AMAI KAWHHRAN MAW KANMAI
      (Pawl Thlarau Zawngin)

Hminsin:  Cangantui dinhmun theifiang dingin, “ Casiartu Hnenah”  timi hi siar hmaisa aw.

[15.1]

Kum zabi kulnak hin a somsoh mi cu mibur tampi leh kawhhran tampi cun kawhhran sungah kan um nawn lo ti in an phuangsuak aw culci hai; mibur hotu ka si a ti na, Lamzin ka si a ti aw na, cule Kerep hmuan a ti aw na an si celcel. A hrekkhat lephei tla cu dankel vekin kawhhran hruang sung khalah an um tha duh nawn ta lo. Cun hrekkhat pawl ve thung cu zirnak tlawng inn tivek ah cawn dingah tonkhawmnak an tuah. Mihrek khat pawl cu tonawk ti khal nei hai lo in an inn ciarah an tawp aw thluh. Tonkhawmnak hi tul an ti lo ih an tonawk khal le theih bang thu lawnglawng an ruah aw ciamco. Bulpak cio hin zomkhawmnak vekin an tuah aw aw ih tonkhawmnak hri in an uk aw ih cumi dan in an hruaikai aw. Bulpak in siseh an hotu pawlin siseh mai tualsung cio hrang lawngah hna an tuan ih thansohnak lam ti in thurin thi kha an zirh aw hai, hi thu hi kan thupi neta ah kan zir uar leh ding.

[15.2]

Mahte Zalen takih ukawknak kawhhran kaihhruai awknak vekin kan rak simcia bang khan an kai hruai aw aw ih kawhhran zate ti in zomawknak tuah in Khrih hrangih mino, Hruangsungih thuthang tha sim leh Thalai le Mission hnatuan tivek in a ti aw celcel. Hitivek ih cangvai tu pawl hi cun kawhhran hmin kengkawh duh lo in an um. A tam sawn cun ni tampi leh can tampi tonawk cu an uar zet nan kawhhran picang deuh pawl vekih tidan hi cu an duh lo. Hitivek ih an cangvaihnak ruangah phunglam kawhhran pawl ih soiselnak in an luat thei hai. Curuangah tualsung kawhhran zawm dingih thazang peknak ahcun (a rak dipzaptubik cu kawhhran picang hi an rak si), kan kawhhran hnatuannak ah, kan rualpi tha vekin kawm tahrat in kan tuah a tul. Hitivek cangvaihnak ahhin Billy Graham ih Evangelist Crusade nak hi a hleice danglam takin a hlawhtling duhzet lehhngalh, cun khatlam zawng ahcun hitivek pawl nei lo pawlih cangvaihnak hin phunglam kawhhran hi a ti cak ve thei. Zomawknak an rak thawh lai ah kha cun phunglam kawhhran pawlih rualpi tha si hi doawknak hnakin an uar bik mi a si.

[15.3]

Zo so pawl thlarau neitu pawl thawn ralsan aw ngamtu um ding? Leitlun mit cun pakhat pa hin hi ti tla in a hmu men thei. Zal bannak neilo kawhhran pawl hi mi va lemluh ih a tambik kawhhan hman hruai luhnak lam ahcun an cak nasa, curuangah annih hi leitlun ih a cak bik mi zomawknak an si tla a ti mei thei.

[15.4]

Hi kawhhran mumal nei lo pawl hi fiangte'i kan rel a si ahcun an tumtah mi cu Khrihfa tampi thangphawknak meisa muah an tumtah, rundamnak ah lungawinak lungthin khal nei thei nawn lo pawl cokphur tu ding si hi an tumtah. Bible lo vekin an cangvai ih phunglam kawhhran ih umcia mi mi thinlung an ti buai sak thluh. Hi kawhhran bulba neilo zom aw pawl hi pawl khuar kan ti thei lo ding maw? Hibang pawl hi kawhhran an si kan ticeng lo ah teh ziang hi ha kawhhran cu si ding, a hman te'i kan sim a si ahcun annih pawl hi kawhhran an si. Bible vek cun an silo deuh nan ziangkhal a sile Pathian ih kaihhruai lomi pawl cu Pathian hnatuan kan ti theilo a si. Hi bang pawl hi Pathian ih hnatuan an silo a sile minung hnatuantu an si tinak a si. Ka sim zo vek khan tidai bualnak cawm sungih nauhak pa te thil hlon vek kha cun a se zawng cun hmuhsak lo sehla. Ziangahtile Pathian ih Thlarau Thianghlim cu mitin hnenih a um ruangah, leh zumtu kawhhran nei lo pawl hnen khalah a um ve. Hi kawhhran nei lo pawlkom pawlih an tumtah mi tak cu Pathian ram kauhnak ding hrangah thei
tawkih hnatuan ve an si ruangah hmunkip ahcun an sual ti ih mawhthluk thluh ding cu an si ce lo. Cuti a sile ziang kan sim duh? Midik cun thil dik a tuah nan a sual mi cet vek a si. A sual mi cet vek si cingin Pathian ih Thlarau huham cahnak hmangin cangvaih an hmang, na theih vekin Pathian thu cu thil ti theilo in a kir dah lo (Isa.55:11). A dik mi cet cu tui hlan kum 2000 hlan deuh ah khan Khrih in a kawhhran hnen le kan hnenah in rak pe cia zo a si.

[15.5]

Mi a thawngthawng in hi kawhhran cuca lo ihsin an kirsal ciamconak hi a sual maw sual lo ti cu ka thei lo. An meeting lai ihsin mi thawng tampi cu an nun thlakthleng in Khrih an pan ciamco, a sinan an zirtirnak hmun le kawhhran an thlen cio tikah thlarau ah an ti a halsal nan mi tampi cun zianghman in ding leh ei ding an tong ngah thei nawn lo, rilrawngin mi an hngak ringawt men hai a si. Hitivek ih thlarau tamtak cu an ti thi ziangahtile malte hman an cawm aw thei nawn lo, thil hlun, a mawr zo mi le rawl barkhat hrawng lawng hin an cawm hai ruangah a si. Thuphan thu hin a nekcep nasa hai a si. Hi kawhhran bulba nei lo pawl hin Khrihfa unau itthat tampi an thangharh ih Pathian thei lo mi tampi kha Khrih ih ke hramah Pathian thutak cawhnawi ih cawmnak in an hruailut hai. Cui hnawi ti cun an thazang a tlungter sal hai.Cui hnawi ti cun kawhhran bulba neilo pawl ih thazang kha Thlarau in a tlungter sal. Thil buaithlak pakhat cu cuvek ciah in kawhhranpi pawl khal hin rundamnak tlamtling thu (hnawi ti) hi zarh tin an zirh ve ih member pungphah vivo in an thanglian vutvo. An cawmnak hnawi ti kha cu soda phut rawi ih a dal zo vek khi a si. Pathian thunung hnawi ti cun kan cahlonak bik taksa kha thazang a tlung terih kan dung zarh ih a tanglai mi rawlthing ei vek a si. Hinah bumawknak ih nekcepnak hi hi kawhhran bulba nei lo pawlih thangharh ter ding mi a sinan an ngaihsak thei nawn lo. A fek mi kawhhran cun tidan kelte in an ti thei ih an ngaihven thei, a sinan an thangharh ter thei lo lala. Cutikah a netnakah Khrihfa tampi cu beidong in pakhat hnu pakhat in an kirsal ih a hak bik mi lungto vek an si thluh. Hi ti dinhmun ih an din laifangahcun thil ziangkim hi a harsa thluh ti in an ruat. Kawhhran sungah hin peknak thu, sansung hnatuan ihsin rak suaktu, hlum thupthi pawl leh a tawkfang ih um mi ti in miphun zakip an hmu hai a si.

[15.6]

Hi kawhhran lo ih dingtu pawl hi hmun hrekkhat tla ahcun mi tampi an siih hmundang ih pawl tumpi pawl tla an hip thluh thei. Kawhhran hminbul nei lo ih dingtu pawl hin kawhhran hmin bulba kan nei lo an ti ringring, lole pawl tin zomkhawm ti tla in an ko aw. Kawhhran hmin nei ih a dingtu pawl hi an do ih an tonawk khawmnak khalah hi thu hi an relbuai bik mi a si. Biak khawmnak ah tidan kel ih biak hi an duh lo, a sinan an tonkhawmnak le biak khawmnak ahcun biakdan kel ih betu pawl tidan vekin an kaihruai aw thotho. Baptisma an pe aw lo ih a sinan an tuu pawl cu thurin thi an zirh hai. An pawlkomnak hi hmunkhat ih luangtlang thei dingin an zuamih leitlun dan pakhat vekin an kaihruai aw aw. Kannih cu kawhhran kan silo ti in an puangaw a si lole kawhhran kan silo, lole kawhhran bik neilo vekin an rel aw ih thurin thi zirhternak in an kaihruai aw ih a sinan kawhhranpi feh dan an cawng thotho. Hi ti in kawhhran bulba nei lo in an kaihruai aw rero nan leitlun mi ropi pawl ih an rak zuam dah mi lalram rak din an tum vek khan tulai ahcun an tluse leh sal theu.

[15.7]

Zirhternak Thi
Nikhat cu mi pakhat pa khan a pu'i hnenah a paisa pung va pe dingin phur zetin a zung khan ah a va lut. Nuam aw ter takin a va lut nan a pupa cun hi pa hin a hnatuannak ihsin voikhat hman a paisa a pe thei lo a rak ti. Cule hnatuantu pa cun ziangah maw a ti, a pupa cun, "tui can ih pek cu kan company dan thawn a kalh aw," a rak ti. Minung vekin thuruat ding a sisi a rak ti san. Minung cu nunnak nei mi a siih ruahnak thleng theinak nei mi a si, a sinan nang hmuah ziangah hitin na ra tuah ti ah a ti. Na ti thei ve lo maw si a rak ti. Thlakthleng
timi hi thilcang theilo mi a si. Nang cun company ih ti dankel hi thleng na tum rero ih rei tukna rak to men a si hi a rak ti.

[15.8]

Thurin thi thu kan rel a sile a tlun ihta pa vek hi kan si. A dikfel mi kawhhran thurin kha a can theinak ding zawngih tawlrel in kawhhran member hrekkhat pawl pomter tumnak a si ti kha thei ringring aw. Saza pahnih khat hrangah tla cun a dik tla a si men thei, a sinan ziang
tin ha na remthat dan ding lole kawhhran pi thurin cu na thlengsak thei ding? Hi hnatuannak ah na nun pumhlum kha na pe tla a si thei, a sinan nehnak cu na co dah lo ding. A pakhatnak ah, hi hna hi na ngaidan vekin an lo ngaisak lo ding. An lo ngaisak hmanah na zawhmi lam an theihfiang hlan cu thu an lo sut rero lai ding, a si lole nangmah sawn khan suahsan hai dingin an lo dil ding. Kawhhran pi ahcun, thurin kha puansuah thluh a si, lole lungphek parah tla'n ngankhum a siih cucu an fehpi mi ah a rungcang, curuangah zo in hi fehpi mi umcia zo a thleng theitu um ding? Jesuh rori hman kha leilung mi farasi pawl hnenah lutin an dan pawl kha tlengsak a tum dah lo. An lakah umtlangin an feh dan kha a tha sawnih thlengsak a tum dah lo. Khatikhan thutak lengih mi kha thlun in, bia in, zirh aw hai seh a ti ih cule A hnenah an ra sawn ding a si. Hi Farasi pawlih thinlung thi hin a neh lo ding ti cu a thei cia ko, a sinan khai thurin thi zirh vivo ding kha a kham hai lo.

[15.9]

Thurin thi kan timi cu ziangha a si? Thutak rahsuak ding dawnkhamtu pawl khi an si.Cucun thlakthleng awknak ding a kham a si. Dan in a kalh pang hmanah a dik maw dik lo ti in felfai ten rem a ruat. A lenglam thil a hnawl ih, " kannih cun hitin kan zirh," a si lole "kawhhran pa le pawl ai in a sungah thu kan nei deuh ti na thei lo maw,"a si lole " Greek in ziang a sim duh timi hi fiang tei na thei a tul," tivek pawl kha a pompi thei lo. Hibang pawl hi an thurin kalh deuh mi thu elnak dingah bible bungcang a sangsang in an nei thepthep ih midang ih tannak hi ziangah an ngaisak lo, midang sim mi ruahtlak zet Pathian thu khal va si seh an ngaisan pi lo. Kawhhran pi le a hnatuantu pawl cun ngahcop leh thudik thangso cop ai cun hi a dikcia mi hi a thupi sawn an ti. Hi pawl cun an kawhhran thurin (insang tin zom) hi thurin parih sual phuan rero nak thurin sual hnak cun an kilhim sawn a si. Baptist kawhhran le Lutheran kawhhran pawl ah sualnak an hawl le tlansuah ngeingei tul in an thei aw aw. Cun luhsal an tum a sile zirternak sual ah an lut thuk zo ih a kawhhran zawngih um hi cu Bible ih zirh dan a silo an ti lala anmah te an zum aw theilo, (I Kor.1:11-13). A cang thei thotho lo e an ti. A hnuailam ih hmin pawl ; Luther, Wesley leh Williams ihsin Paul, Apollos le Cephas pawl in an rak rel ve, ziang a bang.

I Korin 1:11-13
11. Ka u le ka nau tla, nan lakah tawhawknak a um ringring ti kha Khalaw-i sungkhat pawl in fiangte'n in sim.
12. Ka simduh mi cu, mi hrekkhat in, "kannih cu Paul ih dungthlun kan si," nan ti; mi hrekkhat in "kannih cu Apollos ih dugthlun kan si," nan ti; mi hrekkhat in, "kannih cu Piter ih dungthlun kan si,"nan ti ih mi hrekkhat in "kannih cu Khrih ih dungthlun kan si," ti ah dangdang ciar in nan timi hi a si.
13. Khrih cu a thenthek aw mi a si maw? Nan hrangah thinglamtah parih an thah mi cu Paul maw a si? Paul hmin in maw baptima nan lak?

[15.10]

Voikhat in kan simsal hrih ding, kawhhran timi cu mipi umkhawmnak a si ih dan leh dun thawi kaihhruai awknak hmun a si. Kawhhran bulba lo pawl khal hi Khrihfa mi tampi zomawk nak dan hnuai ih dingmi a si ve. Hi kawhhran bulba nei lo midang thawi bangaw lo pawl hnenih Khrihfa pawl Pathian thu va zir leh hmunkhat ih Pathian va biaktlang hi thudik teh a si pei maw? An pahnih hin thurin thi kha mawi tak, thiam tak in, an zirh veve hai. A pakhat sawn hin tidan kelte in member a nei ringring ih pakhat sawn hin a nei ve thung lo. A pakhat cun kawhhran a ti aw aw ih a pakhattu sawn cun zumtu pawlih taksa ruangpi a ti aw ve thung. A pakhat kha cun a tlaitluan in tonkhawmnak a tuah ih a pakhat kha cun a neih le a nei men thei fang. An pahnih hin hruaitu felfai hi tualsungah lole zomkhawmnak ah an nei veve. Curuangah Kawhhran hi ziang a si timi kha kan cin ringring dingah a poimawh nasa. Kawhhran kan timi cu mi pahnih maw pathum simaw hmunkhat ah a tlaitluan ih an tonkhawmnak hmun leh an zemawk derhdonak hmun, thil tuahnak hmun a si. Rampai vekih a feh a sile rampai vekin a ai ih rampai vekin ti a leuh mai, hihi rampai a bangnak bik a si. Kawhhran zawngih fehtu pawl khalin hitivek hi an tidan cu a si ve. Voikhat lai ahcun ziangvek kawhhran bulba nei lo khal siseh a si lole zirhawknak hmun ih rak thendarh aw mi Khrihfa khal seh mah le ukawk dan an nei cio ih thurin thi an zirhter aw aw, sualnak an tuah lo ih curuangah kawhhran an si thluh tinak a si. Thurin hi nasa tukih kilhim ding a silo. Thurin kan timi sawn cu thutak ih nung dingih mi kaihruaitu fang a si (Johan 17:17).Thurin cu cawhpolh nun le hlumhuamhi fang nun ti ngawitu a si.

[15.11]

Voikhat cu mi pakhat pa hin a rualpi thazet kha an inn ah zanriah ei a sawm. Cui a mikhualpa cu a hleice ih a zoh duh ruangah an khawsung dawr ih sa a mankhung mi kha a lei ih zanriah an timtuah sak. Thil lei dingih a suah hlan deuh ah a mikhual pa cu nuamtak ih rak um sung dingin a cah ta. Malte a rei deuh hnu in an ra tlun hlanah an rualpa cun an coka a rak simsial ciamco, ziangruangahtile felfai zetin thil a tuahcia sak lo ti ih a ruah ruangah a si. An ningtih canih an relhnak dingah ti ih inn dunglamih an sak mi innte tiangin a rak khar pit sak thluh, ziangahtile hi inn te hi umlo sehla an inn hi a mawi sawn ding ti ih a ruahnak ruangah a si. A inntek pa cun a rualpa ih rak tuah mipawl hi thil thasawn ruat ih tuah a si ding ti in a zum. Nang teh mikhual si bang awla ziangtin na ruat ve ding? Na mikhual kha ziangtin na ti ding? Hi tivek dan lo ih cangvaihnak pawl hi Khrih ih kawhhran sungah kan kenglut
ding maw si? Siannak pekmi si silo in hi inn tla hi kan thleng rero ding maw si? Jesuh a ratsal tikah a tul lomi thil pawl kan betsak mi pawl, kan hlonsak mi pawl leh kan thlengsak mi pawl hi ziangtin in ti dingah na ruat? Hitivek ih thil tha ruat ih kan cangvaihnak hi a lung a awi cuang na zum maw?

[15.12)

Tulai san ih kawhhran nasa tuk a tluksiatnak bik cu Khrihfa pawl hin an theih ding mi an theihfiang lonak le an neih ding mi an neih ngahlonak ruangah a si. Kawhhran cun a thisen ih a rak leitu sual nei lo Khrih kha a nei ngeingei ding a si. Kannih cun a dik mi tlensuah salnak thisen (himtliang) kan nei thei lo. Kannih cu a thlengtu ding kan silo. Curuangah Khrih cun kawhhran ih zohthim dingmi in pe ih, dungthluntu pawl khan Khrih ih tumtah mi hna kha tuansuak thluh man lo in in tanta hai ih dunglam ih kan kir pang a sile kan member pawl in ziang hi ha thil dik cu timi hi an thei theilo ding.

[15.13]

Mi pakhat hin Khrih ih duhnak a tuah tikah ziangtin ha a um ding? Ziangruangah a dikmi thinlung lole dan vekin a kawhhran hi thleng kan tum theu? Himi hi kanni hna ding a silo! A thleng ding khal hi kan hna a si cuang lo! Jesuh in a rak kaihhruai lai ah khan kawhhran thenthek awknak lu kha ziangtin ha a rak ti? Baptist kawhhran pawlih an tih ding mi bik cu Khrih kha lubik ih ret lo in an kawhhran kha lubik ih ret pang ding hi a si. Kawhhran kha Baptist, R.C. ti ih hminbul an hun neih cun Jesuh cu a hlo rori a si ko. Anih cun kan dungin kawhhran pakhatkhat ihsin in rak dawi nurno nan Amai hrangih kan si nawn lo ruangah thil ziangkim hi a felfai thei nawn ta lo. Kawhhran hi a hung pitling lianglo theu nan a firfiak thei tuk lawmam ih Khrih a thleng thei theu lo ih thuhla ruah awk khal a theih lo a si lole milai tuahcop men mi kawhhran a si theu. Thil ol ai te hi cing ringring aw, rin um takin um aw, Jesuh thisen mankhung ih a lei mi a kawhhran hi neksawrnak phunphun leh thenthek aw dingih zirhtu tampi lakah nauhak bangin thansoh ding a zuam rero a si (I Kor. 1:11-13).

[15.14]

Khrihfa pawl lakih hminsin tlak Paul, Peter, leh Apollos pawl vekih zirhtu saza dang kha Korin khua ah a bur in an ding khawm ve thlang ti kha Chloe in Paul hnenah a rak sim. Mi hrekkhat pawl cun hi thu hi la tahrat in Khrih khalin thentheknak hi a uar zawng a si ti in a pawl
thlarau zawngin an zirhter hai. Hi catlang ih in zirh duh mi sawn cu remthatnak dingah leh thansohnak ding hrang sawn ah a si; zirhnak cun hmunkhat ah mi a finkhawm ih cun kan nunnak ding hrangah Pathian ih tumtah mi kha thei sinsin dingah leh thianhlimnak hrangih serh thianghlimnak leh a dangtei' umnak ding hrangih hmanraw tha si ding hrangah a si.

[15.15]

Voihnih khat cu kawhhran hi Khrih ih taksa ti'n kawh a si theu, ih bulpak cio hi a member kan si ti hi ruat aw (I Kor. 12). Taksa pum hi a cawmawknak ah amah te a dokalh aw ding maw? Kan awm hi a nung cingin kan kut in a siatsuah ding maw? Kan lu hin tha tei khua a hmuh theinak dingin mit hi phorh theih a si maw? Taksa peng a si mi ka le ke tivek pawl hi kan siat tikah taksa dang hrangah tangkainak an nei thei nawn ding maw? Kannih cu Khrih ih dungthluntu kan si vekin, sathat pa in a sa thatnak a theih ih a sa duhnak a sah darh bangin Khrih ih taksa hi kan thenthek ding maw si? Cu lole taksa then kha la in hmundang ah kan tai lam tivek ah kan ther ding maw? Ziangah sualnak hi kan tuah sunzom ringring? Ziangruangah Khrih ih taksa hi kan thlek darh thluh, Luther, Wesleyan leh Mennonite tivek pawl tla hi ziangah khuai teuteu kan tum hrih? A netnak ah thlarau inn khat ih kan zatei' kan thansoh khawm tikah cui inn ah cu minung in a depde zawngin Pathian duhdawtnak inn a rualrem mi inn cu siatsuah tumtu khal an um nawn lo ding a si. Kan zaten pakhat si dingin kan tuah tik leh zumnak thupuan suah pawl le dan le dun vekin kan feh tikah in nautat tu pawl khal kha a takin zomawknak kan nei thei thlang dingih uanthuannak leh maizawn lawng ruahnak tivek khal um nawn lo in pakhat le pakhat duhdawtnak tak thawn kan rak cangsualnak thu pawl thu ruah aw sal in, hell ram ih a tawntem mi leiltlun ah duhdawtnak le tanrualnak thu kan rel khawm thei thlang ding a si. Hitivek hi Jesuh ih kawhhran a rak din duh dan a si ih; danglam tak a si, milai dinmi kawhhran thaw cun danglam aw verver tak a si. Milai zomkhawmnak cu a tisa mi tuk. Khrih ih zomnak cu thlarau lam a si. Milai zomawknak cu malte sung lawng a si ih Khrih ih zomnak cu kumkhua a hmun a si.

[15.16]

Kannih cun kan tlaknak ding kua kha kan zoh hmaisa ding a si. Kan thinlung in kan thliar dang dingih pumkhat kan si theinak ding ahcun khui mi kawhhran hi ha hrial a tul ti pawl kha kan zoh hmaisa ding a si. Kawhhran cozahnak hi fiangte ih theihnak ding ahcun a pakhatnak ah an sinak theihfiang ta a tul. Zo ha thudik vekih a kaihruai aw tu? Pathian thu ih sim mi (Kol.1:18) vekin Khrih kha kawhhran lu ih rettu a si ding. Cun tui hlanih an rak cangvaihnak pawl kha ralringten kan hliakhlai ngeingei a tul, "Amah ihsin thil ziangkim an um"(Kol. 1:17), timi ih a sim duh tak cu Amah ah thil ziangkim hi an finkhawm aw tinak a si. Khrih hin ziangkim a kaih a sile amah ah an kom aw thluh, an tong aw thluh ih amah ihsin an ra cangsuak thluh tinak a si. A hmin a kotu pawl hnen ahcun a pakhatnak thupibik mi a si. Anih cu a mi pawl kha pakhatnak ih rettu, phunciar lotu mi zapi kaihruaitu a si; ih umcia pa khal a si fawn.Hi ti dinhmun a si ruangah kawhhran tin in tisanak ih hruaikai awknak ihsin leitlun ah mi zalen kan si thluh, curuangah ziangvek tonkhawmnak dang um hmanseh a poi nawn lo. Kan Bawipa Jesuh Khrih lawng hi Thlarau Thianghlim huham in a dik mi zirhtu tha umsun; huham neitu umsun, leh uktu umsun cu a si. Hihi Amai kawhhran hrangah a si ih; cucu tu ihsin a kumkhua tiang um ringring ding mi a si. Dungthluntu 2:47 thu hi thaten ruat aw.

Dungthlutu 2:47
47. Pathian an thangthat ih mi hmuahhmuah hnen in mit hmaitha an ngah. Cule nitin ten Bawipa in an pawl ah rundam mi dang a bet vivo.

[15.17]

Kawhhran sungah hruaitu pawlin hihi Pathian duhdan a si tin thu an bet theu a si lo maw. A kawhhran dinnak dingah hin kan ni bomnak a tul cuanglo a sinan cui a hnatuan ih tel ding cun in siang ve. Curuangah hnatuantu ding run thlah dingah Pathian hnenah thlacam uh. Anih cun amah thawi hnatuan tlang dingin in duh nasa. Kannih cun ziangtik hmanah khuahkhirh kan tum ding a silo, kan thuthu ih uk khal tum ding a silo, cuti a si lole a ringring ih thansohnak lole a Lalram hrangah kan thuthu ih tuah ding a silo, a hleice in kawhhran ih kan tuannak ahhin hibang hi tuah ding mi an silo. Jesuh lawng hi inn ruangam zingtu innsak hotu pa a siih cui a rawl khawmtu ding cu amah Pathian lawng hi a hriltu a si. Kannih cu Khrih ih salpawl kan si vekin a kawhnak hi kan hngah thei ding a tul a si. Fang attu run thlah dingah thla kan cam natsat a tul. Fang attu dingah Pathian lawng hi a thlah theinak huham
neitu a siih kannih cu cui a thlahnak hmunih tuantu ding bakah zianghman ti ding kan nei lo. Mi tampi in a kawhnak an sangih ziangtik hmanah kan dungtolh lo ding an ti. Mi hrekkhat cun kawhnak sual an dong ngah, ih a hrek khat ve thung cun kawhnak dik dong ngah famkim lo in an um ih kotui thu tel lo in an cangvai ciamco hai a si.

Matthai 9:38.
38. Curuangah rawl lak ding neitu bawi hnenah rawl khawmtu ding milai tampi thlah dingah thlacam uh, ti ah a ti.

[15.18]

Kawhhran ih cangvaihnak hnatuan pakhat cu a mi pawl ticak ding hi a si. Kawhhran mi pawl hi a cang theitawk ih ti cak ih thansoh ter ding hi a si. Kawhhran mipi hruaitu ti caknak hin Pathian ih a pek mi laksawng hi kilhim ngeingei ding a siih cucu amah ten tisa tak a si lole tisa thu takin a cangvai thei. Kawhhran a din zo phawt ahcun Khrih ih kaihruainak hnuai ah zalennak a nei thei. Kawhhran hruaitu pawl hi Dungthluntu pawlih kaihhruainak, Director pawlih kaihhruainak, hminthut ih pehtlaihnak, zumnak thupuansuah nak ti pawl khal an tul
nawn lo. Khrihfa zate hin mahte taksa ruangpi ah kan tuah aw aw; Pathian simaw minung simaw rian dingin zalennak a nei, a duh le dingfelnak a duh le fehsualnak zin a zawh dingih a duh le Pathian thu a thlun dingih a duh le a dang pathian maw a si lole zohman be lo in tla a um thei a si.

[15.19]

Minung umdan hi amai hlawknak tuah leh a nomnak ding hrangah zomkhawmnak neih ih nuam theibik ih um tivek hi a tumtah mi a si. Kawhhran sungih zirhawknak ahcun member pawl hmunkhat te ih hruaikhawm theinak hi hotu pawl ih hlawhtlinnak ih tahfungah hman a si theu a si lole ziangtin biakinn sak hna a tuan theh thei tivek tla'n an rak tah theu. Thlarau mi pa ih cah lonak bik a ruahnak kha lehkhuh thei dingin tisa mi pa khal a si thei. Cutikah a hnatuan ah Pathian a lungawi ti a hngilh ih, milai lung ti awi dingah a hnatuannak kha Pathian thu thawn a cawhpolh thluh. Cutin a kawhhran hruaitu pawl ti lungawinak dingah a inn sak mi a tum ter deuh lole sumpai tamsin a ngahnak in Pathian lung a ti awi tum.

Galati 1:10
10. Hiti ih ka ti tikah milai lungkimnak hawl rero ka bang maw? Ka tum mi cu milai ih lungkimpinak a silo; Pathian ih lungkimpinak a si sawn. Milai ih thangthatnak ka hawl maw? Mi hmai ih hminthatnak ka hawl a si ahcun Khrih ih hnatuantu ka silo ding.
Ka phan thup deuh mi thil pakhat tla cu tulai insang kawhhran an timi pawlih cangvaihnak pawl kawhhran pi hrangah nat hrik vekin tisa takin an cang pang ding ti hi a si. An lakih hruaitu hrekkhat pawl thla cu pawl khuar dingin an cangvai thok rero ti ka thei. Hivek hi racang
hmansehla kannih cu Khrihfa kan si vekin a tlu mi kan hmu ko ding ih cui kawhhran cu ziangvek ha an si ti in kan rak thlir ding. Kan hminsin dingah  kawhhran pawl timi cu: Mi pahnih maw pathum si maw leitlun thurel pawl vekih tongkhawm aw ih kaihhruai awknak khi a si.

[15.20]

A thokte ihsin Pathian thu vekih kaihruai aw mi kawhhran cu, Pathian ih hmanrua an siih (Dungthluntu lole a hmanrua) cu pawl cu anmah ih zirin an hnget in an tlusal thei. Thla a cam vivo ih Pathian a ron ringring a tul, a sinan a theih ding mi cu Pastor pawl parih thuneih kha a tum ding a silo. Kawhhran zate hin mi pakhat Khrih ih thuneihnak hnuai ah hlanawk thluh ding a si.  Cuti ih kan tluklut thluh a sile Bawi pakhat, zumnak pakhat, a dikmi baptima pakhat lawng ti in a kawhhran a ra hruai canah hmunkhatte ah kan tong aw thei hai ding a si. Kawhhran hi lungrualnak thawn a cangvaih a si ahcun theihtheih takin a danglam hngalh mai a si. Hiti in ol ai tei' thil ra cang men mai a silo ziangahtile minung pawl in harsa takih tawlrel hoha mi a si a sinan a ngaihven tu pawl hnenih Pathian pek mi a si, mi thianghlim an sinak ruangah pakhat le pakhat duhdawt awk an thiamnak dingah a si ih annih cu Pathian hril mi an si. Mahte dingcang mi hrekkhat pawl khan inn pakhat ah tong aw khawm in an um tikah Jesuh Khrih ah mi tampi si thei dingin duhthu an sam nasa. Midang Khrih ih sungkua pawl khal a tha zawngin an hmu ih tampi rah an suah theinak dingah dawm tha si dingin beiseinak tumpi an nei hai. Mai hrang lawng ruat ram nawrtu pawl cu a lengmi pawl thawi tlantlang ding an ngam lo, an tih. A dang Khrihfa unau pawl hnenah Khrih thu kha tih le khur cingin an zirh. Khrihfa pawl hi thudik ih kan nun ahcun zianghman phuhrun awk ding
a um lo. Zirhternak sual ah an tlu ve ce hai lo. Kan tulmi sawn cu unau dang pawl kha hawlsuak in zomawknak tha kha an hnen khalah kan duhdawt hai a sile kan tuah ding a si.

[15.21]

Tulai san insang kawhhran hruaitu hrekkhat pawl cu kawhhran hmaisa hruaitu pawl bangin ca an ngan ciamco thlang. An zaten thiltha tuah an si ko, cui an ca pawl cun Khrihfa thurin zirhter awknak pawl tiangin a cokharh thluh ih a ciahneh thluh. Khatlam ah mi tampi thihnak thawngah an tangter ih sakhuanak in an tawnhrem thluh. Hi insang kawhhran cangvaihnak kan timi pawl hin tu ah buainak an ton mi cu Korin khaw kawhhran pawl bangin an phunciar ruri thlang, an sual vivo. Korin khua um unau pawl cu Paul, Apollos leh Piter pawlih thu zirhnak ruangah an thenthek aw hai tum, a sinan an rak tlinsuak lo. Paul, Apollos leh Piter pawl kha then awknak dar tumtu an silo, lole a forhtu khal an silo. Kum zabi pakhatnak hruaitu pawl vek an silo ih tulai kawhhran hruaitu hrekkhat pawl bangin cantha la ih thenawknak thu khal tawlreltu an si fawn hai lo. Tulai insang kawhhran hruaitu kan timi pawl cu cantha la tahrat in mipi hruai ding hi an tumtah ih Korin khaw kawhhran bang khan anmai duhnak ih hruaikai thluh an tum (I Kor. 1:11-13).

[15.22]

Tulai san cun hi insang kawhhran kan timi pawl hin minung an hawl ciamco ih mipum tam kaihruai dingin an vak ciamco. An upa pawl lakah fim takin an hruaikai hai. An member nauta bik tiangin an thuzirh mi pawl kha fek takih dinpi hai dingin an zirh aw ciamco. An zirternak thu in thlarau lam thilpek hmang hai dingin can remcang an la ih an zirh dan vekih nung dingin tha an pe aw nasa. Mipum tam uar tuknak hi finkhawm awk a harsa an ti ruangah mah le tualsung kawhhran cio ah Pathian ih a pek mi laksawng kha hmangin leh kaihruai aw dingin an forh aw nasa hai, an zirhtu pawl kha an thlarau mi ti ih lomhlawh dingin an zirhter aw. Hebru 13:17 laifang hi ruat tha aw, "An thu nan thlun a sile" timi. Curuangah kawhhran tin hruaitu hmuahhmuah in Tukhal sangbik a ratsal tikah an tuanak parah lom an hlawh leh ding a si.

I Piter 5:2-4
2. Pathian in a lo pek mi turual khaltu si uh; nuar phah in a khaltu silo in Pathian ih duhnak bangtuk in thinlung thote ih a khaltu si uh. Hna nan tuan tikah hlawhman ngah duh ruangah silo in duhnak taktak thawn tuan uh.
3. Nanmai kilkhawi dingih retmi turual kha a uk in uk tum hlah uh; an zohthim dingin nung sawn uh.
4. Cule tukhal Bawibik Khrih a lang tikah a tleunak a dal theilo mi sunlawinak lukhum sunglawi nan ngah ding.

Rom 14:12
12. Curuangah zozo khal kan zaten kan nunnak le kan tuannak thu cu Pathian hmai ah kansimfiang ciar leh ding.

[15.23]

Zovek hruaitu in in zirh tikah tongkam in maw zohthimtlak nun in siseh, anih cu a hleice in Pathian pekmi cantha leh zomawknak cotu a si ih a tuu pawl hoha theinak lole Pathian le milai karlak ih pehzomtu a si, a duh dandan ih Pathian pek mi vekih cangvai theitu a si. Mi pakhat lole mipi hin hruaitu hna (kaihhruainak) hi assembly pakhat (kawhhran) lole cu ai ih tam a hruai tikah Khrih thawn do awk pang a olte. Curuangah Khrih le kawhhran karlak ah a laitak ih din tivek a um thei lo. Khrih pakhat lawng hi milai leh Pathian, Amah leh milai, leh a kawhhran karlak ih mi remtu umsun a si.

I Timote 2:5
5. Ziangahtile Pathian pakhat lawng a um ih munung le Pathian karlak ah remnak tuahtu palai pakhat a um.

[15:24]

Kawhhran hin thlarau ih ke a kar tikah a sungah a nung mi lungto tampi kha finkhawm in an rak um zonak hi ruahban ding hman a silo. Ziangkhal a sile hnatuan vivonak ding hrangah a si bik mai. Dungthluntu pawl (kawhhran dintu pawl) kha hnatuan dingih tirhsuah mi le cui an tuannak ih an va dinsuah mi kawhhran ah thuneitu upa leh hnatuantu an um lai hlan lo an um cilh hai. Missionary pawl (dungthluntu) hin hitin voikhat lai ahcun hna an rak tuan hai ih fektei an din a tul ringring. Culai can ahcun thazang peknak, ruahnak peknak, anmah thawi nomawk tlangnak lole hi kawhhran pawl hrangah thlacam saknak in an um men hai ding, a sinan pakhat le pakhat an hnaihnok aw dah lo. Hi kawhhran dintu pawl hi hnatuan dingih thlahsuah an sinak cu kawhhran umcia zonak ah a silo. Dungthluntu pawl hi a sungah silo in a lengih thlahsuah mi an si. Kawhhran thar va hawlsuah ih finkhawm ding hi a si, a sinan uanawk dingin a umcia zonak hmunah cun a silo. Curuangah Jesuh hin hi hna hi a rak tuansuak dah (Kol.1:18). Khrih cu a dik ngeingei dingih kawhhran sungah cahnak laifang leh huham neitu bik, kan taksa parih thisen zungzam pawl bangin thu neitu a si ngeingei ding a si. Kan thahri zungzam hi pakhat cio in an ding thluh cio nan kan nunnak pawl hi an pehtlai aw thluh a si. Cuvek in kannih insang kawhhran mahte um pawl khal hi kan taksa parih zungzam pakhat vek kan siih a famkim theh mi kan si, a sinan hmailam ih kan kawhhran a harhdam theinak dingin midang thawn kom aw uh si. Kannih cu a dangte ih kawh hleice mi kan si, bulpak cio hin Jesuh Khrih ih taksa kan sernak ahhin a zom aw mi kan si thluh.

[15.25]

Pathian biaknak ah a tlaitluan ih a tong aw thei pawl leh member nei tam pawl khi kawhhran hlawhtling ti ah kan ruat theu, a sinan Thuthlung Thar ih kawhhran than dan thaw cun a bangaw deuh lo, annih cu a dang kawhhran an va din tiangin an cak so vivo ih an thangso vivo. Cuvekin an kawhhran cu an cak vivo ih kawhhran tin in a harhdam ringring a si. Kannih cu cuvek cun kan famkim thei nawn zik lo. Ziangruangah annih bul an thanglian kan ti a si ahcun annih cu an zir mi thu parah lungrual ten an pom tlang, a si lole an kaihhruai awknak ah an di a riam, a sinan a netnak ah an kuaidarh leh thluh. Kawhhran hrangah zianghman thuanthu an nei theilo a si lole an dinhmun ah Pathian a sunglawi theilo. Jesuh Khrih ih lom tlak lamzin cu thu thlunnak, unau duhdawtnak, mai hrang ai in mi hrangah a thasawn ruahnak leh Pathian insungkhar pawl hnenah na thinsau ter aw ti mi a si. Kawhhran lungrual kan timi ahcun duhhrilnak kha duhtawk in zalen takin tonkhawmnak ah a um. Curuangah kannih cu kawhhran dik kan si vekin hivek kan hruai awknak ah hin mai hmatang hai lo te in kan hril ding, duhdawtnak kha hmai ah retin leh thil dang ruatin kan thlun ding a si. Tikcu can malte sung lawng kan hna a ngam pang ding, rei a daih lo pang ding, ziangahtile kan lak ah hlimsang kawhhran hruaitu pawl an hrolh awknak leh thu an tuah tonnak ruangah lole nunphunglam dan an zawhnak ruangah a si.

[15.26]

Kan hman dingih kan sim duh mi cu kan thinlung tikulh te sungah hin insang kawhhran tonkhawmnak pawl hi kan tuah ding a si. Hitivek ih tonkhawm awknak cun cui insang kawhhran cu pakhat leh pakhat pawlnel awknak, theihawknak in tuahsak dingih kan suangtuahnak tla in thlakthleng sak ding, ih zirhternak ah siseh pakhat le pakhat pawhtlang awknak in siseh kawhhran sungih a tulmi thildang relkhawmnak tivek in a phunphun in kawhhran tonawknak cun thathnemnak a nei a si. Hiti in tulai san kawhhran a feh rero lai ah mi hrekkhat cun anmai bulpak lalram din duhnak ruangah mi an bawm ciamco hai ih midang in Pathian ih Lalram an din tum rero lai ah rel ding thuhla dang an phorhsuak ciamco. Pathian in kannih in umpi aw sehla fimnak leh thliardan thiamnak siseh a dang khal in pe hram seh. Kannih cu Khrih thluntu kan si bangin thil tha ah kan lungawi dingih thil thalo ahcun kan riah a se ding a si.

[15.27]

Hmailam can kan zoh tikah Setan ih tumtah mi cu tonkhawmnak uar dingin leh sualral zet hman hai sehla hruaitu, bawmtu pa'i thu zirhnak ngaisannak leh uar ding hi a si. Curuangah kannih cun cuvek sualralnak cu kan do hrimhrim ding mi a si. Kan pawlkomnak hi ram thu ih kaihhruainak tivek ih hruai awk hi kan hnon ding mi le Pathian leh milai karlak ih remtu umtu pawl cu kan do ding mi bik an si. Thuthlung Hlun san lai ah khan an Biakinn ah kumtin voikhat feh a tul tin an rak zirh aw aw. Cunah cun tonawknak can tha le zomawknak ah
an rak hmangih hi tikcu can ahcun an nuam aw nasa. Tulai kawhhran pawl cuvek in kan tonawknak hi duhdawtnak tipunnak can tha ah hmang tum uhsi. Kannih cu Khrih ih sungkua kan siih Pa Pathian cu in hruaitu a si. Hi lei insang cu amahte'n a to aw theu. Hi thuhla hi Thuthlung Thar bu cahmai hmun tampi ah kan hmu thei ih cucu kawhhran hmaisa pawl ih insang ah a si. A dik rori ko, annih cu taksa in an nung nan Thlarau in an khat. Bulpak Khrihfa tin in ral an do cio hai a si. Thlarau leh tisa hi a kalh aw mi an siih an ngiar aw veve.

[15.28]

Hi kan lei insang ih kan unau pawl lak ahhin kanmah ai ih hmuhnak le theihnak mal deuh mi an um ding ti cu thilfiang a si. Kan unau pawl hin voi hnihkhat cu an suahpi unau pawl lak ah a thei bik le thiam bik vekih um tla an um theu. Hi tin insang ah a uang aw mi fapa maw fanu si maw an um tikah kan dawitlan men ding maw? Kan suahpi unau lak in kan hnawl ding maw? Mi tampi hin an u ah nunau maw mipa simaw an nei cio, kan unau ihsin mi pakhat hi kan ti hlo ding maw si. Kan u nu maw u pa si maw pawl hi a kumkhua in an dik ringring maw? An dik ringring cawk ce hai lo. A sile kannih teh kan dik ve ce maw? Fiang takih kan sim a si ahcun a tam sawn in u pa lam hi an dik sawn theu. Annih cu kannih ai in an tehton mi a rak tam deuh. Voi hnihkhat cu an dungih um kan si ko nan thlarau lam ahcun kannih ai in a mumal lonak khal a rak um ve. Ziangruangahtile Pathian thlarau fimnak ruangin midang hi kannih ai in an thasawn timi in zirhnak ruangah a si. Kan cin ringring ding mi thiltha cu kan zaten ka pakhat le hna pahnih kan nei ciar ti hi a si. A zaten rualran ten kan zir thluh a tul men ding. Thutak hmuhnak hi a umcia mi thudik ai in a thahnem sawn. Kan lei
insang sungkua hi kan umkhawm kumkhua lo ding, hmun dangdang ah kan um cio leh ding, cuvek in Thlarau ih kan unau hrekkhat pawl khal hlonthlak an theih ve ce lo. Kan Pathian in kan zaten thinsaunak in pe aw sehla cutin kan thlarau nun ah thansoh lam kan pan vivo thei ding a si.

[15.29]

Pawl kan timi kawhhran ih a khawm ringring tu cun kum zabi pakhatnak ih Pathian biaknak lole insang kawhhran ah kirsal hna a thiam lo. Pawl thlaraunak hin Pathian thutak a kalh ti khal an ruatthiam lo, lole dungthluntu pawl ih din mi khuahlan kawhhran vek kha tulai ah mi in an uar ti khal an thei thiam lo, insang nun ih nuam zet, duhdawtnak ih khat Thuthlung Thar kawhhran hi an thei thiam hai lo. Curuangah mi tampi cu hi ti dinhmun hin an ra suak hai ruangah kan insang ih thu thei bik vekih kan um can ih kan ngaithiamawk vekin pakhat le pakhat ngaithiam aw ton uh si.

[15.30]

Ruah Ding Pakhat Thukharnak
Milai leh Pathian karlak ah hin palai pakhat lawng a um ih cucu milai ih tuah mi zomawknak silo in Pathian ih run thlah mi thutak ih in kaihruaitu ding pa a si, anih cu pawl timi ih rak um mi a si ve lo (ITim. 2:5; Jn. 16:13).