NETABIK RALRIN PEKNAK

Hminsin:  Cangantui dinhmun theifiang dingin, “ Casiartu Hnenah” timi hi siar hmaisa aw.


[24.1]

A Zaa Mi Hna Pawl
Pathian thu ih in theihter mi cu milai pawlin anmah te'n Khrihfa ka si an ti aw dingih zirhternak thudik cu pom cuang si lo in an um tikcu can a rung kim leh ding, anmai duhnak thu lawng hawl in, leh anmai diriam zawng lawng a simtu zirhtu saza an hawl hai ding a si (II Tim. 4:3). Hiti ih Khrihfa ka si a ti aw pawl hin thutak kha an theihnak lamah an tlansan hai dingih thuanthu ngainak lamah an hna an tun thlang ding a si (II Tim. 4:4). A tha ko, ziang kan ruat hrih ding?
Ziangha ra thleng lai ding ti leh, a dang ti ding an theih tuk nawn lole an siatralnak ding hrangah mai duhzawng in Pathian thu ihsin rak simcia mi vekin an merhkawi mei theu ( II Pit. 3:16).Tuksuum za thil a si ko, Jesuh Khrih kha rukru pawl vekin bok le kuun in a ra lo, Amai hrangih a thisen ih a rak leicia pawl, a mankhung mi, sual mawh nei lo, thisen ih lei cia pawl hrang a si ih annih cu a hnawlral lo. Curuangah nang khal thlapi arsi lak ih zuansoh na tum a si ahcun na theih ding mi cu cumi hlanah, "Harsatnak Tuksum Rap Thlak" timi thu kha ruat hmaisa ta aw, cule na bei a dong nasa mei ding. Pathian cu milai hmaisong tu a silo (Dung. 10:34); duhsak bik khal a nei cuang lo. A thlengaw dah fawn lo (Mal. 3:6), Jesuh khal cuvek cu a si ko ( Heb. 13:8). Minung kha Eden hmuan ih a rak tluksiat tikah a taksa cu thihnak dan hnuai ah a rak um ih Pathian in a umpi duh nawn lo.

[24.2]

Pathian Cu A Thlengaw Dah Lo
Kan simduh mi cu Pathian hin kan taksa ruangpi ai in kan kumkhaw nunnak hi a ngaihtuah deuh (Job 14:1-2). Pathian in Israel fate pawl kha lal sual Faro kut hnuai ah kum zali sung lai kha um dingin a rak siang. A profet pawl khal kha harsatnak tuar ih Cathiang sungih an hmin tarlang ding khal a siang hai a si. Cuti a sile a fapa neihsun kha teh Rom pawl ih tuah mi thinglamtah parih thah ding leh, dungthlun pawl vuak leh velh, thawng thlak, hriamhma baih le thah thluh kha teh a rak remti hai lo maw si? Hibang pawl hi a zaten rak siang ta sehla, ziangah, ziangtik san ah a sal pawl kha an rak thah hai ih an sualnak kha an rak ngaidam sak, an hrangah luatnak ding lamzin hleice in a rak tuahsak lo ding maw, a rak duhdawt tu pawl le luat thei cuang hai silo in? Cuti a sile ziangtik ah keimah cu a dik mi thuthentu ka si a tinak le a diklo mi ka remti pi a rak tinak. A sannak cu ol-ai te a si; a rak ti dah lo. Hihi mak ka ti nasa, ziangtin kan duhnak thu hin ol-ai tei thuthennak kan tuah mei theu hi, lole Pathian thu ah pomrem duh aw hlah tla kan ti awk mei theu. Thil kan ton tik ahhin kan duh lok mei lo, kan thleng mei theu; cule kan hlawknak ding hrang ahcun kan tuah lawk mei theu. Cutivek ih mi nasa pawl vek ih thu lo zirhtu pawl kha thlun mei aw hlah (Jeim 3:1)? Zirhtu pawl hin Pathian fale pawl kha thusimnak ihsin an pial tikah thlun duh hai aw hlah, lole a mitcaw ding khop ih Pathian fale a tuahtu pawl lamzin dik ihsin pial hlo dingih thisen suah in kut ih mi a hruaitu pawl kha zum hai aw hlah (Ezek. 3:18)? Zirhtu pawl in kan theih ringring ding mi cu a nung mi Pathian kutcak tluksan ding hi a tihnung um tuk ih tuksum za thil a si (Heb. 10:3). Hitawk ahcun ngaidamnak a um theilo. Zirhtu pawl hin thu hi sual ko kan zirh ding a silo ih mah khal in theihnak tluksan ding a si fawn lo.

[24.3]

Ziangruangah Khrih ih turual pawl hnenah, "Harsatnak Rapthlak" hlanah Khrih kha anhrangah a ra sal ding tiin kan zirh? Khrih Amah in hi thusuhnak in sansak lai ah ziangah kan rak suangtuah thotho. Biakinn leng ih a din laiah "thusuhnak maksak" a tong ih a sang hngalh. A pakhatnak ah, Khrih in hi biakinn tlakrawh hi pakhatte hman a suangaw mi an um nawn lo ding a ti. Culaifang ah dungthluntu pawl khal in can remcang an ti ih "thusuhnak maksak" an rak nei. "In sim hnik: ziangtik ah so in sim mi bangtuk cun a si ding, Cun, na ratsalnak can le tui san a cemnak can a nai zo ti theihthiamnak ah ziangvek hminsinnak so a thleng ding," ti ah an sut (Matt. 24:3).

[24.4]

Langsalnak Voi Hnih Lawng
Khrih kha naute in Bethlehem ah voikhat a rak piang, cun an lak ah minung vek thotho in a ra thanglian. Cutikah a dungthlun pawl khal in a rat lehsal nak ding thusuhnak an rak nei. Ca Thianghlim ih kan hmuh vekin, anih hi voi hnih te lawng rung lang ding mi a si. Van a kai hnu Pai vorh lam ih a hung to hnu cun voikhat rat ding a bak lai tinak a si. A si ko, Khrih hi rundamnak thuhla ruangah voikhat rat a bak lai a si (Heb. 9:27). In tiam cia bangin in kai thotu ding, in rundamtu ding, leh thihnak ihsin in runsuak tu dingin a si. Tikcu a kim tikah amah thawi kan um kumkhua nak ding hrangah hmun a rem rero lai a si (Jn. 14:3).

[24.5]

Hi a voihnihnak le a neta bik thu kan sim hlanah thu pahnih kan rel ta ding. A pakhatnak ah thlarau ih nasa tei tluksiatnak leh mi sualral pai langnak thu pawl a si ding. Anih cun Khrih si a tum ding ih, Khrih ti aw tahrat in mi tampi a bum ngah thei hai ding. Hi sualral fapa hi a si Khrih-Dodaltu kan timi pa cu, a zuk biaknak ruangih nunnak ngah dingin a rel ding, amai zuk le a lem tuah mi kha mi hmuahhmuah in be hai dingin lo theih lo in a turhnawh hai dingih a duh lotu pawl kha cu a that hai ding (II Thess. 2:2,4). Daihnak thu siatsuah tu in a ra langsuak dingih Jerusalem khawpi lak duh ah amai duhnak in thukamnak thar a tuah ding. Hi tikcu can laifang ah hin Jerusalem ah leilung ih Biakinn neta bik an din ding ih raithawinak kha an hmang thok sal ding (Dan. 11:31, 9:27). Hi khrih-Dodaltu hi Israel ram ah umhmun a khuar dingih tikcu can a rung kim tikah Temple biaknak le rannung ih thawi awknak pawl a tawpbang ter sal ding. Cui biakinn ahcun a to themthem dingih a huham ropi thawn keimah hi Pathian diktak ka si tin a puang thlang ding. Hiti a si ruangah zuk a be lotu pawl hmuah cu siatsuah an si thluh ding a si (Dan. 9:27; IIThess. 2:4; Matt. 24:15; Thup. 13:15).

[24.6]

Mi tampi thihnak ding hmun kha cu Jerusalem biakinn ah le khawleng khal ah a si ding. Hi can cu Harsatnak Rapthlak ra thleng ding mi ih hminsinak a si (Thup. 11:2). Pathian ih profet pahnih in kum thum leh a hrek sung thulung lotu pawl hrem an si ding thuthang tha an sim hai ding, a sinan annih cu Jerusalem khawsung lamzin parah an that hai ding a si. Hi an thah ding profet pawl hi ni thum leh a hrek hnu in laksoh an si hai ding (Enok le Elija an si men thei) (Thupuan 11:3-12).

[24.7]

Riahsiatnak Hram
Kawhhran hin hi tuksum za bik, Harsatnak Rapthlak a ton hlante ah thil ra thleng ding mi pawl tampi an um ih cucu "riahsiatnak hram" kan timi cu a si (Matt. 24:8). Hi tik le cu can ahhin rangleng awn thawm a thang nasa ding (Matt. 24:4-13). A hmaisa ah bumawknak ropi'n a thok dingih thurin diklo zirhnak in a run thlun dingih raldonak le raldo thuhla pawl in a run thlun vivo ding. Cutheh hnu in pampi ruangih laitamnak le linghninnak le a netabik ah an zate ih nui dinhmun a latu Harsatnak Rapthlak a ra thleng dingih cuisin huatawknak, phatsanawknak, bumawknak, thawng thlakawknak, tuahmawh awknak le thah awknak, tui hlan thuanthu khalih rak um thei dah lo rapthlak lutuk mi a ra thleng lai ding a si ( Matt. 24:21; Thup. 6:1-6; 12:17, 13:1-18; Dan. 7:1-26).

[24.8]

Hi tikcu can pawl hi a sangsang in kan ngaihtuah hnik kei uh. A pakhatnak ah, "Rang Raang" thu in kan thok ding. Hi rang raang parah hin Khrih lem a to ih, li le thal kengin thlarau bum ding le tisiat ding hawl in a vaktawi. A theih theihnak ding hrangah thimnak ah- rang raang cu bumnak tiin. Cutheh hnu in a can neta deuh hrangah cun "Rang Sen" a si ziangruangah tile anih cu thisen rong nei mi leh ralnam kengtu a si. Anih cun ral a hmuhsak. Hiti a si thluh hnu ah kan rel rero mi tikcu can pi "Rang Dum" can a ra suak dingih cunah cun pamnak can le a neta bik a si dingih tikcu can hmuahhmuah ih a rapthlak bik le tihnung bik a si ding, cu theh hnu in "Rang Pawl" a ra langsal dingih cumi ihsin thil tha lo le a hmaihruaitu pawl leh a dang sualnak khal a pungzai vivo ding a si (Thup. 6:1-8).

[24.9]

Harsatnak Rapthlak
Rang Pawl a ra suah tikcu can hi ziangtik khalih rak um dah kel lo tuksum za harsatnak can asi ih, leitlun ralpi voihnihnak lai ih Judah pawl an rak thah vek men thaw kha cun tahthim ding rual a si nawn lo. Zo pawl an si ding tile khrihfa Bible zawm lotu pawl leh Pathian ih kawhnak dong ngah lotu pawl, a humhim duh ruangih beunak lawngih a hmang men tu pawl kha cun harsatnak an tong dingih thawng tlaknak, hremnak leh thah tiangin an tuar phah hai ding a si. Kannih khal kan hrangih Pathian tumtah mi zin kan zawh lo pang a si ahcun sangvut at ding mi bangin favah hmai kan thleng ding. Pathian in a ralrin peknak vekih a thlun tu pawl hrnagah bomnak a pek bet ding. Cui bomnak cu malte bang hmansehla kan tul bik mi umsun a si.

[24.10]

Khrih-Dodaltu (Anti-Christ) hin minung le taksa tampi a hawl rero laifang ah Pathian khal hin thu ngailo pawl thu thennak ding hrangah a sangsang ten a tuahsak hai (Thup. 12:6, 8,9,10,11). Pathian tawtawrawt hi voi sarih rori an phaw dingih cutikah thuthennak voi sarih a um ve ding. Israel fate pawl Ezip ram ih an rak um lai vek khan natsia a ra thleng ding, a sinan Pathianih fale pawl cu in hnamhnoih ban lo ding. Pathian dungtun pawl le a thu a tihzah lotu pawl hrangah a si.

[24.11]

Kannih a thu thluntu pawl cun a ralrin peknak neta bik hin kan zir aw thiam dingih Pathian ih kan hrangih a rem zo mi inn pi sungah in ret ding a si. Cuti a si cingin mi tampi cun bum an tong ngah thotho dingih mi tampi cu meisa in leh ralnam thawn ni tampi sung thah an tong ding (Dan. 11:33, 34). A rasuak letsal mi Setan hi Pathian fale thawn an do aw dingih a neh hai ding; a si ko, kei cun a neh ding ka ti ko: sihmansehla thlarau lam cun a neh zik lo, tisa zawngin a neh ding. Thutak thihpi ngamtu an pung sinsin dingih an tamtuk ruangah an hmin khal ngan le khum cawk rual an si lo ding. A poi lo, Pathian in a thei thluh hai pam ( Dan. 7:21; Thup.11:7, 12:17, 13:4-7).

[24.12]

Satan ih cangvaihnak hin kum thum le a hrek lawng a daih thei dingih cutheh hnu in tawtawrawt netabik cu an run tum thlang ding, cutikah lei leh van a dai thepthep dingih rundam kan si thlang ding (Thup. 12:6, 13:5, 8:1). Rundam a cotu pawl hmuahhmuah in a thi zo mi siseh nungdam lai pawl khal siseh Khrih ah kan thosal thluh ding a si.

[24.13]

Lehrulh Awknak

Khrih thawn van boruak lakih kan umkhawm tikah raldonak tisuar kha hmakhatte ah a suak ding nan nehnak cu Bawipa ta a si ding. Kum thum leh hrek cu thlarau ih a thi cai mi, mi tawntai le timtuah lo mi pawl cu rannungih hminsinnak pek an si ding cui hminsinnak lo cun thil ziang khal an lei in an zuar thei lo ding, culai fangah Pathian fale pawl cu ralring awtu pawl an siih, an hrangah nunnak hram a thok thlang ding. Annih cun nelrawn ah umnak hmun an tong dingih Pathian in an hrangih a ruatsak mi, an nuntu khawsaknak thawn an tang ta thei hai ding, Khrih ih ra thlen hlan tiangin an um hai ding a si. Mi tampi cun atthlak takin an hriamnam an cuh dingih an ral pawl kha atthlak takin do an tum ding nan an sung thotho ding (Thup. 13:8, 16, 17, 12:6, 13:10). Thutak thu diktak ih a thenhran theitu pawl leh a zum ih raltha takih a thluntu pawl cun nun khawsaknak an ngah dingih a ra thleng ding mi rundamnak khal an co ngah ding a si (II Tim. 2:15).

[24.14]

Nun Khawsaknak
Rundamnak a cotu pawl lakah, nelrawn in nun a thiamtu pawl kha cun Pathian fate pawl lak khal ah an thiamnak an hmang thei deuh ding. Pathian ih thilmak pawl an kim thluh tikah thutak thu cu voi le khat ah a rung kim dingih, hmakhat te ah kan inn le lo leh kan hnatuan mi pawl
kha kan tlansan dingih kan hrangih a tuah mi hmun ah Amah in in hruai dingih kan feh thluh ding a si (Matt.24:16-21; Thup.3:10,13:7,8).

[24.15]

Nang khal Jerusalem khi tikcu remcang zet ih na zoh thiam ahcun, nelrawn ramcar nun hram na thawk ti kha thei aw (Matt. 24:32-35). Nelrawn ramcar nun timtuahnak kan timi cu hmailam thlir, Pathian ih ruatsak mi hmun lam zoh cia thiam khi a si. Kan simduh mi cu cui hmunah cun kum thum le a hrek rori a rak cawmnak hmun khal a si. Nunnak ding hrangah tlamtling takih a rak zohzunnak hmun a sinan duh um lo tak hmun a si. Ziangtikah ti leh ziangtin a si timi kan theih tik ahcun nun cu soiselnak thawn tlansan mi hmun a si. Ziangtin na tlansan ding timi na theih lo ahcun lole profet pawl ih ih canrel vekin, thimnak ah- Jerusalem tivek, cule na vahtoihnak can kha a mal ruahro mei ding (Matt. 24:32-35; Lk. 14:33). Jesuh in hitin a ti, "Profet Daniel in a rak sim cia mi ' Tuksum za thil borhhlawh,' cu nan hmu ding. Cui Thil borhhlawh cu hmun thianghlim ah a dingsuak ding. Hi ca a siartu: a simduh mi hi thei thiam aw.

[24.16]

Hi thil borhhlawh hi zo a si pei ti lole ziang a si ding (Matt. 24:15)? Hi Khrih-Dodaltu kan timi pa hi zo ha a si, profet deu, himi bumtu pa hi zo ciah ha a si? Amah cu Daniel bung sarih a rak sim mi ki fate nei pa kha a si;amah cun mit a nei, ka khal a nei ih a tong thei fawn thlarau thilthu ah mi thupi zet a si (Dan. 7:20; Thup. 13:5,6). Daniel bung riat sungah amah cu,"siangpahrang thinse pa" a ti ih bungkua sung khalah," a ra lai ding mi siangpahrang fapa," ti in a sim, hi
pa hi a si siatralnak thlentu ding pa cu (Dan. 9:24-27, 8:23). Ki fate nei mi a si vekin anih cu ramsa (Rom) lak ihsin a si dingih thu thalo tawlrel tu dang a si ding, a sinan huham kha an zum hnakin a nei tam deuh ding (rin ai in), thu tawlrel lam leh thlarau lam khalah huham a nei ding
(Dan. 7: 21; Thup.13:5-7; Efe.6:123).

[24.17]

Profet, Thilnung Le Milem
Thuanthu kan zohnak in hi thilnung kan timi hi Rom mi ram thutawlrel thiam zet le a lal tohkham khal cumi thilti theinak hmangin Rom khua ih mi sualral pa Khrihfa dodalnak ih kaihruai tu a si. Hi can hi Ceaser lal lai in a rak thok ih dungthlungtu san tiang , cuisin Rom ram khumpinu Constantine, amah hi kawhhran le acozah rak zomtu pa kha a si ih Khrihfa an rak do lan vivo. A lal lai ahcun a ralhruang a ti hngetkhoh ih taksa lam thil lawng silo in thlarau lam khal a rak ti cak zet. Amah pa hi Matthai 24:15 sungih mi borhhlawh pa a rak timi a siih khrih-dodaltu I Jn. 2:18, misualral fapa II Thess. 2:3, leh Thuphuan 12:3,13,17 ih a rak sim mi rulhreng timi pa le Thuphuan 13:5 sungih rannung ih ka a timi kha a si. Hi khrih-dodaltu kan timi hi Setan ih thuhla rel theitu pa a siih; Khrih in Pathian thu a rel bangin anih khal in rannung thuhla a rel ve ding. Khrih kha tisa ih a rung can bangin hi hlothlau pa kan timi khal hi ni khat cu leitlun ah tisa in a ra lang leh ve ding (Jn. 1:14). Anih cu Thuphuan 16:13, 19:20, 20:10 pawl sungih rak sim mi profet deu le a netabik ah rannung a pahnihnak pa, tuu cang ki hnih neitu pa kha a si (Thup. 13:11), milai vekin leh Pathian ih tuu fano pianhmang a keng aw ter ding, Khrih vekin a thuam aw ding, a sinan a ruahnak le a tongkam in thil a siatsuah ding (Thup. 13:11-14; II Thess. 2:9-11). Pathian bangin mi a uk tikah thil phun thum a hmang dingih luhsuahnak a dawnkham hai ding, a huham hmangin hmuntin ah a vak vivo ding. Thuanthu kan zoh a sile Rom kha thilnung hmaisa a si. Hi rannung hi a thlengaw hrih lo; Thuthlung Hlun san lai ahcun ukawknak lamah in Rom an rak si ih Thuthlung Thar khalah thlarau lam ih Rom thotho an si. Hi uktu hlun pa hi sersiam mi a rak siih Setan ih thazang huham peknak in tu ahcun Setan ih fapa ti a si ih cucu a pahnihnak thilnung timi khal a si. Hi a pahnihnak thilnung hi a man cia ringring ih, a hgak ringring fawn, mi a bawm ih, thlarau lam leh ram uknak thu khal a kaibet ih leitlun mi in thu neitu ti in a pomrem leh ding (Thup. 13:4).

[24.18]

Hi a pahninnak thilnung, profet deu lole khrih-dodaltu pa hi Khrih vekin a lang dingih a thilmak tuahnak le mangbangza a tuahmi pawl in Khrih ka si tiin leitlun mi pawl a bum hai ding (II Thess. 2:9). Anih hi thlarau lamah Rom hmuhsaktu pa a siih curuangah thlarau lam khalah Rom ih lu bik a si ding. Hi thilnung ih lu le taksa ruangpi cun nasa ten cangvaihnak a nei dingih a cangvaihnak ih piang in a tawp vivo dingih thutak siatsuahnak kha a kaihnget fetfet ding. Kawhhran hmaisa can lai kum zabi khatnak ih rak piangthar pawlih nunnak tampi a rak laksak ih Rom khua ah rak kuat tahrat in meisa ih ur ding men lole sahrang ih deh ding le zohnuam menah a rak tuah ciamco. Kum zabi lailak can hrawng a hung thlen leh tikah hi thilnung kan timi hin piangthar pawl ih nunnak kha a thawngthawng in a rak laksak lala ih cui can cu Protestant Kawhhran tuahthat can kan ti, hi lai ahcun meisa ih urnak le a rak dokalh lotu Protestant pawl le Anabaptist pawl khal Eupope sungah Pathian thu nan daithlan ti in le Rom ram ih rak biak mi sakhua nan be lo tiin hrem leh thah an rak tuar celcel hai a si.

[24.19]

A netabik ah hi thilnung ih lemzuk hi a ra lang rero thlang a si, hi milem hi tinung dingin an zuam rero. Rom ram ih an milem khuimi bik in an Rom ram a ai awh ding? Rom milem khuimi bik in thlarau lam ai a awh leh ding? Rom milem khuimi bik in thlarau lam a hmuhsak ding? Kei ka zumnak ahcun a rak himtliang mi pathian nu kan theih larzet mi Mary tla a si men thei. Milem dang lole mizuk dangdang khal a nei ve ih an zuar in an be hai, cuhnak in thuanthu ih sim mi dang tla a khihhmuh a si men thei. Anih cun leitlun hi a thupten a hmu thei thluh ih curuangah tu ah Rom hi pathian ai awhtu an si tiih ruahnak a um, thimnak ah- Roman Catholic Kawhhran pawl khi. A rak himtliang dah mi Mary kha Jesui' nu a si theilo, hi Mary hin fa dang khal tampi a nei; hi Rom pawl ih Mary hi cun fa dang a nei lo tiin Roman Catholic pawl ih thurin bu ah a um, curuangah kha nu kha cu profet deu, a lem le phuahcop men mi a si (Thup. 13:15; Mark 6:3).

Profet Deu Ti Ih Kawh Mi Khrih-Dodaltu
Khrih-dodaltu tihi ziangha a si? Zo ha a si? Pope hi a si thei kei maw, Pope kherkher a si a tul cuang lo, a ra lai ding mi Pope teh? Thlarau lam thil ah a sangbik cu Pope a siih puithiam kor hruh in raang ziarziar ih ding ka hmu. A lu parih a lukhum ah a ra cang lai ding thil phun hnih a tlunih cuang ka hmu. Hi thil phun hnih pawl hin thilnung pahnih an hmuhsak teh a si kei maw? Hi an hruh mi hnipuan le lukhum pawl hi Roman Catholic pawl ih neih mi thil an siih an bangaw lole Rom lal hlun Pontiff in an dan dingah a rak tuah hrim tla a si men thei. Cui thuam cu Rom kawhhran ta a si (thilnung), a sinan a hruhtu lawngte mipa a si, "minung nambat in mipum a siar rero" (Thup. 13:18). Hi rannung cun number 666 a nei timi kha kan cing ringrig kei uh, cuvek thotho in minung (profet deu) khal hin a nei ve a si. Kan sim zo bang khan Setan ra langsuahnak ding cu fapa sual, a hnen ihsin thlahsuah mi Khrih lemcang tu a si. Hi thu hi Khrih in a mi pawl a kawhhran pawl van boruak ih in lawr hlan te ah a si ding. Hi thil pawl an can thei hlanah leitlun mi pawl hi a hranhram in Khrihfa zumnak hi an zum ter ding, cumi cu tui ni khal ah a cang rero zo. A sinan Bawipa cun a fale pawl cu thilsual theilo dingin in kilkhawi ringring a si. Mi zokhal milem a betu pawl lole a hmin kha an hmin ah bun tahrat in lole nambat in theihternak lawng silo in profet deu- thilnung kha cu an theih theih tho tho ding a si.

[24.21]

Tulai ih Setan pai tohkham umnak cu Greek tong le nambat in an tuakto dan ah hi tin a si.    HE LATINE BAILEIA, ti a si ih a duhsan cu LALTIN LALRAM ti a si.

 [24.22]

Ki Fate nei timi kha Greek tong ih a nambat cu, ITALIKA EKKLESIA, ti a siih a duhsan cu ITALI KAWHHRAN tinak a si.

Lalram ti tongfang Greek tong ih lehlin dan cu, LATENIOS, ti a siih a simduh mi cu LATIN TONG HMANG, ti lole LATIN PA tinak a si.

Vicarius Filii Dei timi hi Pope, Latin hmin ih an kawh dan a si, Rom nambat cun hi ti in kan hmu thei.

[24.23]

VICARIUS FILII DEI timi tongfang hi Latin tong cun PATHIAN FAPA AIAWH tican a si, R.C.M kawhhran pawl ih suah mi cabu a siih a hnuailam vekin kan hmu thei, "Rom khawpi ih an Pope pi bik kha VICARIUS FILII DEI ti inawsuah ih a cafang pawl hi Latin tong in (Ca fang tum in) kan ruat tikah leh a cafang zatei kan komkhawm tikah nambat 666 a ra suak." [Kan colhni Lengtu, Nov. 15, 1914]. A hlanlai ah Pope ih hmin hi PONTIFEX MAXIMUS an rak ti. Cucu Latin tong cun Pontifex Tumbik tinak a si. Hi hmin hi Catholic kawhhran a rak suah hlan ih an thuanthu ih an khuavang upa bik hmin a rak si. Pope pawl hin a san ih zir in hmin dangdang an run nei vivo hai. A hnuailam ta pawl hi Latin tong cun tisan pahnih an neih thu kan hmu thei. Cui pawl tla cu DUX CLERI timi a siih Clergy ih ralbawi ti leh a pakhattu cu LUDOVICUS ti a si leh ih  Rom Thuthentu Bawipi Aiawhtu Sangbik a si.

[24.24]

Rom tong cun a hnuailam ih ta pawl khal hin hitin hminsan an nei hai.

Duxcleri     

Ludovicus

24.25]

Profet Deu le Pontiff
Pope kha nisuahnak laifang lam a hleice in Jerusalem ah daihnak siatsuah tu tiih na hmuh a sile hngak hrih hman a hnatuannak hram a bun thok zo ih ni rapthlak ni ih a hman ding mi a huham a thok zo tinak a si. Hi ni a thlen tikah biakinn ih raithawinak a dawnkham hai dingih an nunnak hrangah le an tuah ding mi ah Mary ih lempi a rak lasuak ding a be lotu pawl cu thah tiang an tuar dingih a betu pawl cu hminsin an si fawn ding. Mi farah pawl kha a bum hai dingih an thinlungin Catholic kawhhran hi felnak zawngin in an pom ding a sinan zianghman a si thei lo ding ruangah a rei hlanah zumtu diktak leh mi rinum pawl cu an hrinhram tiang ti cimih tiangin an um thluh ding a si (Dan. 11:23, 9:27; Thup. 13:15; Matt. 24:24).

[24.26]

Kannih in kan theih tulmi cu hi can a ra thlen tikah, mi hrekkhat hrang ahcun khua a tlai zo ding. Nauhak pawl, Sabbath ni ih tlan tumtu pawl, leh inn leng thleng zo hnu korhlum vung la saltu pawl hrang ahhin khua an tlai nasa ding a si (Matt. 24:16-20).

[24.27]

Jesuh in hi fihnungza rapthlak lole khrih-dodaltu pa kha hmun thianghlim sungah a to lai ding ti in a sim. Hi hi khuitawk hmun ha a si ding? Hi hmun hi hmun thianghlim an biaknak le rai an thawinak hmun, Jerusalem biakinn pi kha a si ding. Cunah cun biakinn hmaisa bik a um ding (Matt. 24:15; II Thes. 2:4; Dan. 9:27). Tu ah Jerusalem khua ahhin biakinn temple um hrih lo hmansehla a rei hlanah a rung um mei ding.

[24.28]

Kan dunglam kum reilo te khan Judah pawl hi thil mankhung pawl uar takin hmunkhat ih tuantlangnak an nei lehsal ih an biakinn tla dinthar in biakinn ih hnatuannak dingah puithiam hna kha an zirsal ciamco. Curuangah an khuahlan dan vekin inn kha Solomon ih a rak dinnak hmunah din tumin, thubuai an nei celcel. Tu ahcun cui hmun ah Arab Mosque timi biakinn pi kha a kiangte ah a um hrenhren. Ram thuhla ih ih dodal awknak hi inn sak an thawh zik tikah tu hlan ai in a tam sinsin a sinan a taktak ahcun daihnak le hnangamnak pawl hi a thok ve phahphah. An thuthang rak ngai ringring aw; Jerusalem rak zoh aw, a hleice in an biakinn temple thuhla hi.

[24.29]

Kum sarih harsatnak laifang ih fihnungza karhzainak ding, Daniel ih colh-kar sawm sarih thu a rak sim lawknak kha a thok rero thlang ti hi cing ringring aw (Dan. 9:24-27), cun biaknak le raithawinak thu pawl hi, a simduh mi cu Jerusalem ah biakinn a rung um leh ding tinak a si. Cui an biakinn cu rak zoh aw, hngak aw, a hram an din thawh tikah, Pathian hnen ihsin thuhla theih ding a cak um nasa. An raithawinak hmaisabik kha khrih-dodaltu a ra lang veten an thok mei dingih biaknak hram khal an thok dingih, cucu kum thum leh a hrek an rei ding. A duhsan cu Khrihfa pawl vekin biakinn saknak can kan nei thlang an ti ding, cule thuanthu khal ih rak um dah lo hremnak rapthlak kha kum thum leh a hrek an tuar lai ding cumi cu an hrangah timtuah sak a si. A hminsinnak pawl kha theihhngilh aw hlah; biakinn thu rak hngak hrih aw, zumnak le ralthatnak pawl thawn nang khal Setan kut ihsin mi runsuak thei dingah Pathian hnenih siannak hi a thupi nasa a si.

[24.30]

Mumal Neilo (Thuphan) Ih Mi Bumtu Pawl
Tulai ih Pathian thuzirnak tlawng tampi ih nasa tei' an zirhdan vek a si ahcun Rang Pawl hi kan hmu ngah lo ding. An zirhdan vek a si ahcun kawhhran hi cu tuksumza tihnung harsatnak ah a tel ve lo ding ti a si. Kawhhran hi Khrih thawn hi harsatnak ra thlen hlanah laksoh a si ding ti in an zirh. Ziangtin so cutin a can thei ding? Kan Bawipa a ratsal tikah kannih a nungmi pawl hi a thi cia mi pawl hlanah kan feh hmaisa lo ding (I Thes. 4:15).

[24.31]

A ratsalnak ding thuthawn pehpar aw in Khrih in a dungthluntu pawl hnenah a rak sim (Matt. 24:3), annih hi an zaten an thi thluh zo tin. A dik ko lo maw? Curuangah kannih cun thawhlehnak thu cu kan hmaihruai tu a si. A dik ti aw? Cuti a sile ziangruangah a si pei Jesuh hin harsatnak hnu ah ka ra lohli ding tin a rak tinak hi (Matt. 24:29-31)? Harsatnak theh hnu ah a ti. Na thei ve ti aw? Harsatnak theh hnu ah a ra ding. Theh hnu hman ih a ra lo pang a si ahcun a rak nungdam pawl cu ziangtin an hmaisa thei ding?

[24.32]

Kannih saza pawl hin hi harsatnak ahhin kan tel lo ding tiih zirh ding a silo, a sinan cui harsatnak cun kum sarih sung a rei ding hokhaw. Hiti ih zirh ding ah khuitawk ih tanhmun ha an lak? Ka zumnak ah Daniel ih sim mi Colhkar sawm sarih (Dan. 9:24-27) thu hi cun a si ka zum lo. Hi fihnungza thil a karhzainak hin (Harsatnak) hmunram a thing ter ding a sinan cucu harsatnak can ih a laifang colhkar a thlen lai hlan lo a thok lo ding, lole hi tikcu laifang na uar tuk fahran len cuisin a thoktluan vivo hngalh dingih a kum sarih cem tiangin a peh lan ta ding. Cui tikcu laifang ihsin a cemnak tiang cu kum thum leh a hrek cekci a si (Dan. 8:25, 12:7; Thup. 12:14, 12:6, 13:5).

[24.33]

Hi kum sarih sung harsatnak can asi kan timi hi mihrekkhat cun an el mei thei. Hi kum sarih pumpi hi zo in harsatnak ti ah a ti tu um? Daniel a silo, Khrih khal a si fawn lo; harsatnak lole lungngainak a um lo ahcun harsatnak a um theilo ruangah a hmaisa kum thum leh a hrek ahcun buainak,harsatnak a um hrih lo ding (Dan. 9:27). Hi kum sarih kim thei dingah Setan pa hin Pathian ih Kawhhran dodal dingin a ra langsuak dingih cule Pathian khal in thulung lo fale pawl kha thu a then ve ding, kawhhran a hremtu pawl kha. Hi thuthennak hi thil phun sarih in a si dingih a hremtu hi amah Pathian rori a si dingih tawtawrawt pa sarih in a rung ausuak ding a si (Thup. 8-11).

[24.34]

Khrih cu hi Harsatnak Rapthlak tikcu hlan ih a rat a sile tawtawrawt awn thawn lole a phaw hmaisa lawk dingih a rung ding a sinan Anih cu tawtawrawt netabik an tum lai hlanlo a rung tum lo ding, lole tong dangih kan sim a sile Harsatnak Rapthlak tikcu cem zawngah a rung tum leh ding (I Kor. 15:51-52).

[24.35]

Khrih Ratsalnak
Anih cu nisuahak ihsin nitlaknak ah leilungpi a her lai, cule arsi rual pawl khal an hel awk rero lai ah Anih cu lei ah a rung tum ding a si. Hi hi kannih cun kan thei thei ziangahtile a rat tikah kan mit rori in kan rak hmuh ve ding ruangah a si. Mi hmuahhmuah in an mit in an hmu cio ding ti hi theifiang ve aw (Thup.1:7). Thufiang na theih leh ding pakhat cu Anih hi rukru vekin a ra ding a silo. Rukru hrekkhat pawl cu an ralrin lai tak khalah an ra theu (Thup. 1:7)!

[24.36]

Arsi rualriat lamzin hlo peh aw zetzet bangin Khrih khal hi a rung tum tikah a lamzin cu van ralkap burpi in an run thlun dingih cucun do awknak a rungsuak hngalh ding. A rung tum ih van boruak tlolak pi a run neih tikah thawhlehnak ni a thok ding; a pakhatnak ah mi thianghlim pawl an tho hmaisa dingih cutheh in tui a nungdam mi pawl in hmakhatte ah an run thlun ve ding. Amah thawn an pumkhawm dingih Jerusalem kulhtu ralkap pawl Megiddo timi hmunrawn ih a um mi pawl kha kan run hmu thei ding, tu ahcun Armageddon (Thup.16:13-21) ti ih kawh mi, pawl kan run hmu thluh thei ding a si. Cutheh in Bawipa'n meisa ruah a sur ter dingih raldo an thok ding (Thup. 19:11-21). Kannih a rat can ih rak nungdam mi pawl hi mitthep sungah ti danglam kan si dingih kan thlengaw ding. Hi tikcu reilo te sung ahhin kan mitsing in thihnak kan tong dingih a toih thei mi hi lak-hloh a si dingih hmakhatte ah a toih theilo mi kan sin hngalh ding a si. Kan taksa hlun hi a thlengaw dingih taksa thar ah minung kut ih tuah mi silo in a thlengaw ding, a thizo mi le a nungdam mi kan zaten Amah vekin a sunlawinak co in kan thlengaw thluh ding a si (I Kor. 15:51,52).

[24.37]

Hi kum thum leh a hrek sung hi Khrih ih ral pawl in A kawhhran le nunau an hrem ding, thimnak ah-kawhhran (Thup. 12:17) a sinan tu hi A rat can cu a siih kan ral pawl hi an relh rero can, "maw tlang in nen aw," an ti can a si ding nan luatnak a um nawn lo ding (Thup. 6:16,17).

[24.38]

Van kil li ih vancungmi A Thianghlim komkhawm pawl cu (Matt. 24:31) kanmah kan si dingih Pathian ih ralkap nortu ding kan si. Kannih, Pathian ralkap burpi thawi a kom aw mi pawl cu leitlun ah lo theih lo in Bawipa thawn kan rung kirsal dingih Amah dotu pawl hnenah thinhengnak kan thlensak hai dingih thilnung zuklem a betu le Thlarau Thianghlim a relsetu pawl, thawng tla tu pawl, hremtuar tu pawl, mi thianghlim ti duhdah ih a burbur ih mi rak thattu pawl (Joel 2:1-11) hrangah a si. A netabik ah kannih khal kan kirsal ding; inn tlun luanglu par ah kai in an relhnak hmuntin ah kan hawl hai dingih rukru pawl bangin siatsuah ding kan hawl ciamco ding. Kan Rundamtu le a kawhhran a rak dodaltu pawl kha kan that hluahhlo ding (Joel 2:9). Hi leitlun ahhin kan tuah lo mi a um nawn lo dingih a sinan kan hnu ah nasa ten ram a rung thing in a rung ram thluh lai ding, meisa a kang dingih a rung siatral thluh lai ding. Hi leitlun ih thil tuah mi hmuahhmuah hi Pathian thinhengnak meisa sungah an kangin an hloral thluh ding, zohman a nungih luat theitu an um nawn lo ding. Leilung hi lo thlotu pa in a fang cinnak dingah cahmang a khawh ih rawlkung rop pawl kha meisa thawn a thenhlim vekin meisa in thehhlim a si leh ding. Cutin hlan ih rak dum miammiam zo lawk mi leilung cu a thenhlim leh dingah meisa ret a si zo ih cutin a thiang mi le a hring demdem mi a rak kam cia mi nun thar le ni thar a rung suak thlang ding a si (Joel 2:3).

[24.39]

Kan Bawipa Jesuh Khrih ih in tiamta mi tikcu can ah tu hi a netabik can a si, ni khat timi kum thawngkhat can cu a si. Anih hin nikhat sung thir kianghrol thawn a hruai leh ding, ni khatkhatah kiosa le tuu fano pawl khal an umkhawm leh ding. Ramhuai pa hi ni khatkhat cu tawntem in a um leh dingih tawp ti neilo kawpi sungah thlak a si leh ding, a kua ka kharsak a si dingih tacik khenbeh a si hnu ah kum thawngkhat sung thlak in a um ding (Thup. 20:1-6; Isa. 11:6). Hi tikcu can a ra thlen tikah kannih cu Jesuh Khrih thawn Adam vek khan zomkhawmnak leitlun ah kan tuah dingih hi can ahcun dodal awknak um nawn lo in sersiam mi zaten rualrem ten kan leng khawm tlang ding a si. Kum thawngkhat kan timi khal hin Jesuh a thei ve dingih Amah ihsin thil ziangmaw zat a zir ve ding, kumkhaw thutak leh a sersiam mi hmuahhmuah in ramri nei nawn lo'n Amah an rian thlang dingih tikcu can lole taksa dan khal in an rian khawm hai ding a si.

[24.40]

Kum thawngkhat uknak can a nai tikah kan leitlun sualnak kan tlansan dingih kum thawngkhat hnulam cun tohkham var thuthennak kan hmu leh  ding, van ihsin hlonthlak zo mi leilung kha dinthar a si dingih anmah cu, mi kul hluan li lakih ta pawl kha an si ding (Thup. 4:4, 21:27;
Matt. 20:4). Cunah cun dungthluntu hleihnih pawl an to dingih Pathian ih a rak remruah cia vekin thuthennak cabu cu an ong tan thlang ding. Pathian Tuu fano Jesuh kha hminsinnak pa sarih ih hminsin mi phelh tlak le cabu ong tlak tu a siih, cui cabu sung ahcun rundam cia pawl ih hmin hmuahhmuah in an tel thluh a si (Thup. 5:5-10, 20:12-15, 21:27).

[24.41]

Voi Hnih Thawhsalnak
Cun, thuthennak a tan hlanah voi hnih thawhsalnak ih a tel lo pawl Tuu fano a rak hnawltu pawl zaten Pathian hmai ah an sual raithawinak ngaidam theih lo pawl an ra langsuak ding. Ramhuai le khawsia pawl tiangin thawnginn in a sangka a on dingih Pathian dodal tu le sualsir
aw lotu pawl ih thlarau zaten hlonthlak an si ding; a siko, mi thattu pawl khal in hi hmun hi an hua hai ding, cule vanmi misual pawl in Pathian kha siatsuah an tum sal ding, a sinan hmakhatte ah neh in an um ding. Pathian ral pawl hmuahhmuah kha Michael leh a ralkap burpi in an hrampi rori in an siatsuah thluh hai dingih thilnung sual leh profet deu pawl ih umnak ah Setan pa khal kha hell meipi sungah paih in an um ding a si (Thup. 20:7-10, 19:20, 21:8). Hi kan leilung pi khal hi ni ah a cang dingih meili pi ah a cang ding. A hloral dingih a suaksal nawn lo ding, a sinan Jerusalem Thar ih mo vekih kan um lai hlanlo cu a ra cang hrih lo ding. Cui ni a thlen tikah lei thar le van thar a rung um ding (II Pit. 3:10; Thup. 21:1-2). Pathian in kan mit ih mitthli pawl hmuahhmuah in hnul hul sak thluh dingih, thihnak timi khal a um nawn lo ding, ninghannak, tahnak, hma le tuarnak hrimhrim a um nawn lo ding, ziangahtile khuahlan thil pawl hmuahhmuah an hloral thluh ding a si. Thil ziangkim hi A siam thar sal dingih kannih cu a minung kan si dingih Anih kha kan Pathian a si ding, kannih hi a fapa le pawl kan si ruangah a ro co tlang in Amah thawn kumkhua in kan leng tlang thlang ding a si. Amen (Thup. 21:3-7).

[24.42]

Thu Kharnak
Kan thu kharnak ah, hi catlang ngan mi malte ahhin na ngaithiamnak ka lo dil duh, a zatei theh thluh dingah a menmen in ziang cabu hi kan lak ding? Hmailam thil ra cang ding thuhla ka pomdan ih ka relnak ahhin na ngaithiamnak ka lo dil. Mi zokhal ih in ra zirh ve ding khal in ka ong aw a si. Keimah bangih thutak a theitu pawl hrangah thuron ka lo pek duh mi cu: Pom tlak si thei dingin nangmah ten zir aw (II Tim. 2:15). A poimawh tulmi hrangih ka tarlang mi a hnuailam ih catlang pawl hi a zaten siar ngeingei aw.

 
[24.43]

Pathian Thu sungah hi thu thawn pehpar aw ih thupi zetzet angannak Bible bungcang tampi a um. Hi Netabik Ralrin Peknak hin kan dam sung thuanthu ih netabik can ah kan um a si ti hi rinhlelh ding um lo in in sim (Dan. 12:8, 9). Tui kan damsung can hi thihnak, riahsiatnak le
lungngainak thawn zamrang zetin a liam vivo. Hi bungcang ih zirh mi hi cikfel tha ding thil pathum a tul.
1. Na rosiah thurin lungput kha hlonfai ta awla Pathian hmurka ah zianghman na luh ter lo nak dingah.
2. Na parah Thlarau Thianghlim ih hriakthihnak na ngah theinak dingah thlacam awla na theihnak kha thutak in a engter ding, ziangvek ih dokalhnak khal poisa hlah.
3. Bible sungah hawl aw, zir aw, zuam aw, a hleice in hi kan thu na zirnak thu ahhin (IJn. 4:1). Pathian in lo thlawsuah in Thlarau Thianghlim ih hruai mi le theihpi mi theihnak in lo khatter hramseh.