5:1; Kol. 2:20-22) cun mai cakhiarnak pitlin ternak ah silo in, midang riannak dingih hman ding mi zalennak an co a si. Khrihfa nun pumhlum cu riantu sinak thawn tehkhin a si, cucu Khrih ih leitlun rongbawlnak thawn an mil aw a si (Matt. 20:22-2B; Jn. 13:14-17). Khrih thawn pumkhat a si mi pawl cu "mai hrangah nung nawn loin, an ai ih a thi mi le a tho sal mi Khrih hrangah nung sawn ding an si" (2 Kor. 5:15). Caan tha kan neih a sile, hi rongbawlnak cu mi hmuahhmuah hnenah tuah ding a si, a hleice in rinnak ih kan sungkua pawl hnenah (Gal. 6:10). Khrifa pawl ih peknak thu kan rel tik ahcun, "Pathian in leitlun a duhdawt tuk ruangah a fapa mal neihsun a pe" (Jn. 3:16) ti leh, Khrih in in duhdawt ih kan hrangah a pe aw aw (Gal. 2:20) ti mi thudik parah thum awin kan thilpek khal hi lungawinak thawn pe ding kan si ti hi kan theih ringring a tul. Curuangah, Bawipai hnenah kan hlan aw hmaisa dingih, cutin kan innhnen pawl hnen khalah kan pe aw ding a si (2 Kor. 8:5; Gal. 5:14; Rom 12:1-2).

[11.22]

Midang Ih Tul Mamawh Mi Pawl
2 Korin 8:1-2
1 Cuitlunah, u le nau tla, Macedonia ih kawhhran pawl hnenih pek mi Pathian ih zangfahnak hi nan hnenah kan lo theihter a si:
2 Cutin fiahnak harsatnak maksak ahcun an lungawinak maksak le an farahnak maksak cu an tirhsiannak ih lennak ah a cang deuhdeuh a si.

[11.23]

Peknak thu ah Thukham Thar sungih a lang mi tam sawn cu tul mamawh "tuk" dinhmun an si tin kan ti thei. Jerusalem ih unau pawl tlaksamnak phuhhruk sak dingah Zentel kawhhran pawl hnenih Paul ih sumkhonnak cu tirhmi Paul hrang ahcun thil tul tuk a rak si. Hi a tul tuk mi sumkhomnak ah 2 Korin 8 le 9 kan zoh a sile pek ding zat relcat tu dingih sirhsan mi dan hi then hra then khat a rak si lo ti a fiang. Cuhnakin, "an ti thei dan ih zirin, a si, an ti thei dan lan in, zalen tak ih mai palungsuak pek duhnak....Cutin mitin mai thinlung sungih tumtah dan vekin, ti tunto cingin si loin a si lole lo theih lo in si loin, pe seh; ziangahtile Pathian in siangzet ih a petu kha a duh a si" (2 Kor. 8:3; 9:7) ti mi thinlung thawn pe ding an si sawn.

[11.24]

Macedonia mi pawl cu mi farah zet an rak si. Paul in siangzet ih pek mi thilpek a khon lai ahkhan annih hi sumpai lam harsatnak nasa tak an tong ti a fiang (2 Kor. 8:21). A sinan an tlin tawk aiih tam an rak pe a si kha! Hi thu ahhin farah zet le milian zet in an then hra then khat an pek thu a lang lo a si. Pathian ih mal a lo sawm dan ih zirin, na thinlung sungih na tumtah dan vekin pe aw.

[11.25]

Dungthluntu cabu sungih unau pawl lakih kan hmuh mi peknak thlarau cun thlun ding dan le dun a langfiangter ih cui dan cun Pentikos hnu ih kawhhran a coktho a si.

[11.26]

Dungthluntu 2:44-45
44 Cun zumtu zaten an umkhawm ih, thil ziangkim an hlawm aw,
45 Cun an neih mi le an thilri pawl tla an zuarih, mitin an tul dan ih zirin an zate lakah an zemaw aw.

Khrih in kawhhran parih Thlarau a burh ni ihsi thok in, pakhat le pakhat ngaihsak awknak cu thil le ri hlawmkhawm awknak hnatuan ah hmuhtheih in a lang a si ti cu hi Bible cang ah fiangten a lang a si. Hi bungcang ih peknak cu bitek neiih pek mi si loin, tul mamawh mi zingzoinak le tul dan ih zirin siang zetih peknak sawn a rak si (Dung. 4:35). An cangvaihnak langsar bik ih kan rel ding a si ahcun bitek nei lo mawhphurhnak le pumhlum ih tuanvo laknak a si tin kan ti thei. An thil zemawk dan cu ti ve mei mei a si lole a can can te ah tuah men si loin, tuah ringring ih tuah peh vivo a si sawn, cucu, "an neih mi le an thilri pawl an zuarih, mitin an tul dan ih zirin, an lakah an zem aw thluh a si." An tul mi cu an neih mi sumpai in a tlin lo a sile, an thil le ri an zuar. An tul mamawh mi a kim tiang an pe mei a si.

[11.27]

Dungthluntu 5:3,4
3 A sinan Piter in, "Ananias, ziangruangah Satan in Thlarau Thianghlim bum dingin na thinlung a lo luahkhat ih, Leiram man ih a hrek cu nangmai hrangah na thup?
4 Na zuar hlan ahcun, cucu nangmai ta bul a rak si lo maw? Cun na zuar hnu ah teh, cucu nangmai thuthu a si ko lo maw? Ziangruangah saw hi thil hi na thinlung sungih na pai? Minung na bum a si lo, Pathian na bum sawn a si, a ti.
Hi bungcang ih a simfiang mi cu (1) Ananias hi a neih mi zuar dingin zohman in lo theih lo in an fial lo;
(2) A zuar hnu khalah, a ngah mi sumpai hi zohman in dungthluntu pawl hnenah pe dingin an phut fawn lo;
(3) Ziangzat a pe siang ding ti ruatin, zohman in hizat na pe tengteng ding tiin bitek an tuahsak fawn lo; cun
(4) A pek ding zat cu, Pathian hmaiah, a thinlung sungah ruatin amai duh zatzat a pe ding a si.

[11.28]

Dungthluntu 11:28-30
28 Cun an lakih mi pakhat, Agabus ti mi cu a dingih Claudius san lai ih a rak thleng mi vek pampi cu leitlun hmuahhmuah ah a thleng ding ti Thlarau in a phuang.
29 Curuangah dungthluntu pawl in Judea ram ih um unau pawl hnenah mai ti theitawk cio bomnak kuat dingin an relcat.
30 Bomnak cu an tuah ih, cui bomnak cu Barnabas le Saul ih kutin upa pawl hnenah an kuat.

Hi mi khal ahhin, a tlunlam ih tidan kel a lang: (1) tul mamawh mi an zingzoi (cang 28); (2) unau pawl in sumpai thawn an tanpi (cang 29); cun (3) bomnak an pek dan cu "mitin mai ti theidan ih zirin" a si (cang 29).

[11.29]

Dungthluntu 20:33-35
33 Zawi ngun maw sui, a silole hnipuan khal ka daw dah lo.
34 A si, ka tul mamawh mi pawl le ka hnenih a um mipawl hrangah ka kut in ka tuansuak a si ti cu nanmah rori in nan thei.
35 Hi tivek ih hnatuannak in, mi tawntai pawl nan bawm hrimhrim ding ti cu a phunphun in ka lo hmuh hai zo. Cun "Ngah lam hnakin peknak hi malsawm sawn a si" a ti mi, Bawipa Jesuh ih thu hi cing ringring uh.

Paul cu thuthang tha rong a bawlnak ah thlamsak thiam a si vekin sum a hawl phah ih rong a bawl a si (Dungt. 18:3). A sinan hi thu ahhin Paul in a ngah mi sung ihsin ziang a tuah ti hi theih cak a um nasa. Amahte a cawm aw lawng si loin a hnenih um mi pawl ih tul mamawhnak khalah siangzet in a pe a si. Paul in a tuansuah mi cu "mi thlasam bomnak" ah a hmang a si. Curuangah Paul cun Efesa mi pawl nun a rak simnak thu cu a tak in a tuahsuak a si ti kan hmu thei:

Efesa 4:28
28 Ruk ru tu cu ru nawn hlah seh, cu hnakin hnatuan tha cu a kut in tuanin, hna tuan sawn seh, cutin a tlasam mi hnehah pek ding a neih theinak dingah.

[11.30]

Kan tuan suah mi sung ihsin a hrek khat cu - Pathian ih mal in sawm dan ih zirin siangzet in - midang tul mamawh mi bomnak dingah fel zetih hman ding hi kan tuanvo a si. Sum le saw kan neih mi hi "kanmai ta" ti ih kan ruah ding le midang ih tul mamawh mi bawm dingin tirh mi ih in fialnak ah bomnak pe mumal lo hi a dik lo a si, kei ka hmuhdan ahcun then hra ih then khat peknak hin Efesa 4:28 ti famkim ding in dawnkham a si, ziangahtile mipi pawl in an ngah mi ih then hra then khat an pek thluh cun peknak ah an tuanvo theh ah an ruat aw theu, a taktak ahcun peknak an thok fang hi a rak si.

[11.31]

Mathai 23:23 thu hi rel tengteng a tul.
"Khasuan le khakhuan le putinan ih then hra then khat cu nan pe ih, dan ih thupi sawn ih a rel mi pawl cu ziang nan siar lo ........ A dang pawl tuamhlawm cuang loin hi pawl khal hi nan tuah ding awm a si." Thuthlung hlun ih dan a ti famkim lai ah, Khrih in dan thluntu pawl hnenah dan thlun dan ding a rak zirh. Khrih in thinglamtah parih a thisen a thlet hlan tiang thuthlung thar in hmual a nei lo. A rak tiamkam bangin dan cu a famkimter hrimhrim ding a si (Mat. 5:17, Heb. 9:22).

[11.32]

Khrih cun vunzimtan daan thu a thlun, a sinan Paul cun hi serh le sang hi thuthlung thar ahcun "thathnemnak neilo" tiah a ti (Gal. 5:6). Khrih in a tidam mi pa cu puithiam hnenah va hmuh aw dingin a fial. Tlen thu ah mi pakhat in cu tivek ih tuah ding hi cu laiah a rak dik mi a si ko, a sinan Khrih in cui tuanvo cu kawhhran a phut ti cu kan zum lo a si. Thuthlung hlun hmual a neih lai ahcun, Khrih in cui daan pawl thlun ding cu tha a pe nasa. A sinan thuthlung thar mipi pawl ih tuah dan hin then hra then khat peknak hi peknak thu ih sirhsan ding mi a si ti a tarlang lo. Thukham Hlun ih ruahnak cu lo theih loin then hra then khat pek ding hi a si, Thukham Thar ih ruahnak cu in tlentu amai zarih kan sinak hmuahhmuah le kan neih mi hmuahhmuah cu siangzet ih pek ding hi a si.

[11.33]

1 Korin 16:2 ih lungphum

Kar tin thawhhlawm pek hi thenkhat cun Kawhhran ih sum hnarpi ah an ruat. Sikhalsehla, hi bungcang hi thaten kan zoh a sile, hi peknak thu ahhin ruah ding mi thenkhat kan hmu thei.
1. 1 Korin 16:2 sungih Paul ih forhfialnak cun Jerusalem kawhhran ih tul mamawh mi hrangih thawhhlawm kha a khihhmuh mi a si. 1 Korin 16:1 peh sungih Paul ih a ngan mi forhfialnak cun hi mai palung suak peknak hi a dokalh lo a si. Mipi pawl ih thawhhlawm an pek dan ding dan a tuah sak khal a si lo. Galati zumtu pawl hnenih a rak tehton mi peknak ihsin an thawhhlawm peknak ah thazang a pe hai sawn a si.

[11.34]

Forhfialnak ih a tumtah mi cu, fimzet in le a hlankhan in thilpek an rak tawlrel ding hi a si, cutin mitin ih thawhhlawm cu Jerusalam ih kuat dingin an khon tikah, zohman in mai thawhhlawm sungih ta then hra then khat lawng pe in a dang cu mai tul mamawh ih an hmanlo nak dingah a si. "Malsawm a don dan ih zirin" ti mi catlang a hman mi hin, Paul cun thawhhlawm an pek tikah anmai sian dan ih zirin an pe ding a si ti a langter.

[11.35]

Hi forhfialnak pawl cu hmun hlapi ih um unau pawl ih tul mamawh mi hrang rori lawngah a hleice ih khon mi, voikhat lawng hrang a si ruangah kawhhran pakhat in hi bungcang hi peknak thu ah a thlun ringring a sile a dik pei maw? Dungthluntu ih tumtah mi cu zarh khat ih ni khat nak lawngah thawhhlawm pek ding tinak a si lo, hihi cu rinlo pi ih thil thleng tul mamawh mi bomnak dingih a tumtah mi a rak si.

[11.36]

2. Peknak thu ah Paul ih dan cu, bitek um lo, "malsawm a don dan ih zirin" awmtawk le siantawk pek hi a si. Ziangtik hmanah Judah dan hlun then hra then khat pek hi kawhhran ah a zirhter lo.

[11.37]

Curuangah, Judah nunphung dan ih a tel mi, theh hra then khat peknak tivek, hi thuthlung thar san ahcun dan vekih hman ding a silo, curuangah theh hra then khat peknak hi Thukham Thar ah tuanvo tin a tarlang lo a si.

[11.38]

3. 1 Korin 16:2 sungih Paul ih Greek catlang, par' heauto, ti mi hin, sumpai cu kawhhran thawhhlawm ah zarh tin rak keng ti silo in, Paul a ra thlen hlanlo mai inn ah rak khawl ding ti a khihhmuh duh a si.

a. - Cafang simfiangnak ihsin nemhngetnak:
J.H. Thayer ih, Greek-Mirang Thukham Thar cafang simfiangnak, cahmai.477 - "hnenah lole hrangah thawi a pehzom  aw mi tuartu thawn, para timi Greek hi hman a si tikah a khihhmuh duh mi cu mi pakhat khat in amah thawi nai bik nak ih um lole tuahmi a rel duh ..... b. cucu, mai inn ah, mai khua ah, mai khawm awknak ah ..... par' heauto, mai inn ah, 1 Kor. 16:2."
Cafang simfiangnak tawi, Liddell le Scotts ih Greek - Mirang cafang simfiangnak (London, 1872), cahmai. 519 - "par' heauto, mi pakhat ih inn ah; latin; Apud se, "Arndt le Gingrich, Greek - Mirang Thukham Thar cafang simfiangnak, cahmai. 615 - "hnenah lole hrangah thawn (mi pakhat thawi nai bik ringring) hmun nai bik a khihhmuh .... mi pakhat khat ih inn ah, khawpi, pawlkom, tivek, - a. inn: aristan Lk. 11:37 .... Curuangah ekastos par' heautois cun 'mai inn cio ah,' tinak a si 1 Kor. 16:2 (zohthim ding, Philo, Cher. 48 par' heautois, leg. ad Gai 271)."

[11.39]

b. Hi bungcang ih midang ih hmuhdan pawl:
Chrysostom ih 1 Korin thu simnak 13: " Paul in, mitin mai hnen cio ah khawl hai seh, Kawhhran ah rak keng seh, a ti lo, cuti locun malte lawng petu cu a ning a zak pang thei" (hmansaktu, Samuele Bacchiocchi, Inrin ihsin Colh ni tiang, cahmai. 94, hminsin 17). Keith Nickle - "Zarh khat ih ni hmaisabik ah mitin in an ti theitawk cio inn ah khawl ding an si, cutin Paul a ra thlen tikah sumpai cu tiarcia in a rak um ding a si" (cahmai. 15). F.W. Grosheide - "Thawhhlawm cu zarh khat ih ni hmaisabik ah pek ding a si, kawhhran ih pumkhawm awknak ah si loin ... inn sawn ah" (Paulus' Eerste Brief aan De Kerk Te Korinth [J.H. Kok, 1933]. cahmai 211-212; zothim ding, Grosheide, De Eerste Brief aan De Kerk Te Korinthe [J.H. Kok, 1957], cahmai 435; Geoffrey B. Wilson, 1 Korin, cahmai 244). Samuele Bacchiocchi - "A hmaisabik ih kan zoh ding mi cu, hi bungcang hin mipi pumkhawm awk ding thu a rel lo, sumpai khawl dan cu 'mahte - par' heauto' khawl sawn ding a si thu hi a si. A.P. Stanley ih sim mi vekin, hi catlang ih simduh mi cu, 'thawhhlawm khawlnak cu mahte cio in le bulpak cio in tuah ding a si'" (Inrin in Colh ni tiang, cahmai 93). R.C.H. Lenski - "Zumtu tin in pek mi thawhhlawm cu 'mai hnenah: par' heauto, mai inn ah, kilkhawi ding a si ih, kawhhran ih voikhat ih ken thluh ding a silo" (hmansaktu, Bacchiocchi, cahmai 93, hminsin 13).

[11.40]

 Thueltu Sannak
"Hi catlang 'amah ten lole amai inn ah' ti mi khihhmuhnak hin san a nei lo, ziangahtile hitivek ih tuah a si ahcun sumpai khonkhawm sal a tul ding, curuangah hihi Paul ih hrial duh mi rori a si (1 Kor. 16:2), tin elnak a um. A sinan hi elnak hin hmunhma a nei lo, ziangahtile tui catlang thluntu, 'khawlnak lole kilkhawinak' ti mi hin sumpai cu Dungthluntu in khongkhawm dingih a rat lai hlanlo mitin mai inn cio ah khawlkhawm ding a si thu a rel sawn a si. Cu tikah rak khawlkhawm mi thawhhlawm cu hmakhatte ah tawlrel a theih ding a si .... Dungthluntu cun petu pawl le khongtu pawl khal peknak thu ah 'rak ralring lo' (2 Kor. 9:4) ruangih mithmai nom lonak kha hrial a duh mi a si. Hi thu ah buainak pawl hrial duh ah anih in a caan - zarh khat ih ni hmaisabik - le a hmun - mai inn, tin a fial hai a si" (Bocchiocchi, cahmai 93, 100).

[11.41]

4. Cun 1 Korin 16:2 ih thupi bik zirhtir mi cu a hnuailam vekin a tawi zawngin tarlang theih a si:
Tumtah mi cu thawhhlawm peknak in Colh ni khawm hlungter ding si loin, a ra thlen tikah hmuh theih le tham theih thawhhlawm a rak um ding hi a si sawn. Hi tumtahnak ahhin thil pa li kan hmu thei. Thawhhlawm cu a caan te ah ("zarh khat ih ni hmaisabik ah") mah rori in ("mitin in") bulpak cio in ("mah ten khawl") le sian zatzat in ("malsawm a don dan ih zirin") pek ding a si [Bacchiocchi, cahmai 100).

[11.42]

Kawhhran ni hmaisabik ah, unau pawl ih an pek mi sumpai cu tirhmi pawl hnenah an rak kengih, cutin mi tlasam pawl hnenah zem a rak si (Dung. 4:37, 11:29, 30). Cun kawhhran ih taksa / thilri tul mamawh mi verther tu upa (deacon) pawl hnenah tuanvo pek a si (Dung. 6:2). Ti dan ding cu zumtu tin in pek ding ih an ret hranmi sumpai cu, ziangtikong zawngin si maw, kawhhran hruaitu pawl in an khong dingih dik zetin an hmang ding ti a fiang. Khrihfa pawl cu petu ding an si ti Thukham Thar in a tarlang a si. Pek dan ding cu ti dan kel ten, sian zatzat, le ui lo in pek ding a si.

[11.43]

Ti dan hlun a liam zo ruangah then hra then khat peknak hi tu ah peknak ih sirhsan ding a si nawn lo. Thusuhnak thupi zet cu hihi a si: peknak thu ah Thukham Thar ih dan lam in in hruai ding maw, lole a liam zo mi can ih rak ti dan, then hra then khat pek tivek hi kengpeh vivo in mipi pawl ih tuanvo ah kan ret ding maw? Khatlam zawngih kan ti a sile, thuthlung thar ih hmuhdan a si mi then hra then khat pek tul lo ti mi hi, thuthlung hlun ih hmuhdan a si mi then hra then khat peknak in kan nehter siang ding maw? Hi thu ahhin Thukham Thar hi daiten a cawl men lo. Thinlung sung ihsin peknak le then hra ih then khat peknak cun pehtlaih awknak an nei lo tin a zirh ih Khrihfa pawl then hra then khat pe dingih a forhfialtu pawl lala khal in Thukham Thar in then hra then khat pe dingin Khrihfa pawl a phut lo ti an pom a si. Cu cingin, annih in, Khrihfa pawl in then hra then khat an pek lo a sile Pathian lalram ihta an ru a si tin an ti!

[11.44]

Bible hrilhfiah dan dik le Thukham Thar ih phuan mi ziktluak ten pomnak cun then hra then khat peknak in Khrihfa ih sia le tha theihnak kan tawnhrem lo ding hi a duh a si. Then hra then khat peknak cun thuthlung thar ih peknak thu ahcun hmual a nei nawn lo a si. Hi thu ahhin tuahbet ding mi le tuah nawn lo ding mi tin thil pahnih kan nei. Peknak hi tuahbet ding mi a si ih, pek dan ah then hra ih then khat ti mi tuanvo hi tuahbet nawn lo ding a si.

[11.45]

Thukham Thar Ih Peknak Thuhla
Khrihfa pawl cun then hra then khat an pe tengteng ding a si, cuti locun sual an tuah a si tiih zirhtu pawl hrangah hi thu elnak hi ka tarlang a si. Khrih le A dungthluntu pawl in then hra then khat pek ding, a pe lo tu cun thuthlung thar a bawtsia a si tin an zirhter lo. Thuthlung Thar ih peknak cu Khrih lalram ih tul mamawhnak ah thinlung sungin siang zetih peknak a si. Hlan lai Khrihfa pawl in then hra then khat peknak sirhsan in thilpek an rak pe lo, a sinan kawhhran cu a thanglian, malsawm in a um ih, unau pawl cu luangliam in an rak zoh a si. Hi thu hi ziangtin kan rel ding? "Khrih duhdawtnak in cui hlan lai unau pawl cu Khrih ih a rak pek mi dan a lakin nan ngah, a lakin pe uh' (Mat. 10:8) ti mi tuahsuak dingin a tur a si ti kan hmu thei."

[11.46]

Kawhhran pehzom awknak ih dan thlun dingah Thukham Hlun ih then hra then khat peknak cu leh hnu kawhhran hnenah zirh in forhfial ti cu a fiang a si. Curuangah, then hra then khat peknak a um locun kawhhran cu sumpai a tlasam ding ti mi ruahnak ah kan awk aw pang lo a tul. Khrih ih duhdan cu Khrihfa pawl cun siang zetin le ui loin pe ding an si ti le, hi daan pawl hi a dik ti thei in, Khrih ih lalram cu a tul dan ih zirin somdawl ding hi a si.

[11.47]

Curuangah thusimtu pawl ih ti ding awm umsun cu Thukham Thar ih sim mi tuanvo pawl hi mipi pawl hnenah tarlang in, tuurual pawl hnenah an tuanvo Khrih ih tuah mi thlun in (2 Kor. 8:9) tampi pe dingih zirh hi a si. Teh mi zat ih kop feufeu lo in, Rundamtu duhdawtnak sawn hi Khrihfa pawl ih peknak lamhruaitu ding a si (Jn. 14:15; 15:10). Hi dan leng lan ih feh le Khrih in khuitawk hman ih a rak phut lo mi, then hra ih then khat pek phut hi tawnhremnak silo in, malsawmnak sawn thlentu Thuthlung Thar ih peknak dan fimzet thelh hulhual a si.

[11.48]

Then hra then khat pek a tul tiih an lo zirh ruangah rinum zetin then hra then khat na rak pek a sile, tu ah cucu a dik lo ti thei awla, na sia le tha theihnak thlunin rinum zetih pe dingin forh na si. Sikhalsehla, then hra ih then khat pek hi Khrihfa peknak hrangah dan umsun a si lo vekin, "Pathian ih mal a lo sawm dan ih zirin," ti mi dan thlun in na sumpai cu zohfel awla, then hra ih then khat hnakih tam na pek thei ding le ding lo zoh fel aw. A si, then hra ih then khat hi ka pek awmtawk a si tiih na ruah hi sualnak zianghman a um lo, a sinan na sia le tha theihnak a thianghlim a sile, thuthlung thar dan hnuai ah then hra ih then khat hnakih tam lole mal peknak ahhin sual a um lo ti hi na theih ringring a tul.

[11.49]

Ziangahtile Pathian ih nasa zetih mal a sawm mi Khrihfa pawl an um a si. A hmin men ih Khrifa then khat milian pawl cun an ngah mi sumpai ih then hra then khat an pek thluh hnu cun Pathian dungtun thei ah an ruat aw a si. A sile, "rinum zetih then hra then khat petu Khrifa milian zet hi kan lawm ding maw?" Lawm kher kher hlah. Kan hmuh zo vekin, then hra ih then khat pek thluh cun Pathian hnenah tuanvo nei nawn lo ih ruahawknak hi ruahnak sual pumhlum a si. Cuti a si ahcun, Khrihfa milian pawl in Thukham Thar dan thlun in peknak an tuah ding a sile, Pathian lalram hrangah an ngah mi sung ihsin then hra ih then hnih maw then nga tiang an pek ding hi a mawi a si. Simduh mi cu hihi a si: Khrihfa zohman in dan vekah ruat in then hra then khat peknak ah a lung a awi tawk lo ding hi a si. Hiti vek peknak cu hlanlai kawhhran ih an rak tuah mi tul mamawh dan vekih peknak le ui lo ih peknak thaw cun an mil aw lo a si.

[11.50]

"Mi farah" Khrihfa pawl hi hlanlai kawhhran san khalah an rak um. A sinan hi unau pawl thu ah Paul in hitin a sim, "an farahnak maksak cu an tirhsiannak lennak ah a cang. Ziangahtile an tlintawk in le an tlintawk hleihluat in lung rualten an pe (2 Kor. 8:2-3) ti ka lo theihter a si." Jesuh ih hmuhdan ahcun, thawhhlawm petu hmuahhmuah hnakin thawhhlawm kuang sungih  pianawi a thlatu nuhmei nu in tam sawn a pe...ziangahtile mi hmuahhmuah cun an neih mi hlei an pe, a sinan cu nu cun farah cing tein a neih mi zaten, a nunnak ding zaten a pe thluh a si (Mk. 12:41-44). Ngah mi malte thawn fimkhur zetih a nung mi Khrihfa pawl hi then hra ih then khat an pek theilo tikah mawh nei ih ngai awk ding a si cuang lo, cucu Khrih ih tahfung khal a si ve lo, a sinan hi nuhmei nu vekin Khrih lalram ih tul mamawh nak hrangah an ti theitawk, ui lo ih an peknak ah malsawm in an um sawn ding a si.

[11.51]

Then hra then khat peknak hi Thukham Hlun le Thukham Thar cu an pehtlai aw tiih kan theih vekin tuah peh vivo ding hi a dik maw dik lo ti cu, kan rak tarlang zo. Then hra ih then khat peknak thu cu Thukham Thar sungah ti fukfi ih a lang lo ruangah, cucu Thukham Hlun sung ihsi ra a si tengteng. Thukham Thar ih tarlang mi tul mamawh dan ih zirih peknak hi daan ah kan pom maw, a si lole thuthlung hlun ih dan cu thuthlung thar ah bet in, cucu zumtu pawl ih tuanvo ah kan ret ding maw? Thukham Thar in then hra ih then khat peknak thu hi a sim lo hulhual tinak cu a silo. Thukham Thar cun then hra ih then khat peknak si loin, thukham hlun le thar sungih um mi, tuah peh ding mi peknak ih lungput sawn a zirh a si. Tul mamawh dan zirih peknak hi, then hra ih then khat peknak si loin, Thuthlung Thar ih dan ah tarlang a si. Then hra ih then khat peknak hi thuthlung thar sungih tullut hi a dik lo a si, cucun buainak a suahter, mipi pawl kha phut lo mi thil tuah a fial ih, Khrih duhdawtnak ihsi a luangsuak mi tul mamawh dan dan ih peknak, ui lo tei peknak ih mawizia hi a thelh a si.

[11.52]

Dan cun, ni sarih lakih ni khat cu Bawipai hrangah ni thianghlim tin a phuang. Thlarau cun a ni sarih in a ti thianghlim. Dan cun hnam hleihnih lakih hnam khat cu puithiam dingah a ret hran, Thlarau cun zumtu mipi hmuahhmuah hi puithiam tin a phuang (1 Pit. 2:9). Dan cun neih mi ih then hra then khat a dil, Thlarau cun kan neih mi zate thawn Pathian ih ta ah in can. Hi peknak thu ih thu le hla tamtak ahhin Jon Zens parah kan lung a awi.

[11.53]

Zumtu Mizia (Nuncan)
Unau lakah tul mamawh mi cu ca in, fawn in, email in lole theihternak in than a si tikah, Khrihfa pawl hnen ihsin hmakhat te ih sannak le relnak felfai a um ding a si. Sannak ka ti tikah, thawhhlawm peknak ka ti duh mi a silo, cucu duhum bik a si ko nan. Ka sim duh mi sawn cu, "a si, kan lo bawm ding" ti, a si lole  " kan lo bawm thei lo" ti maw, " kan lo bawm duh lo"  ti mi sannak a si.

[11.54]

Taksa ih kan unau pa lole unau nu in bomnak in dil a sile, an bomnak dilnak cu hmakhat tei kan san lohli a duh um. Nuarneihnak in kan innsang mi parah harsatnak tam sinsin a thlen thei a si, cuiruangah nuar kan nei ding maw? Nuar lamlam hlah! Cuti a sile, Khrih ih kan unau pa lole unau nui tlaksamnak cu bawm lohli lo in nuar kan nei ding maw si? Annih cu taksa ih kan unau pawl hnakin an thupi lo sawn maw si? Jesuh cun cutivek in a ruat lo a si (Mat. 12:46-50, Mat. 25:40).

[11.55]

Hngalnak ruangih thenthekawknak thawn a tlusia mi tulai kawhhran ahhin pakhat le pakhat ngaihsak awknak hi kan hloh thlang a si. Midang pawl ih thuhla hi kanmai thuhla hnakih thupi sawn ah kan ruatsak nawn lo a si (Fili. 2:3, 4). Pakhat le pakhat kan ngaihthah aw ih, cucun kan thilti theinak, duhdawtnak, lungrualnak le kan thuanthu a siatsuah a si. U le nau tla, Thlarau ih kaihhruai mi si dingin kan zir sal a tul a si. Ziangtin hna kan tuan tlang ding ti le, ziangtin pakhat le pakhat phurrit kan phurh sak aw ding ti tla kan zir a tul.

[11.56]

Hnatuan Tlang
Kan unau pawl ziang kan siar lo tikah, kawhhran ziang kan siar lo tinak a si, kawhhran ziang kan siar lo tikah, kawhhran leitu ziang kan siar lo tinak a si. Bomnak pe dingah a tha mi lungput pakhat hnakih tam a um mei thei. A tlangpi thu in midang tlaksamnak ih bomnak kan pek tikah ngah sal ding beiseinak um loin kan pe theu. Thlarau lam hlawknak um lo mi thuhla ih mi pakhat khat in bomnak an pek hi ka forh duh mi a silo, a sinan thuhla hrekkhat cu thildang hnakin kan thinlung thawn a pehtlaih aw sawn a si. Bom tul ih kan ngai mi hnakih mal sawn tlaksamnak bawm dingin rualpi pakhat cu hip a siih, kannih khal amah tanpi dingin sawm kan si a sile, tul mamawh hnakih mal a si lole tul mamawh mi zat cekci kan bawm thei. Hihi thinlung diktei kan tuah a sile, kan unau pai hnatuannak lole rongbawlnak ah kan tel duh ve tinak a si. Midang a bom duhnak phurrit cu kanmai phurrit ah kan can ve a si. Cumi cun kan pumkhat sinak le unau kan sinak a langter. Cui phurrit in in hip khawm a si. Kau zawngih kan rel a sile, peknak cu pehtlaihawknak a si, mi pakhat cun tul mi bomnak le mi pakhat cun tirhsiannak ti'n a ruat thei a si. A netnak ahcun, midang parih a phurrit phurh bawm dingih a lo sawmtu unau pa cu a hnatuannak ah amah thawn tel ve dingin na pekawk tikah an lung a awi ngaingai a si.

[11.57]

Hi hin Khrifa unau nan si vekin lungrualnak ah a lo hruai deuhdeuh ih nan duhdawtnak rak cotu khal hi malsawm in a um ve ding a si. Hi lungput hin unau lakah hna a tuan ih, kawhhran pawlkom awknak ah hi lungput hi cohlan a si ahcun nasa sinsin in tuahsuak mi a nei ding a si. Kan kawhhran in a member pawl hnen ihsin thilpek a dongih cui sumpai cu a dang kawhhran ih tul mi bomnak ih a hman tikah, cui bomnak cun cui kawhhran pahnih cu pehtlaih awknak thar le sang sawn ah a thlen ih Khrih ruangpum sungih hi tivek thuanthu cu hmual a nei zet mi le a tul ngaingai mi a si. Hitivek lungput hi a si, kawhhran pakhat kan sinak langtertu le Khrih ah taksa pumkhat ih in hruaikhawm tu cu.

[11.58]

A can can ahcun unau pa lole unau nu in kumkhaw nunnak hrangih hlawknak  le thathnemnak umlo mi a lang te sung hrang tisa tul mamawh mi thuhla ah kanmah a si lole kan kawhhran hi bomnak in dil mei thei a si. Unau pa lole unau nu in an tul mamawh zet ih an ruah mi hrangah bomnak in dil mei thei, a sinan thuthang tha simnak can in on loih cucu kan sia le tha theihnak khal in a pom lo mi a si thei. Thuthimnak ah nauthlaknak dingih duhdawtnak peknak lole kawhhran biakinn dinnak hrangih peknak tivek a si thei. Cu tivek a sile, ziangtin? Pek aw hlah! Na sumpai cu a dang tul mamawh mi hrangah ret hran a si zo ti le, an bom theilo ding thu sim aw, thuhla na khirh tengteng ding a si. A thuhla na ngaihsak lo hmanah cui unau pa cu na ngaihsak ding a si.

[11.59]

Bomnak pekmi cu ziangtin hman a si ding lole zo in a hmang ding tivek theihfengnak dingah thusuh tih aw hlah. A can can ahcun hi tiih lenglam ih thlirnak men cun tisa hrang zet ih a lang mi khal hi thatei simfiang ahcun Pathian lalram hrangih a tangkai zet mi tla a rak si theu. A cancan ahcun petu pawl in tul mamawh zia hi hmakhatten an theithiam tiin bomnak diltu in an ruat theu, a sinan cucu a dik lo thei. Bomnak na dil tikah a tul mi thu le hla hmuahhmuah sim thei dingin tiar cia aw. Bomnak na pek a si lole na el hlanah thu le hla zate'n thei thluh hmaisa aw.

[11.60]

Thuthimnak ah, a thangso lo mi ram ih kawhhran hrekkhat hrangah computer pathum leinak dingah dollar 1,800 cu inn sawm sarih a si mi kawhhran hnenah bomnak ka dil. Kawhhran upa pawl in TV tumpi kan lo kuat na duh mi a si maw tiin thu in khirh sal. Hiti ih thlir men cun, ka dil mi cu tul mamawh lem lo a bang, a sinan a thangso lo mi ram ih mipi pawl hrangih na ruah a sile, cakuat man hi a khung zet thei, ram hla pi phone ih kawh hi cu rel ding a um lo, ramleng suak ih khual tlawn ding cu a cang theilo rori a si. Cuiruangah ka sim duh mi cu computer hi khawvel unau pawl thawn pehtlaih awknak ah, biakawknak ah le bomnak dilnak ih hmanrua thazet a rak si.

[11.61]

A thangso lo mi ram ahcun fimthiamnak zirnak khal hi a farah a si lole duhduh in zir ding a um lo thei, a sinan computer pakhat cun fimthiamnak ih zir duh mi thu le hla tintian zir cawk lo in mi a pe. Cui computer cun hi leitlun ih a um mi miphun le nunphung hmuahhmuah hnenah a lo thlen thei a si. Ram farah ih um Khrihfa pakhat in Bible zirnak tha tha thun mi computer pakhat a kut sungih a neih a si ahcun, cumi cun zirtu ihsin zirhtu ah a can thei a si. Cumi cun zir ding, ruat that ding le cathianghlim maksak zia pawl kha Pathian fate pawl hnenih khaksuak dingah zirhtu hi a bawm thei a si. Missionary pawl ih thlen theilonak hmunpawl ah a thleng thei ih, thil harsa a si lole tuahsuak theilo mi pawl khal a tuahsuak thei.

[11.62]

"A rilrawng mi cu nga na pe thei a si lole nga kaih dan na zirh thei" ti a rak si. Nga na pek a sile, tu ni a ei dingih, thaisun teh ziangtin a um ding? Nga kaih dan na zirh a sile, a nunsung a cawm aw thei ding a si. Computer san ah kan um ih mi tampi ih hnatuannak cu computer ih thluak ah a thum aw a si. Computer thu le hla theihnak le thiamnak hin a thangso lo mi ram ih a rilrawng mi innsang hi an nunnak sumpai ngahnak dingah tampi a thathnem pi thei a si. A thangso lo mi ram ih kawhhran hrangah computer thar pakhat le ca suahnak thar pakhat man cu anmah va tlawnnak ih tlun feh nak man hnakin a mal sawn men ding. Ka u le nau tla, hi ti thlirnak men ih tul mamawh lo ih a lang mi bomnak dilnak kha ol ai tei nan el hlanah thaten nan ruah ih thla nan cam theinak dingah hi thuhla hi ka ngannak a si.

[11.63]

Thupitternak le Pehtlaihawknak
A tlangpi thu in pehtlaihawknak hin, zo in kan bomnak thilpek a co ding ti thu a then theu. Curuangah bomnak kan pek tikah zo kan pe deuh ding ti mi cu pehtlaihawknak in thu tla a rel fel a si. Peknak hmuahhmuah ahhin thleidannak a um ringring, curuangah thleidannak a tul vekin, cui thleidannak cu Bible dan vekin kan hman a tul. Zumtu taksa ruangpi pakhat ih taksa peng tin kan si vekin rahsuah dingin kan zaten tuanvo kan nei cio. A can can ahcun, kanmai sual ruang khalah si loin, hnatuan lo le hnatuan theilo kan si can a um thei. Cutivek a um tikah, thlarau lam ih kan sungkua pawl cu cutivek tul mamawh can ih kanmah bawm dingah an timlam awk a tul. Hna kan tuan thei na cingih kan tuan duh lo a si ahcun, unau pawl hnen ihsin bomnak khal lak lo ding a si. Kan innhnen, kan kawhhran hi kanmah thawn a naibik mi thlarau lam sungkua an siih, curuangah kan dinhmun cu an thlingthla ding a si.

2 Thessalon 3:10
10 Nan hnenih kan rak um lai khalah, hitin thu kan lo pe, zokhal hna a tuan duh lo tu cun a ei khal ei hlah seh, tiin.

[11.64]

Ziang hnatuan khal hi upat tlak a si, a sinan a can can ahcun hngalnak a si lole zetnak in hnatuan lo dingin mi a tuah. Thuthimnak ah, thir pehtu a si lole cet tuahtu in rei lo te sung a hnatuan ai ih niam deuh hnatuan ding a nei nan, a tuan duh lo. Annih in cui hnatuan cu an tuan duh lo, ziangahtile a hlawhman a mal deuh a si lole cui hnatuan cu an hrangah hnatuan nauta ah an ruat a si. Cutivek lungput cu kawhhran in a zawi lo ding a si, cun cutivek thuhla ah bomnak khal pek a tum lo ding a si. Ziangahtile mi pakhat in hnatuan a neih lo lai can ah, nitin ten taima takin hnatuan a hawl ding a si. Hnatuan a hawl lo can ah kawhhran sungih unau pakhat khat, hnatuan nei mi kha hnatuan bawm in a can a hmang ding a si. Hi cangvaihnak hi kawhhran upa pawl le hotu pawl ih theihpinak in a si ding a si. Kawhhran in hnatuan nei lo mi ih tul mamawh mi bom a tum a sile, kawhhran in a member pawl hnen ihsin a co mi bomnak sungin a bom ding hi a mawi a si. Kum upa pawl cun thazang lam ih bomnak an tul ringring. Kum le thazang tumsuknak hin mahte todelhawk theilonak a thlen a si. Hnatuan nei lo mi le a innsang parih Kawhhran ih tuanvo cu rawl, hnipuan, umnak, le si le vai an tul dan vekih pek ding hi a si. Hnatuan nei lo mi pa ih tuanvo cu taimak suakih hnatuan hawl ding le kawhhran upa pawl ih fial dan vekin unau pawl ih tul mi hnatuan ziangkhal tuansak ding hi a si (Dung. 6:23). Hihi lungawi zetin tuah ding a si. Alak ih ngah kan duh a sile, alak ih pek khal kan tum ding a si.

[11.65]

A Thupi Mi Ngaithupitnak
1 Timote 5:8
8 A sinan mi zokhal amah le mah, a hleice in amai insang a cawm lo a si ahcun, rinnak a phatsan ih, zum lotu hnakin a sual sawn a si.

Bomnak kan pek tikah Bible ih a thupitter mi pawl lak ihsin a pakhatnak ih kan ngaihsak ding mi cu mai sungkua, mai innsang ih um mi pawl hrangih kan sumpai hawl ding tuanvo theihfeng hi a si (1 Tim. 5:8). Pathian lalram sungah zumlotu hmuh kan tum a sile, cuhnak ih sual cu ziang a um nawn ding? Himi ihsin fiang zetih kan hmuh thei mi cu, mai sungkua kilkhawi hi a hmaisa bik ih a thupi bik mi a si. Mai sungkua nunnak dingih lo theih lo ih tul mamawh mi pawl tlasam cingin mai innhnen tul mamawh mi bawmtu pa ih thuanthu cu ziangvek a si ding? Taksa ih kan innsang mi pawl ngaihsak ding hi a pakhatnak a sile, peknak thu ah a pahnihnak ih thupi mi cu zo a si ding?

Dungthluntu 6:1-3
6:1 Cun culai ah, dungthluntu pawl an pun vivo tikah, Greek tong hmang Judah pawl cu Hebru mipawl parah an phunnawi, ziangahtile an nuhmei pawl kha nitin thil zemnak ah thlauthlak ih an um ruangah a si.
2 Cutikah hleihnih pawl in dungthluntu tampi an ko ih, Pathian thu tanta in, cabuai hna kan tuan ding cu a dik lo a si.
3 Curuangah, u le nau tla, nan lakah mi ih sim that mi, Thlarau Thianghlim le fimnak ih khat, minung pasarih hawl uhla, annih cu hi hnatuan hi kan pe ding.

[11.66]

A tlun ih Bible bungcang ahhin nuhmei pawl thlauthlak an si tikah dungthlun pawl in an ngaihven lohli ti hi kan hminsin a sile a tha zet ding. Hihi 1 Timote 5:3 ih Paul in Timote hnenah nuhmei pawl upat ding thu a rak sim mi thawn a mil aw a si. Cang hleiruk khalah cui thudik cu hmuh a si. Pasal neilo mi cu kawhhran sungih mi ngaihsaktu member pawl in an bawm ding, a sinan a pasal a thi mi cu kawhhran in tuanvo a la ding a si. Hi dan hi kawhhran hrangah a thupi zet a si, ziangahtile cutivek dinhmun ih cu tivek kilkhawinak cu a thianghlim, borhhlawh lo mi sakhua tinak a si. Hi zawn ahhin sakhua ti mi tongfang ih duhsan cu biaknak a si lole biaknak thianghlim, nu le pa nei lo pawl le nuhmei pawl an tlaksam tikih vehtu le bawmtu tinak a si.

Jeim 1:27
27 Pathian le Pai mit hmuh ih a thianghlim le a borhhlawh lo mi biaknak cu hihi a si, Nu le pa neilo pawl le nuhmei pawl an harsat can ih va veh, le khawvel ihsin soihnom kai lo ih mah le mah kilkhawi awk hi.

[11.67]

Himi kan tuah tikah hi nunau pawl ih tontaihnak kha hlawknak ah hmang loin, khawvel ih cakhiarnak ihsin soihnom kai lo ih kan kilkhawi awk ding hi kan cin ringring a tul. Kan kawhhran sungih hi nuhmei pawl le nu le pa neilo pawl cu kan thupitter mi cazin ah an tel lo a sile, zo pawl an si ding? A sannak cu kum tam ruangah a si lole harsatnak ruangah farahnak in a tlakih mah le mah cawm aw theilo pawl an si ding. A par lam ih kan tarlang mi hmuahhmuah cu kanmai innhnen miburpi sungih tel mi an si; kanmai kawhhran sungih mah le mah cawm aw theilo pawl an si.

[11.68]

Taksaruangpi vek thotho in kawhhran pakhat khal hi kum ruangah a thleng aw thei. A no lai ahcun, a tul mamawh mi a mal, ziangahtile a member pawl kha an harhdam ih an cak lai a si. Hitivek zangfahnak can sung ih a um lai ahcun, kawhhran tum deuh sungkua ih tul mamawh mi le amai tul mamawh mi khal a tohdelh aw thei men ding, a sinan a kum a tam vivo tik ahcun a neih mi pawl cu a member sungih kum upa pawl le mi tawntai pawl bomnak dingah a tul tam sinsin ding a si. Kawhhran dang hnenih siang zetih a pek mi bomnak cu tu ahcun amai kawhhran sungih kum upa pawl zohnak dingah a tul thlang dingih bomnak dang hman kawhhran dang hnen ihsin a can can ahcun a tul mamawh mi phuhhruksak nak dingah a tul thlang ding.

[11.69]

Tui kan san khawvel ih kan hmuh mi thil umdan pawl ruang ahhin kan thupitter ding mi khal hi a fiang zet lo thei men. Veng hnen kawhhran, mi malte si hmansehla Bible ih zirh dan vekin kawhhran tiih kawh thei mi hin kan khawte lole khawpi sung ih um veng hnen kawhhran dang hmuahhmuah ngaihsak ding hi kan tuanvo a si. A sinan pawlkom tampi mahte kawhhran tiih a ti aw mi pawl cun Khrih le dungthluntu pawl ih in tanta mi Thukham Thar ih dan an thlun lo a si. Hipawl hi kawhhran an si maw? A si, annih cu pumkhawm aw mibur an si ti kan thei. Khrih ih uknak hnuaiah kan khawm aw an ti nan, Khrih ih tumtah mi lole dan cu an thlun cuang lo a si. Dungthluntu pawl ih dan le dun an thlun lo a sile, ziangtin Khrih thuneihnak hnuaiah an um kan ti thei ding (2 Thes. 2;15)?

[11.70]

Hi dan le dun pawl vekin unau ih kan ruah mi zumtu tampi cun biakkhawmnak ah an pungkhawm aw ti kan thei, a sinan hipawl hi kawhhran an si maw? Kawhhran an si ahcun an tul mamawh nak ah kan miburpi khal in kan bom a tul a si. Kawhhran an si lo ahcun bomnak kan pek a tul lo a si. Kum zabi kul hrawngih cangantu le zirhtu hminthang, Watchman Nee cun Dungthluntu pawl ih dan le dun thawi a mil aw lo mi miburpi hmuahhmuah cu kawhhran si loin pawlkom men men in a ruat hai a si. Hi pawlkom men men ih tel an va si hmanah mitin bulpak cio in Khrihfa unau dang pawl hgaihsak ding hi kan tuanvo a si hrimhrim. Bomnak pek a si hlanah, anmai pawlkom sungih bomnak an hawl hmaisat ka duhsak, an pawlkom in a bawm duh lo a sile an bomnak dil mi cu theihter si ko seh. Hi thuhla ahhin, an pawlkom in Pathian thu a pomhnget lo ruangah an pawlkom bom ding hi kan tuanvo a silo, a sinan bomnak cu bulpak cio in tuah theih a si.

[11.71]

Pehtlaihawknak Ngaisannak
Kum a herliam vekin, kan kiangkap ih um mi pawl thawi kan pehtlaihawknak khal a danglam vivo. Hlan kan nu le pa rinsannak nun ihsin, mahte nun, pehtlaihawknak nun, nundan a phunphun le kan kiangkap ih a cang mi thil pawl thawn milaw ih nun ah kan thanglian. Hi nundan hi kawhhran le a member pawl nun khalah a um a si. Caan a herliam vivo ih pehtlaihawknak khal a danglam vivo. Midang an thanglian deuhdeuh laiah thenkhat cu an tumsuk. Remthatnak um cuang loin can a rei vivo khal le pehtlaihawknak thenkhat cu a nung peh vivo thotho. Kan nauhak laiih kan neih mi pehtlaihawknak tam sawn cu pitling kan si tik ahcun an rak hlo thluh zo a si.

[11.72]

"Hlanlai can" kan vun mangih kan rualpi hlun pawl kan vun ruatsal tikah ziang an cang ti kan mang a bang theu. Anmah thawn pehtlaihawknak kan rak neih ringring lo hi mawh nei ah kan ruat aw pang theu, a sinan ziang hrangah maw? Kan nunnak lamzin ahhin umkhawmnak hmun pakhat ihsin a dang pakhat ah kan thawn aw vivo. Kan innhnen le sungkua rualpi in kan thok ih, kan tlawngkai pi rualpi pawl thawn cutin pehtlaihawknak a kau deuhdeuh, cu hnu ah phunsang tlawng, ralkap a si lole hnatuannak ah kan lut ih rualpi pawl thawn pehtlaihawknak thar kan thok lala. Nupi kan neih tikah, kan rualpi pehtlaihawknak cu kan nupi ih rualpi pawl in in bet ih, hi a tum sawn mi pehtlaihawknak cu ti thul nuam deuhdeuh ah a cang. Te le fa pawl in in run bet ih kan pehtlaihawknak cinri a danglam ter deuhdeuh ih, leh hnu ahcun an pehtlaihawknak ah kan tel ve a si. A thanglian mi rualpi pawl thawi kan pehtlaihawknak cu a kel ten a feh vivo a bang. A cangcang ahcun a feh cak zet nan cangcang ahcun feh lo lawlaw tla a bang theu, cutivek thotho in kan thlarau nun le kan pehtlaihawknak khal a si ve.

[11.73]

Khrihfa kan si vekin, kan pehtlaihawknak pawl cu midang thawi thlarau lam ih kan pehtlaihawknak in tampi ro a rel a si. Leitlun ih kan umnak a si lole kan Bible theihfeng dan a thlengawknak hin Khrihfa kan pehtlaihawknak khal a sawhkawi a si. Kan tumtah mi le kan zumnak in tawmpi tu pawl hnenah hip in kan um. Hivek thil a can tikah kan pehtlaihawknak le thil umdan thar parah Pathian hi thupi bik in a cangvai a si ti hi kan theih a tul. A thlengaw mi kan nuntu khawsaknak ah le thlarau lam kan pehtlaihawknak ah zo a tel ding ti hi Pathian ih khiah mi a si. A thlengaw thei mi a si ringring ko nan, kan naihniam mipawl cu kan rualpi a naibik pehtlaihawk mi ah an cang theu. Thlengawk hi a dan a si, thlengawknak hi a tha ih, Khrih ih kan thanlen theinak dingah a tul theu mi a si. A sinan ralring uh, Satan khal hi pehtlaihawknak ti danglam tu a si ve. Nan pehtlaihawknak ih thlengawknak in Pathian a lo naihter deuhdeuh maw zohfel aw.

[11.74]

Kan Kawhhran innhnen pawlkom in a lenglam ih mi pakhat khat thawn pehtlaihawknak neih kan duh hi a tha a si. Kan pehtlaihawknak cu kan kawhhran sung lawng silo in cu hnakih kau sawn ding a si. Hi pawlkom pehtlaihawknak ih tel mi pawl hi, an zaten a si lo hmanah, Pathian ih ruat an rak si. Pehtlaihawknak hin tuanvo a phur cih a si; kan pehtlaihawknak sungih Pathian in a run thlenter mi pawl hmuahhmuah parah leiba kan nei. Mihrek khat teh Pathian theilo an sile, ziangtin kan tuah ding? Zakiah cu Pathian theilo a sinan, Jesuh cu Zakiah hnenah hruai a siih, rawl an ei tlang. Zakiah hnenah Jesuh in ziang leiba a nei? Jesuh in thutak leiba a nei ih cucu a hnenah a pe a si. A rahsuak mi cu, Zakiah cu zumtu ah a cangih a hlan ai ih mi tha sawn ah a cang. Jesuh in Zakiah ih tul mi a pe; Anih in Zakiah ih tlaksam mi a pe.

[11.75]

Kannih khal, kan kimvel ih um mi pawl ih tlaksamnak ah bomnak pek ding hi kan tuanvo a si. Hnemnak lole thazang peknak kan pek a tul mei thei. Nunsimnak lole kawknak khal a si mei thei. Kan theihnak lole fimnak khal a si mei thei. Kan umnak inn lole sumpai tla kan hlawm ve a tul mei thei, a sinan ziangkhal va si sehla, pehtlaih awknak kan neih mi pawl ngaihsak dan ding kan tuanvo kan theihfeng tengteng a tul.

[11.76]

Khatlam Zawngin

Khatlam zawngin malte kan zoh hnik pei. Nang hi a dang pawlkomnak sungih tel na sile annih in na parah tuanvo an nei. Rualpi tam deuhdeuh na neih a sile, na tul mamawh can ah a lo ngaihsaktu ding na nei tha deuhdeuh tinak a si. Nan pawlkom le na rualpi pawl ih pawlkom cu bangaw thlepthlep an si lo hmanah, bangawknak malte tal cu a um ko ding. Hi pawlkom pawl hi Pathian in bangaw thlepthlep ding a ti cuang lo, bangawk lonak um ding hrimhrim a si. Cutin, pawlkom zaten a si lo hmanah, pawlkom tampi pehtlaihawk ding hi a duh mi a si. Pathian in, Jesuh ih zarah, can le khawvel pum huap pawlkom pehtlaihawknak a tuah a si; cui pehtlaihawknak ih kauh zia cu A fapa neihsun zumtu hmuahhmuah tel theih a si.

[11.77]

Kawhhran Vek Thotho In Member Khal
Venghnen pawlkom kawhhran, member tin, in a hlat le nai ih um pawlkom fate dang pawl thawn pehtlaihawknak neih ding a si. Kawhhran tin hi Khrih ih taksaruangpi ih tel a sile, a dang taksapeng pawl thawn pehzom aw ding a si, cuti locun amah ten a nung thei lo. Kan harhdamnak le kawhhran ih kan dinnak cu cutivek pehtlaihawknak parah a thum aw a si. Kut cun ban thawn pehzawmawknak nai tak an nei, a sinan liang thaw cun malte an hla aw deuh. Ban cun kut thawn pehzomawknak a neih ih betah taksapeng dang thawn pehzomawknak a nei, a sinan an zaten thisen in a pehzom hai thluh. Cu tivek thotho in kannih, kawhhran, pawlkom fate khal hi hna kan tuan cio, a sinan thisen in kan zaten pumkhat ah in tuah. Theihnak hna a neitu cun, Thlarau in kawhhran pawl hnenih a sim mi hi theih seh.

[11.78]

Pehtlaihawknak In Thupitter Ding Mi In Sim
Kan bomnak pek dan ding cu Bible ih in sim vekin a hmaisabik ah tisa ih kan sungkua pawl, cun kawhhran zumtu sungkua, cule pehtlaihawknak kan neih mi kawhhran sungkua tin a si ding ti cu kan rak zir zo. Hi dan thlun in, Pathian in kanmah thawn pawlkomawknak nei dingih a run hruai thar mipawl hi kan ruat that rori a tul, pawlkomawknak kan rak neih ih kan nei rero lai mipawl hnakin. Pehtlaihawknak hlun cu a pahnihnak ah a cang thlang a si.

[11.79]

Bulpak cio in siseh kawhhran tin in siseh hi leitlun ih tul mamawh mi zaten kan bawm thluh thei lo. Khrihfa kan unau pawl ih tul mamawh mi hman a zaten kan bawm theilo a si, cuiruangah zo kan bawm ding ti hi ziangtin kan relcat ding? A sinak taktak relin, bomnak peknak hi thliarhrannak a si. Mi pakhat ih tul mamawh mi ka bawm duh a sile, a dang pakhat cu ka hnawl a tul ding. Africa ram ih rilrawng nauhak pakhat cawmnak ding daih cu ka nei ih a sinan India ram ih rilrawng a dang nauhak pakhat cawmnak ding daih cu ka nei lo thei. Ziangtin ka tuah ding? Mi hmuahhmuah hi kan bawm thei lo ti a fiang. Africa ram ih nauhak cu ka rualpi a si ahcun, kan pehtlaihawknak in ro a rel ih ruangah ka rualpi ih tul mamawh cu ka bawm hmaisa ding a si. Hi ruangah hin a si, Pathian in pehtlaihawknak kan neih ding a duh, cui pehtlaihawknak Pathian in kan thinlung sungah le midang pawl ih thinlung sungih a ret mi vekin cangvai ding kan si.

[11.80]

Thuthang Tha Hrangih Peknak
A hmailam ih kan rel zo mi pawl zohsal tikah mi tampi ih tul mamawh mi bomnak ruangah kanmah cu neih mi nei nawn lo a si lole sumpai hleifuan nei nawn lo khi a bang, a sinan cucu a dik lo nasa. Nunnak hrangih tul mamawh mi bomnak malte a si lole pek lo ih um theih can tampi a um. Kan pawlkom sungih mipawl in nunnak hrangih lo theih lo tul mamawh mi pawl a daih ih an neih can ahcun, lenglam ih Pathian ih kan sungkua pawl hnenah pek theinak kan nei, cutin Pathian ih duhdawtnak maksak cu an hnenah kan langter. Hi tivek tuah a si tikah, sunlawinak hmuahhmuah cu Pathian hnenah pek siseh la, zumlotu hnenih pek mi bomnak cu thuthang tha thawn mawi zetin tuam siseh.

[11.81]

Khrifa hnatuan tampi hi khawvel zumlotu pawl hrangah zirhnak, hla, le Bible thu simnak tla an si ih a cang theitawk in hi hna a tuantu pawl hnenah bomnak kan pe ding a si. Khrih thuthang tha hi thim lakih vak rero khawvel mipawl hrangah nunnak a si. Bomnak peknak in thim a cennak hmun thinlung sungah eng peknak can tha kan nei. Hi bomnak peknak cu sunglam ihsin a ra mi a si a tul. Thlarau Thianghlim hi lam in hruaitu a si rori a tul. Anih in kan thinlung sungah cop le cilh in a tulnak a fiangter dingih kannih in a tul dan vekin kan tuahsuak ding a si.

[11.82]

Duhdawtnak Bomnak Thilpek
Kan neih mi sung ihsin kan duhdawt mi pawl hnenah, an tul mamawh tuk ruangah khal si loin, malsawmnak hrampi ah le kan duhdawtnak langternak ah le anmah lomnak ah, bomnak thilpek kan pek ding hi Pathian in a siang a si. Hi tivek peknak hin a dongtu lawng si loin a petu khal mal a sawm, ziangahtile an pahnih parah lungawinak a thlen a si. Peknak hmuahhmuah hin lungawinak a thlen ko nan, thudang zianghman um loin duhdawtnak ih kan pek tikah malsawm in kan um a si. Siang zetih a petu cu Bawipa in a duh a si (2 Kor. 9:7).

[11.83]

Rongbawlnak Hrangih Innsang Kawhhran Bomnak
Phurnak, sia le tha theihnak a si lole tumtahnak thawn siang zetin kan zal kan purh hlanah, tuah ding tha ih kan ruah mi hi kan theifiang taktak maw, kan peknak hnatuan hin hnatuan paih lo ih mi rinnak a suahter maw, mi tanlaknak a siatsuah maw ti le, mi pakhat hnatuan paih dingin duhnak a suahter maw ti tla kan ruah ta a tha. Mirang (USA) ram ah, mi aa ziang siarlonak le duhdawtnak ih a tul lo mi bomnak peknak in pianpi thilti theinak a siatsuah zia tahthimnak thupi zet kan hmu. Mirang pawl (USA) ih duhdawtnak ih ruahnak peknak famkim lo cun meithal hnakin, a pungzai rero mi Indian mipawl, America ram rak luah hmaisa tu pawl kha a siatsuah sawn a si. Theihnak tlaksamnak a si lole thatei kilkhawiawk lonak hin khawvel pumhlum hmun tampi ah innsang a siatsuah a si.

[11.84]

Mirang (USA) a cozah in lungkimtlangnak an bawhsiat mi theiin, tuarnatnak ruangah, Washington cun ningzahnak ihsin rampi hmaihngalnak a thlen sal theinak dingah a hmannak ding rak tiarcia hrih lo mipi pawl hnenah sumpai tamtak bomnak peknak in a rak zuam dah. Hi bomnak hin hnatuan paihnak a siatsuah; hnatuan ngaisannak a lak hloh, sum hawltu lole sungkua cawmtu thupitnak a nep ter ih kilkhawitu a cozah ringin mibur lakah zetnak a suahter. Hi bomnak sumpai tamtak, alak ih si le vai tuamhlawmawknak, alak ih thinlung lam harhdamnak enkolawknak, alak ih fimthiamnak zirnak le a dang tuamhlawmawknak pawl ngahtu le, ram la rero tu Europe mipawl hnenih si an ngah thei lo mi hlawknak centu pawl in US a cozah din in, USA ram mi ah an cang a si.

[11.85]

Hi siangzet ih peknak ih rah tla cu mah le mah thahawknak aiih tam sawn thihnak, zu le sa cennak karhzainak le rit thei thil hmannak tla an si, cu mi cun rak tumtah lo mi dinhmun sawn a suahter a si. Lennak silo in farahnak kan hmu. Lungfimnak silo in ngaihsak awklonak kan hmu. Tuan duhnak silo in, ruahsannak nei lo, zetnak, le tlaksiatnak kan hmu. Hi siatralnak hmuahhmuah hi siangzet ih peknak ti mi hmin ihsi ra thleng a si, cui siangzet ih pek mi bomnak cun kan bom mipawl kha nasa takin a siatralter a rak si.

[11.86]

Leitlun ramtin ah mi farah tete an um. Thungai in, farah taktak ram thenkhat an um. Cupawl hrangah hmin thar hman kan pe; cupawl cu "a thangso lo mi ram pawl" tin kan ko. Kanmah vekih malsawmnak a dong lo mi pawl hnenih bomnak pe duhtu ram, tirhsiang tiih kawh mi ram sungih ka rak tel hi ka lung a awi zet.

[11.87]

America ih tirhsiannak hi mi tampi theih a si ih America ih pek mi ramdang bomnak ringih a thanglian mi ram tampi an um, a sinan America rampi ih a beisei mi rah cu cui bomnak pek mi in a suahpi lo a si. Paisa hi thil tithei zet a si ih thatnak a si lole siatnak ah hman a theih. Tumtahnak tha neiih peknak khal hin an harsatnak zangkhaiter ding beisei ih bomnak kan pek mi pawl rori hi a siatsuah thei ti hi kan theihhngilh theu. Thukham Thar kawhhran ih a rak tuah hmaisat mi hnatuan pawl tuah dingih a hlan aw mi, Thukham Thar ih Khrihfa u le nau tla, hi famkim lo khawruah peknak ih bomnak peknak sungih kan tluk lo nak dingah kan zuam a tul ngaingai a si.

[11.88]

Thlanglam America rampi ih Europe mipawl an ra then hlanah, America ram neitu miphun dangdang pawl cu anmah ten nunnak hrangih tul mamawh mi le cuitlun hman an cawm aw thei. Ni khaw kheng, vur dai, le a dang harsatnak thil thleng mi khal an rak tuarsuak ih an nung. Beunak, rawl le hnipuan khal anmah ten an rak hawlsuak thei. Hi thil le ri pawl cu Europe mi pawl dinhmun thawn bangaw lo hman sehla, dinhmun awmtawk a si ih, a dang India miphun pawl thawn bangaw an si, cun ni khat hnu ni khat, kar khat hnu kar khat, kum khat hnu kum khat an nung thotho.

[11.89]

Dungthluntu Paul bangin, rawl le hnipuan an neih hi an lung a kim tawk. Anmai pursum leilawnnak dinhmun te ah nun dan ding an thiam ih, cucu kannih Khrihfa, a thangso lo mi ram ih um kawhhran pawl khal in kan theih a tul mi a si.

[11.90]

Hi kawhhran pawl khal hi lenglam bomnak um loin anmai dinhmun nundan kel ten nung thei ding an si. Lenglam bomnak tel loin kum zaza an rak nung zo. Anmah ten an hnipuan, an beunak le an nitin rawl an rak hawlsuak a si. Hi ruang ahhin, tui ni tiang an um ih Pathian lalram sungih luhnak Jesuh Khrih thuthang tha cohlang dingin an tiarcia a si.

[11.91]

Inn ih a pumkhawm aw mi hlan lai kawhhran bangin, a thangso lo mi ramah kanmah thawi bangaw kan hmuh ding hi thil tha a si. Khrih ih din mi Thukham Thar kawhhran, Dungthluntu pawl kawhhran ngaina in cu tivek dinhmun ih kirsal duhtu, kanmah vek kawhhran thawi feh tlang ding cu a tha a si. Cupawl kan bom duhnak ah hin Pathian a lung a awi ngaingai a si. Cupawl thawi kan pehtlaihawknak ah a lung a awi, a sinan kan ralrin a tul.

[11.92]

Pangpar pawl cu thatei tuamhlawm le tidai toih an si tikah an hung thang. Hi thil pawl an tlaksam tikah a si lole tul mamawh hnakih tam sawn an ngah tikah an thi a si. Hi kawhhran, a hung par mi, Thukham Thar kawhhran pawl hi ziangtin kan va pan ih ziangtin kan tuamhlawm ti kan ralrin a tul ngaingai. Hmun hla ih kan kawhhran unau hnenah thlatin ten sumpai ziangmaw tizat kuat in bomnak pek ringring hi kan tuah lo ding mi a si. Cutivek peknak cun mi rinnak le hman sualnak tha a pe a si. Ziangvek bomnak khal kan pek hlanah, kan bom duh mi kawhhran hrangah kan sumpai bomnak lole kan sumpai bomnak pawl hin ziangvek rah a suah ding ti hi thatei ruat in can kan lak ta a tul. Siang zet ih kan bomnak ruang khal in hlawknak ngah kan tum lo ding khal hi kan ralrin a tul.

[11.93]

Bomnak kan pek ding mi hi kawhhran taktak a si lole bulpak mi tlasam a si lole mi mumal lo le zianghman ruahnak nei lo bomnak petu pawl hnen ihsin fim hrokhrawl takih sumpai la tumtu an si maw? Ziangtin kan thei thei ding? Theih dan ding lamzin pakhat cu cui kawhhran a si lole bulpak thawn thla thum a si lole cu hnakih tam pehtlaihawk can lak ding hi a si. Bomnak ngah beisei tu in hi can thla thum sungah thil, a hleice in sumpai an lo dil le dil lo zoh aw. An lo dil a sile, ziang hrangah an lo dil ti kha thaten zohfel aw. Sumpai rori maw an lo dil, a si lole Bible leinak dingah an lo dil? Mitkharh hrangah maw, hna cet hrangah maw, a si lole si le vai bomnak maw an lo dil? Cui bomnak ngah duh tu va veh vai thei tu ding innsang kawhhran lole pawlkom theih mi an um maw?

[11.94]

Nan bom ding mi kawhhran va veh dingin, an hruaitu pawl le mipi pawl va tong dingah cutawk kiangkap ih kawhhran hruitu nan theih mi pawl zangfah dil hi a tha mi a si, cutin annih in tul mamawh mi an va zoh dingih an hmuhsuah mi pawl cu email in an lo theihter ding a si. Thuthimnak ah, Africa ram, Ghana khawpi ih um Baptist kawhhran pakhat ih pastor nan bia ih, Ghana ih nan bom ding mi kawhhran a si lole mi tlasam bulpak nan bom ding mi kha va veh dingin nan fial, cutin anih in (1) bom tul mi a um taktak maw (2) nanmah thawn a pehtlaih aw mi kawhhran hruaitu pawl an um taktak maw (3) khawmawknak teh an nei thei ringring maw ti le an tul mamawh bik mi taktak a si maw ti pawl tla a va zohfel thei ding a si. Cui Baptist pastor in an thurin lole an khawmawk dan cu a pompi lo hmanah cucu a thupi lo. Nan theih tul mi sawn cu an bomnak dil mi hi an tul mi taktak a si maw ti le hi kawhhran a si lole mi tlasam bulpak hi a um taktak maw ti hi a si. "Zuk pakhat hi tongfang thawngkhat thawn an bangaw aw" ti a si. Curuangah cui innhnen pawlkom kawhhran in zuk an lo kuat theu hi a tha tin kan hmu. Bomnak nan pek mi in an lei mi Bible pawl, Mitkharh pawl a si lole a dang bomnak nan pek mi pawl zuk, hruaitu pawl ih zuk le unau pawl an khawmawk lai zuk pawl an lo kuat a tha.

[11.95]

Zuk pawl hin pehtlaihawknak duhnung tak kan neih mi ramdang innhnen pawlkom kawhhran thawn kan pehtlaihawknak ah thazang mi a pe ih pehtlaihawknak a hngetkhoh ter sinsin a si. Cui zukpawl cu sungkua zuk tin kan ruat pei. A can can ahcun, mirang ram (USA) ih innhnen pawlkom kawhhran unau pawl in kan  kawhhran unau umnak hmun ram dang ra tlawn theinak can tha tla a um theu, cutin kan pehtlaih mi ram dang innhnen pawlkom kawhhran ih thuhla diktak tla kan thei thei a si. A cang thei a si ahcun hi va tlawn theinak tikcu can tha hi kan lak thiam a tul.

[11.96]

Dungthluntu bung khat sungih kan hmuh mi hlanlai kawhhran hi a thangso lo mi ram ih kawhhran ah kan ngai thei a si. Hi kawhhran hi a farah mi, harsatnak lakih talbuai rero le Rome kut hnuai ah siah pek ding phurrit tak ih nen mi kawhhran a si. Sihmansehla ni khat hnu ni khat, kar khat hnu kar khat, le kum khat hnu kum khat an talsuak vivo. Khawmawknak ding inn an nei, hruh ding hnipuan le ei ding rawl an nei, an neih lo tikah mi tin an tul dan vekin an neih mi le an thilri an zem aw a si. Rin lo thil thu ih tul mamawh tuk dang ih a bet lo a si ahcun hmun hla ih kawhhran dang pawl hnenah bomnak an dil a tul lo. Rin lo thil cu ziang a si? Pampi, ral, hremnak lole amah te thleng harsatnak pi tla hi rin lo thil an si. Jerusalem kawhhran in hi tivek rin lo thil thleng a tuar tikah, Asia khawmual ih kawhhran pawl in duhdawtnak in tul mamawh mi cu an bawm a si.

[11.97]

Ram dang ih kan unau kawhhran hnenah thlatin bomnak kan kuat a si ahcun, kan bomnak pek mi ring dingin thazang kan pe ah a cang thei ih annih in cui bomnak an ngah mi ih zirin hnatuan an tum thei a si. Kawhhran karhzainak dingah biakinn a tul lo ti kan thei. Cui ram dang kawhhran cu kanmah in theih hlan khal ah nitin an rak nung thotho ti kan thei ih, kan bomnak tel lo khalin an nung vivo thei ti khal kan thei. "A tul dan ih zirin" thil kan tuah ding mi a um. Hi tongfang "a tul dan ih zirin" ti mi hi missionary bawmtu hmuahhmuah hrangah ralrinnak tongkam a si a tul. Hi thu tarlang mi a siartu pohpoh in hi tongfang hi nan cin ringring kan lo forh duh a si. A tul dan ih zirin, a tul dan ih zirin, a tul dan ih zirin.

[11.98]

Ghana ih innhnen pawlkom kawhhran ding pekte in Bible leinak ding in dil, ziangahtile Bible bu khat ah dollar fang 8 a si ih cucu an hawlsuak thei lo, cu tikah bomnak pek ding hi tha ka ti, a sinan an leinak tei dawr ih an zuarnak cazin in kuat ding cu ka ngen duh thotho a si. Hi mi farahpawl lak ahhin mit tha a tumsuk mi an um, curuangah Pathian thu sunglawi an siar theilo a si. Dollar fang 5 man casiarnak mitkharh leiih kuatnak in hi a sunglawi zet mi bomnak hi kan tuah thei a si. Mi hrekkhat cu an hna theihnak a tumsuk ruangah thuzirh mi an thei theilo ih dawr ih an zuar mi dollar 20 man hna cette in thei thei sal dingin a bawm thei a si. Hi duhdawt mi unau pawl lakah pakhat khat cu rinlo pin sizung kaiin a tul mi si le vai tuamhlawmawknak ding sumpai an daih awk lo can khal a um ding. Hi unau pai nunnak run dingah (Western Union) bank ihsin sumpai bomnak hi kuat hi lamzin umsun khal a si mei thei, a sinan sizung ih an cem mi sumpai cazin cu ngah dingin dil sal rori ding a si.

[11.99]

A hlan ih sim zo bangin, tul mamawh lemlo a bang mi bomnak peknak khal hin thlarau lam hlawknak a suahter can khal a um. Thuthimnak ah, Liberia ih a ding thar mi kawhhran fate pakhat in bomnak an ngah mi sumpai thawn meisa khawl fate pakhat an lei. Meisa khawl cu, pawnlang ih zoh men cun, thil tul lo le mamawh lo thil a bang mei thei. Liberia ahcun an ram buainak netabik ihsin kum hra sung electric meisa an nei lo. Cui pawlkom hotu, sathau meifar thawi Bible zirhnak rak tuah ringring tu cun cu tivek meisa khawl neih ih hlawknak cu a theifiang, ziangahtile zumlotu pawl cu cui bomnak pek mi meisa ruangah Bible zirnak ah hip an si ding ti kha a thei a si. Cupawl cu eng (meisa khawl ih eng) in Eng (thuthangtha eng) sungah a hruailut ding tiah na ti thei a si.

[11.100]

Cu tivek bom dilnak pawl cu bulpak pakhat teten thaten zohfel ih rel a tul. Bomnak petu kawhhran lawng si loin bomnak cotu kawhhran khal in thaten an rel dingih cu lawngah thuthluknak tha an tuah thei ding. An dil mi hi tul mamawh lo ih ruah can ahcun kan lo bawm thei lo ding ti hi a poi lo a si. A sinan simfiangnak tha tei kuat ding hi kan tuah ding awm a si. Kawhhran pakhat tuanvo laksak hulhualnak ah sumpai kan thawh lo ding a si lole tha khal kan pe lo ding a si. Hi Thukham Thar dan bawhsiatnak cun siatralnak a thlen tengteng ding ti a fiang.

[11.101]

Nan bomnak thilpek cu "a tul dan ih zirin" pek ding a si, a ringring, thla tin ih pek ding a si hrimhrim lo ti hi nan cin ringring a tul. Mission hna a tuan mi nan kawhhran unau ih hruaiawk dan nan rinsan hnu ahcun hruaitu lole hruaitu pawl ih kaihhruai dan vekih hman dingah sumpai bomnak nan kuat duh can khal a um ding, hihi kan tuah theu mi khal a si, a sinan cui hruaitu lole hruaitu pawl in an sumpai hman dan simfiangnak cu felfai zetih in kuat a tul a si. Nan kawhhran unau hnen ihsin a mal bik kar khat voi khat tal email cakuat nan ngah ding a si. An hruaitu pawl ih hmin pawl le an member pawl ih dinhmun nan theih a tul, cutin hruaitu nan si vekin, thlacamnak in thaten nan bawm thei dingih, an cakuat pawl cu mipi theih ah siar in an hrangih Pathian hnenah dilsak dingin kawhhran zaten thazang nan pe thei ding a si.

[11.102]

Kan ram in America ram neitu Indian pawl parih an rak tuah sual mi vek tuah lo dingin ralring uhsi. Duhdawtnak ih bomnak petu le mifim si tum sawn uhsi, fimkhur lo, a dil lo mi bomnak peknak, an rinsan ding mi cu Bawipa a siih ruangah kan bomnak pek mi rinsan tu ah canin, sal sungih mi thlentu bomnak peknak pawl hmangin kan bom tum mi pawl hi siatsuah hlah uhsi.

[11.103]

Khawruah Netabik

Leitlun ahhin ngaihtuah tlak thuhla thatha tampi a um. Ram lian le thil tithei rampawl in pehzomawknak an neih mi a dang rampawl ah bomnak an pe. Pawlkom pawl khal in thupi hlapi tinkim hrangah sumpai an hawl cio. Mi hrekkhat cun natnak rapthlak ti damnak dingah sumpai an hawl. Mi hrekkhat cun mi farah pawl ih taksa harhdamnak tuamhlawmnak dingah sumpai an hawl. Hi pawl lakih a tam sawn cun hi nunsung ih ton mi harsatnak bom an tum, a sinan a ra thleng ding mi can hrangah bomnak an pe lo. Kan bomnak pek mi hin harsatnak a zangkhaiter a si ahcun a tha ko, a sinan Khrih hnenih a hruai hai a si ahcun, a tha sinsin. Mi pakhat in hi leitlun pumpi hi neiin a nunnak a can a si ahcun, a hrangah ziang thathnemnak a um (Mk. 8:36)?

[11.104]

A hleice in taksa tidamnak lam a si lole khawsia dawisuahnak tivek lam ih bomnak petu mi bawmtu Khrihfa pawlkom tampi an um. A dang pawl cun mifarah an cawm ih thuthang tha an thehdarh. Thenkhat cun nauhak, thenkhat cun thalai, le thenkhat lala cun pitar putar pawl ih tul mamawh mi an bawm. Thenkhat cun thinlung lam mi banglo pawl an kilkhawi, cutin a dang dang khal tampi a um lai. Minung ngaihsak awknak hminin bomnak pe in  Khrih thu a sim lo mipawl hnakin, hi tivek rongbawlnak pawl ahhin kan bomnak thilpek pawl hi pe sawn ding kan si.

[11.105]

Thusuhnak pakhat a um lai. A tlunlam ih bom tul mi khuimi bik in, mahte pawlkom neiih hnatuantu hlawhman pe ih inn le lo lei a tul? A tlunlam ih bom tul mi khuimi bik hi kawhhran pakhat ih a khawmaw mipawl ih bom thei lo ding mi? Khui mi hman in Thukham Thar ih rongbawlnak a pahbal lo a si. Mi farah, mi na, thinlunglam mi banglo le khawsia ih polh mi pawl cu Khrih in hi hna tuansuahnak dingih in pek mi cetpi, Amah le Dungthluntu pawl ih an rak din mi thlarau lam inn, kawhhran tiih kan kawh mi in a kilkhawi hai ding a si. Khui mi rongbawlnak in nan bomnak a co tlak tin nan ruat? Tul mamawh deuh le deuh lo tivek tahnak nan nei maw, ziangmi hmangin nan tah? Jesuh in, "Hi ka unau pawl lakih a tenaubik pakhat hnenih nan tuah mi cu keimai hnenih tuah nan si," tiah a ti.       


<Bung Hmaisa I A Sung Um Thu I Bung Neta>