KA HNENAH  ZIR UH

Hminsin:  Cangantui dinhmun theifiang dingin, “ Casiartu Hnenah” timi thu hi siar hmaisa aw.

[4.1]

Zuk Hlun Vek A Si

Mi Inn ih an suah mi zuknung lo le zuk cabu sungih ret mi mizuk pawl, hnah khat hnu hnahkhat an insang zuk tivek khi na zoh dah maw? Na zoh le keimah bangin na thawpisuah in na phur ciamco lok men ding. Cuvekin duhdawtmi hleice deuh kan neih tikah kan thinlung hi a thlengaw ol zet. Cutin na nel ih na lainatnak cun na thinlungah hna a tuan dingih zuk hlun le thil hlun pawl na zoh paih lawng silo in a zoh hiarnak thinlung na nei sinsin dingih na hmuh mi zuk sungih pakhat khat vek si khal na duh vivo ding a si.

[4.2]

Khrihfa kan si tikah bulpak in Khrih thawn duhdawtnak kan nei ih pumkhat ah in tuah. Mipakhat in Khrih a duhdawt taktak a si ahcun a thuhla a ngaihtuah ih a tuaithar aw ih phurnak thawn a nun ah zir ding thar tampi a suak theu. Cuti Khrih kan pehzomnak cu pipu dan ti vekih a hram a bunawk pang a sile insang zukhlun zoh bangin a ninum leh mai. Khrih ka zum ti tu pawl cun a thu an ngaihtuah ih amah vek kan si ti an thei aw suak. A siko lo maw!Thuanthu bu a siartu cun an theih dahlo mi thuhla a theihsuahter nan amah ah thathnem nak, hmuh suakawknak a neihter thei cuang lo. Phundangih vunrelin, mi pakhat thawn pehtlaih awknak hnget na neih a sile a hnen ihsin na zirsuah mi in a lo tawnhrem ding. Cupai hnen ih na naih poh a sile a lo naihniam ve dingih Jesuh thaw cun ziangtik hmanah nan naih aw thei lo ding.

[4.3]

Jesuh Theih

Jesuh thu hi kan theih tam poh a sile a duhdawtnak kan hmu tam vivo a si. Jesuh in kan ruahnak hnakih sangsawn in in thei thluh a si. Khrihfa tampi cun  bible a um poh ahcun a thu kan thei thei tin an zum. A siko lo maw? Cun mi tampi vethung cun anih cu Pathian ih fapa neihsun, Bethlehem khua ih rak um ti cu an zum ko nan Bethlehem hlan ihsin rak um ciazo a si ti an theilo. Anih cu Pa thawn sersiam hlan ihsin umcia zo a si (John 17:5).

John 17:5 5. Maw ka Pa, leilung siam a si hlanih nangmah thawn sunlawinak ka rak neih mi kha a tu ah na mithmuh ah hin i pe hram aw!

[4.4]

Sersiamtu Khrih

Jesuh Khrih hi lei le van sersiam hlanih rak umzo men lawng silo in Sersiamtu rori khal a si.Hi leiram le Thlarau ram khal a sersiam. Thlarau ah siseh tisa ah siseh thuneitu hmuah hmuah hi a mai sersiam a si; Lal tohkham , thuneihnak huham pawl thawn. Thlarau ram thu (vancung mi) le leiram thu (minung) pawl khal a sersiam mi hlir an si (Jn.1:1-3; Efe.3:9;Kol. 1:13-18).

John 1:1-3 1 A tir in Thu a rak um zo, cu cu Pathian thawn a rak um, cui Thu cu Pathian a si. 2. Cui Thu cu Pathian thawn a hramthok in a rak um zo. 3. A mai sung ihsin Pathianin ziang hmuahhmuah a tuah.

Efe. 3:9 9. Pathian ih tumtah mi a thuthup cu ziangvekin a langzo ti kha mi hmuahhmuah hmuh theidingin an mit vangter dingah Pathian in tuanvo i pek. Ziangzongza Siamtu Pathian in kan dunglam san sung hmuahhmuah a thuthup cu a thup.

Kolose 1:13-18 13. Amah in kannih in uktu thimnak huham sung ihsin in runsuak ih a fahniang uknak sungah in luhpi zo. 14. A Fapa thawngin sual ngaidamnak kan ngah ih miluat kan si zo. 15. Khrih cu hmuhtheih mi Pathian ih hmuihmel langnak a si. Amah cu Fapa tir a siih siammi hmuahhmuah hnakin a cungnungbik a si. 16. Ziangahtile Pathian in Khrih sung ihsin ziangzongza vancung le leitlun ah siseh, hmuh theihmi le hmuh theihlo mi siseh Thlarau lam huham cahnak a neitu le bawi le uktu pawl le thuneitu pawl siseh a tuah. 17. Khrih cu ziang hmuahhmuah hlan ah a rak umzo ih amah thawn an pekzomawknak  thawngin ziangzongza cu anmai um nakah hmun an nei cio. 18. Kawhhran cu Khrih ruangpum a siih Khrih cu a lu a si. A pum ruangpi nunnak cu amahKhrih a si. Amah cu Fapa tir a siih ziang hmuahhmuah lakah pakhatnak le a zik a si ring     ring nak dingah thihnak ihsin thawhtersal a si zo.

[4.5]

Cinkentlak Mi Pathum

Pathian kan timi hi amah pakhat lawngte silo in huham le caknak thawn tuan tlang le zem awtlang in lungrualten mi pathum an si (I Jn. 5:7). Cui mi pathum pawl cun minung hi an hmuihmel kengih sersiam ding an lungkim tlangih anmah bangnak thawn sersiam a rak si ( Sem. 1:26). Zo lole ziangha amah an bangnak cu? Cu cu, Jesuh Khrih lawng hi hmuh theih Pathian hmuihmel kengtu a si (Kolose1:15). A hmuihmel kan ti cu Khrih a si ih; cucu Pathian hmuihmel tak khal a si. Jesuh in, “ keimah i hmutu cu ka Pa khal a hmu zo” a ti. Ziangah si pei hitin a ti? Ziangahtile Pa cu Thlarau a si ruangah milai mit men hicun a hmu theilo (Jn. 4:24). Thlarau Thianghlim khal cuvek a si ti thei aw.

I Jn. 5:7 7. Vanah khin theihpi tu mi pathum an um; Pa, Thu, le Thlarau an si; Cui mi pathum pawl cu pumkhat an si.

Kolose 1:15 15. Amah cu hmuhtheihlo mi Pathian hmuihmel kengtu a siih sersiam mi hmuahhmuah lakah Fapa tir a si.

Jn. 14:9 9. Jesuh in nan hnenah can reipi ka um zo na in a tu tiangin i thei hrih lo maw Filip? Zoh hnik keimah i hmutu cu ka Pa a hmu zo; ziangtinso “ na Pa i hmuh aw” tin i suh hrih.

Jn. 4:24 24. Pathian cu Thlarau a siih a betu pawl cun Thlarau le thutak in an be ding a si.

[4.6]

Semtirnak 1:26 thu hi na ngaihtuah ciang dah maw. Pathian ih tongkam “kanmah” timi le “kanmai”timi mibur a hmannak te hi?  Ziangah a si pei? Ziangah kan tile Pathian hi amah lawng silo in mi pathum in an tuan khawmnak ruangah a si (Danpek. 6:4; Jn. 17:11, 21). “Bawipa, kan Pathian cu pakhat a si” ti le cui Pathian cu huham le cahnak a nei ti hi kan theih tul mi a si. Cui Pathian cu famkimten komawknak an nei. Cui thu cu Jesuh in baptis ma lak thu ah khan vun ruat hman. Jordan tiva ah a to lai fangah van ihsin Pa cu a rung tong ih Thlarau Thianghlim cu thuro vate vekin a rung tum. Hinah hin midang khalin thil dangdang an rak tuah cio hai. Cui hnu ah Jesuh cu hmuan sungah a Pai hnenah thla a cam. Thinglamtah par khalin a Pa a ko. Cumi cu amah le mah a be aw ti'n kan ti thei ding maw?

Semtirnak 1:26 26. Cun Pathian in, “milai tuah thlang uh si; kanmai hmuihmel kengin kanmah vek an si pei. Ti sung um nga le vanih a zuangmi vate tlun ah siseh, innzuat sumhnam le hramlak ram sa a tum a sen par ah siseh, thu an nei pei” ti ah a ti.

Danpeksalnak 6:4 4. Maw Israel mi pawl, thaten ngai uh! Bawipa amah pakhat lawng hi kan Pathian a si.

Johan. 17:11 11. Cun a tu ah ka hnenah nan ra ding, kei cu leilung ah ka um nawnlo ding, a sinan nan- nih cu leilung ah nan um hrih ding. A thiang mi ka Pa nangmah le keimah cu pakhat kan sivekin leilung ih a um hrihmi pawl cu pakhat an si theinak dingah i pekmi na hmin ih huham in humhim hai aw.

Johan. 17:21 21. An zaten pakhat an si theinak dingah thla ka cam a si. Ka Pa, nangmah cu ka sungah na um ih kei khal na sung ih ka um vekin annih khal ka sungah um ve hram hai seh. Nangmah in i thlah hi leilung in an zum theinak dingah annih cu pumkhat ah cang hram haiseh.

[4.7]

Ziangruangah tile Jesuh cu Pathian Fapa neihsun a si, cucu hitin kan ti, Pa ih run hrin mi cu Fapa a siih Pa ih hmin “Pathian” tin kan ko ve. Jesuh cu a Pai fahrin mi a si vekin Eve cu Adam ihsin a rung suak ve. Hi thu hi mi hrek cun suangtuahnak men a si an ti. Ziangtin Jesuh cu Pathian Fapa si cingin Pathian a si (Jn. 1:1,14)? “ Pathian” ti hi a sinak hmin a si ih a hmin ngaingai silo in, siangpahrang, saya, sibawi, ti vekih kawhnak a si.

Johan. 1:1 1. A tirin thu a rak um, cui thu cu Pathian thawn a um ih, Pathian thawn a sidan a bangaw.

Johan. 4:14 14. Cui thu cu minung ah a cangih kan lakah a um; zangfahnak le thutak in a khat.

[4.8] Hi hi “miburpi” relnak vek a si, Pathian (Heb..Eloheim) cu mi burpi simnak vekin a hmin hin tam ti mi a rel. “Mi burpi pakhat ah, mitampi an um vekin “Pathian” ti mi hmin pakhat hi hman mei a si ih, an zate khin Pathian sinak ah pakhat an si tinak a si.Hminsin: mi burpi (mitampi simnak) thu kan rel vete'n mi pakhat ai ih tam an si vekin Pathian sinak ah(Eloheim) mipakhat ai ih tam an si. Hi ti ih burpi hmin kan hman tikah mangbang ding a um cuanglo hi vek thawn a bangaw -“ Insang”, “burkhat”, ti leh “khan khat” ti in malte bangih relnak vek hi a si. A dikbik mi pomdan cu “ Pathian” ti hi a sibik.

[4.9]

Vanlam thil thu rel tikah cinken tul mi thil thupi pathum theihpitu (I Jn.5:7,8)an um ih cupawltla cu Pa, Thu (Fapa Jn.1:1) leh Tlarau an si ih (nunnak) thlarau pakhat, tidai ( nunnak kilhimawknak) leh thisen (a sungah nunnak a um) pawl hi mi pakhat an si. Cuvekin kannih khalKhrih ah pumkhat kan si ve ih Pa leh Anih an bangawk bangin( Jn.17:21) sersiamnak ah a sangbik sinak cu “ Pathian” ti hi a si. Lei lal pawl leh uktu pawl ai in a sang deuh. Himi pa thum pawl lawng hi a sangbik dan kilkhawitu leh zung khalih a sangbik mi an si. Cu pawl cu hi van ih uktu Lalsung an siih an lak ihsin mi hmuahhmuah an lungawi theinak dingah lalsung ihsin Fapa, daihnak siangpahrang, hmuh theihlo Pathian hmuihmel kengin ai awh nak a run nei.

[4.10]

Pathian Ah Zomawknak

Thil ziangkim hi Pai hnen in a rungcang suakih cucu Fapa hnenah a zate'n pek thluh a si (Pathian huham zaten-Kol.1:19). Hi thu ruangah Jesuh hin Pai hnen ihsin zianghman lak sak a tul nawn cuanglo (Filip.2:6). Mi pakhat hi a dang mi pakhat thawn an cahnak a bangaw thei ti cu thudik a siko, a sinan an huham neihmi lawngte a dangdang: Lei hnuai ralkap pawl hin an ralthuam hi fialtu ih fialnak vekin an keng cio ko a sinan an cahnak a bangawk hmanah an huham cu an bangaw cuanglo a si.

[4.11]

Khrih ih neihmi cu a zate’n a Pai kut ihsin a ngahmi hlir a si, a sinan a Pai hnenah a neihlo  mi ziangha a pekmi um? A Pa a duhdawtnak hi a tum tuk, a famkim thluh cucu hmuhtheih in a run langter. Khrih hin a Pai hrangih a tuah theimi umsun cu pumpek awknak lawng a si. Hi hlanawknak hin anih ai in a Pa a ti tum deuh sawn ( Jn. 14:28). A Pai duhzawng tuah nak hin Pa cu sersiamnak le Pathian innsang ah a sangbik ah a ret, thuthimnak ah Pathiana sinak ah.

[4.12]

Khrih cu kan Puithiam Sang a sinan Pai tohkham parah a to cuanglo Pai vorhlam ah a to sawn (Heb. 8:1). Jesuh cu a Pai duhzawng tuah dingin a ra (Jn.4:34), curuangah Pai duh zawng hlir a tuah (Jn.8:29;6:38-40). Kan hngilhlo dingah Jesuh cu Pathian pakhat a siih a Pathian cu a Pa a si. Cuti kan ti tikah Pa hi Lalsungih pa bik a si ruangah thu neihnak sangbik a nei cuang ding maw?

[4.13]

Jesuh In Pathian A Nei Ve Maw?

Jesuh cu Pathian fapa a siih Pa cu Fapa hnakin a ropi sawn. Jesuh cu Pathian khal a si ve,ziangah tile amah hi a Pai uknak sungkua ih neihsun Lal Fapa a si. Cuih Lal sungkua cun leitlun ih thuneihnak hmuahhmuah le vancungih thuneihnak hmuahhmuah an nei thluh. Je suh cu lal hmuahhmuah ih Lalbik le bawi hmuahhmuah lakih Bawibik a si. A hmin sunglawicu sang ah khai in sersiam mi hmuahhmuah in an khuk an bil dingih amah cu Bawi a si ti'nan phuang ding (Filip.2:10-11). Pathian a si mi Jesuh in Pathian pakhat a nei ve, cucu a Paa si. Sal sinak dinhmun in nannih teh zo nan rian pei? Nan rian mi mi ih sal nan si (Rom.6:16). Mi pakhat in a sangbik ih a ren mi le a biak mi kha a pathian a si. Jesuh in a Pa a rian ve maw, a thu teh a thlun ve maw? A thlun a sile a cetcang danin a Pa cu a Pathian a si ti alangter tinak a si.

[4.14]

Pathian ti hi bulpak hmin a silo nan sinak relnak a si, Suahlannak 20:3. Kan simzo bangin asangbik ih kan ret mi thil hi kan rian ih kan pathian ah kan can theu. Cuvekin Jesuh khal in Pathian cu a Pa ah a ret ih a Pathian ah a cang. Hihi thudik a si. Van ih kan Pa khi Jesuh ihPa khal a si ve. Jesuh cu Fapa a si, Pathian khal a siih Pathian khal a nei ve (Matt.27:46; Efe.1:3,17;Heb.1;8-9;Thup.3;12).

Matthai 27:46 46. Zanlam nazi pathum ah Jesuh cu napi’n a au ih “Eli, Eli,Lama sabakthani?” a ti.

Efesa 1:3,17 3. Kan Bawipa Jesuh Khrih ih Pa le a Pathian cu thangthat siko seh! Ziangahtile Khrih Je suh thawn kan pehzom awknak thawngin vangcung ih thlarau thlawsuahnak a phunphun kan hnenah in pe. 17. Cule kan Bawipa Jesuh Khrih ih Pathian; a sunglawi mi kan Pa in nan hnenah thlarau lo pe hram dingin ka dil. Cui Thlarau cun fimnak a lo pe fawn dingih Pathian nan hnenah a langter fawn ding; cuti cun Pathian cu nan thei ding.

Hebrai 1:8-9 8. Cule Fapa thu ah Pathianin, “ nangmah cu Pathian na siih, na bawi tohkham cu kum khua'n a hmun ding; na minung pawl dingnak in na uk ding. 9. A dik mi na duh ih a diklo mi na hua. Curuangah a si Pathian, na Pathian in a lo hril ih narualpi pawl hnenih a pekmi hnakin a tum cuangmi upat lungawinak a lo pek” a ti.

Thuphuan 3:12 12. Nehtu a simi cu ka Pathian ih biakinn sungah thuam ah ka tuah dingih cuih biakinn cu a tlansan nawnlo ding. Ka Pathian ih hmin cu a parah ka ngan ding; Jerusalem khawthar, ka Pathian ih khawpi hmin khal a parah ka ngan ding. Cuih khawpi cu vancung ihsin ka Pathian hnenin a rung tum dingmi a si. Cule ka hmin thar khal a parah ka ngan ding.

[4.15]

Bible ca hmaitin ih langsarbik kan hmuh mi, Pa leh Fapa le Thlarau Thianghlim ih duhdawt nak le pumkhat sinak thu a si ih, cumi cu innsang khal ah kan thlun ding mi a si. A netnak ah ruah a tlakzet mi cu an pathum in ai an awh aw ton ih, huham cahnak ah an tang tlang, sersiammi tlunah uktu an sinan cuih thazang cahnak cu hnatuannak lawngah an hmang cio a si.

[4.16]

“Pathian” thu hi kan ngainep pang a sile, in mawhthluk tu ding Jesuh a um a si. Hi ngan mithu hin a Pa le a Pathian a si mi hnenah thildang hmuahhmuah hnakih sang mi sunlawinaka pe ringring a si.Nang khal in, Jesuh in amai Pa lawnglawng hmuhsak in thu a rel ringring ih kannih khal in kan cawngve, kan Pa kan Pathian ti'n kan rel ve theu a si na ti thei. Mi tam pi in Pa lawng khi Pathian vekin an relsual theu, a sinan Fapa le Thlarau Thianghlim khal in an Pathian sinak an nei tawm ve a si. Pathian ti mi sinak hi Jesuh khal in nei ding a tlak ve a si. Anih cu Pathian a si (Jn.1:1,14,20:28; I Timo.1:1,2:3,3:16; Titus 1:3,2:10 le Hebrai 1:8-9).

[4.17]

Dan Petu

Pathian in a mi pawl kha, anmah hruaisuaktu ding Moses a thlah hlan sung hmuahhmuah Izip ram ah harsatnak leh nekcepnak tuarin kum sawmli sung a umter hai. Cutikah an neih mi leh lennak pawl hmuahhmuah kha a khawmter, hi hi an vanneih nak bik a sizia cu an thuanthu sungah a um. Sul sattu pawl leh mi thlen dahlo nak le hmuh dahlo nak hmunih vafehtu pawl bangin an thangso ih “caw-hnawi le khuaitizu luannak ramtiam ah thangso ih vatlanlen ding cu hngakhlapzet in an rak um. Tipi sen an rak kan laiih Pathian kutcak in leicar lak ih a hruainak le Faro ih ralkap pawl tipi ih a lemthluh thu a kutcak langmi an hmuh tikahPathian ih duhdawtnak danglam hleice kha an vun mangsuak sal.Hi hi Pathian in anmah a duhdawtnak a rak nemhngetnak a si tin an ruat.

[4.18]

An Pathian ti lungawi an duhzet nan ziangtin kan ti ding ti an thei lo? Cu tikah Pathian in anhruaitu Moses hnenah hrambur kang (Suahlan 13:4) in a rundamnak ding thu a run sim. Hilaifang ah hin Moses in Pathian ih dilmi a thei thei kem? Pathian in Moses kha tlang thiang hlim ih kai dingin a ko suak ih cunah a mipawl ih neih dingmi dan pawl a rak pe (Suah. 19:20). Mi hmuahhmuah thlun dingmi dan olte cu Pathian in Moses hnenah a rak pe. Dan pa khat an buar sual pang a sile Amah thawi rualremnak an tuah lehsal. Kum a cem zikzawngtinte innsang khat ih an thlahtu bik cun raitluan tuu(Suah. 12:5) kengin an sualnak hrangahsual rai a thawi ringring. Cui raithawinak cun kumkhat a daih ih sualsirnak tlamtling ah pom sak an si.

Suahlannak 3:4 4. Moses in a rak naih cu Bawipa in a hmuh tikah hrambur sung ihsin Pathian in,“Moses, Moses!” ti ah a ko. Moses in, “Bawipa hinah ka um,” ti ah a ti.

Suahlannak 19:20 20. Bawipa cu Sinai tlang parah a rung tum. Bawipa'n Moses cu tlangzim parah a ko ih a kawh vekin a hung feh.

Suahlannak 12:5 5. A tilva cu a him raitluan a si pei ih, a pa kumkhat ti a si pei. tuu a si lole me an hril pei.

[4:19]

Hremnak le thihnak, tiduhdahnak ihsin a luat zomi sungkua pakhat tei sung ih nunthar an thawh thukha ruat aw. Cui innsang cun ro thar an rel ih an Pathian ih ruahsak mi ram an thleng. An neih thilri pawl hi an thazet, a sinan cu lakah tuu le me raitluan cu malte lawng an si. Cui tilva cu an pipu san ihsin an neihcia mi an si. Hmundang ih cer ding le thawnsal ding silo in umhmun ih um ringring dingin an rak ruat aw; hihi mi hleice an sinak a si. An til va cu an kut rori in an cawmih hmin tla an sak cio hai men ding. Lehhnu cun an sualnak ruangah a si lole an sungkhat dang pawlih dan an buarnak ruangah simaw an tuu in rai thawinak an tul sal; culo cun cohlan tlak an si nawnlo. Puanthlam ih thawinak an tul ta. Cu cu an kut rori in an tuahih an ran cu a  or in an at ih a nunnak thisen cu an theh. cumi an ti lai ahcun ziang vek ruahnak an nei pei? Cui tuu note sual neilo cu keimai sualnak maw kan sungte pakhatkhat sualnak ruangah a thi sikhawh ti tla an ruat mahna, a si lole cui dan pa hra pawl cu kan rak thlun thluh tak ding hibang raitluan tuu fano thih khal tullo in ti khal an ruat mahna. Cumi cu ziangkhal le an sualnak ruangah a sibik mei.

[4.20]

Cun thutiamfa pawl in sal tannak ram an suahsan hnu ah Pathian thawi an pehtlaihawknakhi an daithlan thotho. Pathian ih ngaithiam thluh zo in an ruat aw. Curuangah hi thukham thar hin Pathian thawn an pehtlaihawknak thu ah ziangvek dinhmun a si ti kha a theihter sal. Cutin zohman Pathian hmai ah mai felnak in a ding theitu an umlo zia an zir phah vivo.Sual ruangah mi pakhat thi ding a si thu, lole man pek a tul thu an zirh hai.

[4.21]

Pathian in, laksawng hmuahhmuah lakih sunglawibik cu minung hnenah a pek hai, a sinannang cun nauhak hnenah thil kuaithei mi le thupi tuk thil kha ziangvek a si ti le a hmandan  na simfiang hlan ahcun pe duh hlah. Pathian cu mi hmuahhmuah ih Pa, innsang tin ih Lu bik a si vekin a famkim mi Tu cu sual ngaidamnak ding hrangah a run pe. Cucu dan in a fial mi ti famkimnak dingih raithawinak hrang men silo in Amah diriam le duhtling in, kum khat hrang lawng men silo in kumkhaw daih sual raithawinak hrangah a si. Pathian in a Fa pa neihsun cu a run pe ih cucu raitluan, a thin daihnak ding hrangih rualremnak netabik a tuah mi a si. Cui raithawinak sunglawi cu a thupi tuk milai ruahnak ih theih banlo tiangin tuahmi a si, na thawthawt mi tiangin a si ti thei thlang aw. Hi raitluan himtliang Pathian ih Tufano bawmtu neilo hin an hrangah a tuahsak mi thawinak tlamtling hi an tep vivo lai dinga si.

[4.22]

Moses cu Faro hnen ih a feh hlanah Pathian thu a ron ta, “Zo in i thlah ka va ti ding” a ti. Cutikah Pathian cun “va sim aw, keimah in ka thlah va ti aw” a ti. Faro le Moses hin a duh san hi an theilo men ding nan nang le kei cun kan thei thei. Pathian cun hitin a ti, “ Keimah cu a ra ding mi pa ka siih, a cungnungbik khal ka si” a ti. Sangkapi (puanthlam sangka), sanghlom (Insung cabuaiparih sang), leitlun tleutu mei in (insungih ban sarih parih van mi mei in) ak si a ti. Tukhal tha ka si a ti, tuu khaltu cun a tuu pawl thate'n a khalih an hrangah a nunnak a liamsak (raithawi nak tuu) cucu a si kan hrangah hmun thianghlimbik ah lut in puithiam in tuansaknak, hi leimi pawl tuah vek silo in vancung ah in lutter. Pathian hmai ih kan raithawinak cohlan tlak a si theinak dingah thla in camsak ruangah Anih cu a himtliangmi raithawinak Pathian Fapa a si ti a fiang.

[4.23]

Nelrawn ih puanthlam hi dar leh ngunih tuah a si. Dar khan thuthennak a hmuhsak ih nguncun Khrih a hmuhsak. Cui thuthennak cu Khrih ih liang parah a thumaw aw. Jesuh ih rong bawlnak hmaisa kha “Sir uh” (a thianglo mi hlon) ti a si. Cui puanthlam san ahcun zohman thenfainak hmunih athianfai awk ta lo ahcun Pathian thawn pawlawk a theih lo. Hi ti a sinakcu an sualtuah mi pawl le kut ih thisen kop thaw cun Pathian thawn pawlawk a theihlo a si men thei (I Korin. 11:27-32 hi ruat aw). Puanthlam leng hi ran vun in an tuamih cunah cun an tongkhawm aw hai a si (Suah. 26:14 leh IPit.2:5 hnuailam thu hin buk ton aw).

I Korin. 11: 27-34 27. Cuti a si ruangah zozo khal Bawipa hmin a siatnak dingah zoh mawilo in Bawipai sang a ei ih a khuat in a in tu cu Bawipai taksa le a thisen parah sualnak a tuah a si. 28. Curuangah zokhal hi sang a ei hlan le hi khuat a in hlanah amah le mah cek awta seh. 29. Zianghrangah tile hi sang a ei tik le hi khuat a in tikah Bawipai taksa ih tican a theihlo ahcun a ei a in tikah thuthennak a parah a tuahcih a si. 30. Hiti nan si ruangah nanmah lakah mitampi an natnak, tontaihnak le thihnak tiang nan tong a si. 31. Hmaisabik ah kanmah le mah kan cek fel aw ta a si ahcun Pathian thuthennak kan par ah a thleng lo ding. 32. Sikhalsehla Pathian thuthennak kan parah a thlengih amah in in cawh ngaingai a si ah cun hi leilung thawn siatral ta lo dingin in runsuak duh ruangah a si.

Suahlannak 26:14 14. Puanthlam khuhnak dingah a senih buh mi tuu cang phaw le a cui par a lenglam ih khuh dingah saphaw tha nan tuah pei.

I Piter 2:5 5. Nanmah khal ra uhla a nungmi lungto bang tukin thlarau biakinn saknak hrangih Pathianih hmanmi lungto si uh. Cutawkah puithiam thianghlim hnatuan nan tuan dingih cohlan tlakmi thlarau raithawinak kha Jesuh thawngin Pathian hnenah nan pe ding.

[4.24]

Puanthlam diktak cu Jesuh Khrih in a thianghlim bik hmun (Thinglamtah) par in a run sim suak. Hrambur alh ihsin Moses run betu pa kha Pa maw, Fapa maw, Thlarau Thianghlim ha a si? Moses hnenih dan petu kha teh zo ha a si? Zanah mei eng in sunah mero in a kil ven laiah khan teh zoha run be hai tu? Nelrawn ramcar ihsin thutiam ram tiang a hruaisuak tu kha teh zoha a si?

[4.25]

Hihi mitampi cun Pa Pathian an ti cio. Hrekkhat pawl cun Thlarau Thianghlim an ti ve. A si nan an pahnih in a sual ding. Adonay Eloheim, lehhnu ih Jesuh Khrih tiih kan run theih mi hi a si. A sile ziangtin ha kan theih thei? Hi tin na sim ding. Moses khan dan rung petu pa ih dunglam a rak hmu (Suah. 24:10 & 33:22). Johan ih sim mi thawn khaikhin aw,(Jn. 1:18,6:46 leh I Jn. 4:12 pawl hi ). Mi zohman in Pa Pathian an hmu theilo an ti a si ahcun Mosesin a hmu fawn, cun Aaron le midang mi sawmsarih pawlin Sinai tlangpar ah an hmu fawn, cuti a sile Moses ih a dunglam a hmuh mipa kha zo so a si ding? Taksa ih kan um sungah hicun thlarau pawl leh Pathian hi hmuh an theihlo ih curuangah Pa Pathian khal hi Thlarau a si ve ruangah hmuh theih a si ve lo (Jn. 4:24).

Suahlannak 24:9-10 9. Cule Moses, Aaron, Nodab, Abihu leh Israel mi hruaitu sawmsarih cu tlangparah an feh ih 10. Isreal mi ih Pathian cu an hmu. A ke hnuai ahcun a thianhlim tukah vanfim a bang mi mepian lungvar ih phah mi lungphah bangtuk a si.

Suahlannak 33:22-23 22. Na kiangte ihsin ka sunlawinak a ra lang tikah lungpi kua sungah ka lo thup pei ih ka lo lan ngah hlanlo ka kut in ka lo hup ding. 23. Cun ka kut ka laksal tikah ka dunglam lawngin i hmu ding; ka mithmai cu na hmulo ding tiah a ti.

Johan 1:18 18. Zohman in Pathian cu an hmu dahlo, A pai Fapa neihsun, a tang sungih pom mi, Pa thian a si miin a langter zo.

Johan 6:46 Hiti ka ti tikah zokhalin Pa cu an hmuzo tinak a si lo; Pathian hnen ihsin a ra mi pakhat lawng kha Pa hmu tu cu a si.

I Johan 4:12 12. Zohman in Pathian cu an mit in an hmu dahlo, sikhalsehla pakhat le pakhat kan duh dawt awk a si ahcun Pathian thawn pehzom in kan nungih a duhdawtnak cu kan sungah afamkim a si.

Johan 4:24 24. Pathian cu thlarau a siih a betu pawlin thlarau le thutak in an biak ding a si ti ah a ti.

[4.26]

Pathian in hrambur alh in siseh meisa ding sungin siseh a run be rero, zotak ha tongtu hi? Pa maw Fapa an si deuh ke (Jn.14:6)? Khrih locun zohman Pai hnen a thlen theihlo.

[4.27]

Tipithuanthum cat tertu kha Jesuh a si ih, tlangzim ih Moses rak betu khal Amah Jesuh, hrambur alh ih rak betu khal kha Amah Jesuh a si. Israel fate pawl meisa ban ih kaihruaitu khal kha Amah Jesuh thotho a rak si. Ramtiam ih rak hruai thlengtu khal Amah Jesuh, Je suh, Jesuh a rak si ih culai ah van ihsin mana sang a run vorh ih lungpi ti in a rak cawm hai. Lungpi an tongih, Amah hi cui lungpi a siih nelrawn ramcar lakah A thlunih ramtiam thlen  tiang (I Kor.10:1-4).

I Korin 10:1-4 1. Ka u le ka nau tla Moses a thluntu kan pi le pu pawl parah ziang a thleng ti kha cing ring ring uh, ti ka lo duh. Annih cu mero in a hum hai ih an zaten Tipi sen an tansuak. 2. Moses thluntu an si bangtuk in mero sung leh tipi sungah tihnimnak an lak. 3. An zaten thlarau sangreu phunkhat an ei ih, 4. An zaten thlarau tidai phunkhat an in. An hnenih a tel ve ringring mi thlarau lungpi ihsin ti dai an in ih,cui lungpi cu Khrih a si.

[4.28]

Tufano Khuitawkah A Um?

Pathian in Abraham leh Sarah tei nupa hnenah thu a rak tiam (Sem.17:19-21) ih Abraham  cun a zum mei. Abraham cu Pathian ih rinumnak in a cokharh ih a fapa a hlan, raithawinak dangdang khalah a Pathian a rinsan (Sem.22:7-8). King James bible sung ahhin a rinnak hi ziangtluk a nasa ti kan hmu thei, “ka fapa, kan mei ur thawinak ding tuu cu Pathian in a mahte a tumaw mei ding” a ti: curuangah Pathian cu thawiawknak hrangah a tumcop aw: cucun raithawinak a run cemter. Baptist tu Johan cun a feh rero lai ah, “zohhnik Pathian Tu fano, leitlun sualnak tlengfaitu khi” (Jn.1:29b) a ti. Hlanlai ih tufano rak petu kha tu ah cun a mah khaTufano ah a rungcang ih cucu Jesuh a si.

[4.29]

Thukham hlun ahcun Jesuh cu dan umlo ih ta dan petu a si, ziangah tile minung hin sual thu hi a ruat thiam lo, curuangah dan a umlonak ah sualnak a theih theihlo (Rom 5:13).Cu tik ah dan cu in zirhtu a rung siih Pathian hmai ah zohman mi dingfel kan umlo zia in zirh suak (Fil.3:9; Titas 3:4-5) Kawhhran tuahthatnak can a hung suah (Jesuh ni Heb.9:10) tik ah cui dan cu a tulsal nawnlo; Pathian in mikip thinlung ah danglam ciarin a ngansak thluh zo (II Kor.3:3). Kannih khal Thlarau hruai mi kan si ahcun cui dan hnuaiah kan um nawnlo (Gal.5:4,3:11-13; Jaim 2:10).

[4.30]

Filipi 3:9 9. Keimah bul in ka dingnak ka thei nawn lo; dan thlun tahrat in ngahmi dingnak pawl khal ka nei nawn silo; zumnak thawngin Pathian hnenih ka ngah mi dingnak a si.

Titas 3:4-5 4. Sikhalsehla in Runtu kan Pathian ih zangfahnak le duhdawtnak a run tikah kannih cu in runsuak. 5. Kanmah in thiltha kan tuah ruangah silo in a mai zangfahnak ruangah in runsuak a si. Thlarau Thianghlim ih in kholhnak thawngin hrinnak thar le nunnak thar kan ngah.

II Korin 3:3 3. Hih ca a ngantu amah Khrih a siih kannih hi a phurtu ah in hman mi kan si ti hi fiangzetin a lang. Cui ca cu cati in nganmi a silo, a nungmi Pathian ih Thlarau in nganmi a si; lung pheng parih nganmi a silo, milai thinlung sungih nganmi a si.

Hebrai 9:10 10. Ziangahtile cui raithawinak pawl cu rawl le tidai leh thianfainak ih tuah mi thawinak thawn a pehtlai aw mi a si.

Galati 5:18 18. Pathian Thlarau in a lo hruai ahcun dan hnuai ih a nung mi nan si nawn lo.

Galati 5:4 4. Nanmah lakah dan thlun tahrat in Pathian hmai ih thiamcoternak ngah a tumtu cu Khrih thawn nan pehnak hri nan saattan zo a si.

Galati 3:11-13 11. Ca Thianghlim in “Zumnak ruangih Pathian thiamcoter mi lawng an nung ding,”a ti ruangah danthlunnak in zohman thiamcoternak an ngahlo ti cu a fiang zo a si. 12. Curuangah dan le zumnak cu pehtlaih awknak an nei lo. 13. Sikhalsehla Khrih cu kan hrang ih camsiat mi a si ruangah dan ih a thlenpi mi camsiat nak ihsin in runsuak zo. Ziangahtile Ca Thianghlim in, “Zokhal thing parih thlai a si mi cu Pathian camsiatnak a cotu an si,” ti ah a ti.

Jeim 2:10 10. Cule zokhal thukham pakhat a buar ahcun thukham zate buartu a si.

[4.31]

Mi pakhatkhat in Jesuh Khrih hi Thukham Thar hnakin Thukham Hlun ah a langfiang sawn tla a ti mei thei. Ziangruangah? Ziangahtile Thukham Thar ahcun Amai duhnak silo in a Pai duhnak tuah ding ih a rung langnak a si ruangah a si. Jesuh Khrih ah ka unau pa leh ka rualpa a simi, Ted Brooks ih cangan mi, "Thusim bawmtu ka rak si” timi cabu ka siartheh hnu ahcun thiltha sawn tuah theitu ka silo thu ka theisuak aw ih amai siannak in a ca vekin ka rak ngan suak sal.

Jesuh In Pathian Sinak Diktak a Phuangsuak

[4.32]

“Zohman in Pathian cu an hmu dahlo. A pai Fapa neihsun, a tang sungih pom mi, Pathian a si mi in a langter zo a si’ (Jn.1:18). Fapa hin Pathian ih sinak diktak a phuang. “Phuang suak” timi hi Pathian cu a Fapa ihsin kan hnenah hmuhtheih in a “langzo” tinak a si. Cu ruangah Jesuh hi “Immanuel”  “Pathian kan hnenah a um” kan tinak a si. Curuangah kan theih theilo dingin a thupaw lo. A sinak leh a Thu cu taksa ah rungcang in cui Thu cu kan Bible sungah tu cun a nungih a rong tiangin kan hmu thei thluh zo a si.

[4.34]

Pathian Fapa cu a razo ih theihthiamnak in pekzo ruangah Pathian taktak kan thei ti a fiang . A Fapa Jesuh Khrih thawn pehzomnak kan nei ih ruangah a hman mi Pathian thawn peh zomnak kan nei thei. Amah a dik mi Pathian hi kan hmuhfiang hnu khalah kan thinlung a buai lai ding. A sinan tu ahcun Jesuh Khrih ah kan hmufiang thei zo a si.

“Khrih cu Hmuh theihlo mi Pathian Hmuihmel langnak a si” (Kol.1:15).

[4.34]

Hmuihmel timi hin “bangnak” timi a simduh; curuangah Pathian ih sinak leh hmuihmel tak  kha Jesuh ah kan hmu thei, “Amah cu Pathian sunlawinak langtertu a siih Pathian vek cek ci a si” (Heb.1:3).

[4.35]

Jesuh cu Pathian sinak diktak neitu a si. Curuangah Jesuh hi Pathian sinak a hrekkhat lawng hmuhsaktu silo in a zate’i hmuhsaktu in a ra. Taksa in Pathian sinak kengkawh in a rung. Hitin mi in an lo sut thei men, cuti a sile Pathian cu ziangtin kumkhaw pa sisi in a ra lang thei? Hi thu hi Paul cun a theifiang nasa.

[4.36]

“Amah cu minung taksa in a suak--leilung khuazakip ah an zum ih an sunloih” (I Tim.3:16).“Pathian in a thuthup cu a phuangih kan hnenah a langter zo (hi thu cu a tawi zawngin kanngan zo ih, cui kan nganmi nan siar ahcun Khrih ih thuthup ka theihdan cu nan theithei ve ko ding). Hlan ahcun cui thuthup cu milai hnenah phuan a si dahlo; sikhalsehla a tu ahcun Pathian in a dungthluntu le profet pawl hnenah a Thlarau thawn a phuang zo”(Efesa 3:3-5).

[4.37]

Thuh Mi A Um Nawnlo

Pathian cu a thup aw nawnlo! A sersiam mi pawl khal a thup nawn hai lo! A thuthup khal a um nawnlo! Jesuh Khrih taksa ih rungcannak ihsin Pathian cu fiangzet in kan thei thei.

[4.38]

“Ziangahtile Pathian a sinak cu Khrih a minung sinak sungah famkimzet in a um” (Kol.2:9). “Cutin a Fapa sung ihsin lei le van a pumpuluk cu Pathian in a hnenah kirsal a duh”(Kolo.2:19).

[4.39]

Veikhat cu ka rualpa thawn thu kan rel laiah sa vetvet in hitin thu ka sut, “Pathian cu Khrih ah a lang famkim thluh zo a silo sawm khakha a sunlawinak a hrekkhat lawng maw rak lang” ti ah ka sut. Ka thu suhnak cu i let theilo. Cumi ihsin ka theihsuah mi cu mi tampi in thusuhnak hi tlamtlingtak in an sang theilo men thei, ziangahtile Pathian ih phuansuahnak thu an theihlo ruangah a si ti ka fiangaw aw.

[4.40]

Pathian Cu Famkimin A Langzo

Pathian sinak famkim hi Jesuh Khrih in leitlun ih a langsuah zonak kan theihfianglo ahcun a dikmi Pathian a sinak le Thlarau a sinak kan fiang theilo ding. Cule Pathian ih mizia kan theihfianglo ahcun amai duhzawng silo in thlarau dangin in hruai peng mei ding. Hibang pawl thliardang thei dingah kan theih ngeingei tulmi cu Jesuh Khrih ah Pathian cu famkim te'n a langsuak zo ti hi a si.

[4.41]

"Cui Thu cu minung ah a cang ih kan lakah a um; zangfahnak le thutak in a khat. A sunlawi nak kan hmu ih a Pa in a fapa neihsun hnenih a pek mi sunlawinak a si” (Jn.1:14).

[4.42]

"Zohman in Pathian cu an hmu dahlo a Pai Fapa neihsun, a tang sung ih pom mi Pathian asi mi in alangter zo a si” (Jn. 1:18).

[4.43]

“Sunloih” timi ih duhsan cu mi pakhat in midang a ruahdan langternak khi a si. Curuangah Jesuh Khrih khal van ih a Pai duhnak dokalhtu le theisualtu pawl siatbal tu dingah a runnaksan a si. Kannih khal cui van Pathian kan theihdan a sualzawng a si ahcun Jesuh Khrih in kan theihnak thinlung cu in kheng  nasa thotho ding Amah in fel famkim in Pathian ih mizia in hmuh zo a si.

[4.44]

Jesuh khal cu kan lakah a rung um ih a Pa a rung sunloih. Bible sungih kan hmuh theimi tla hi a sinak te lawng a si hrih. Cupawl cun A thinlung mizia leh a sinak pawl leh a minung sinak an simfiang hai. Sim duhmi cu thil hmuahhmuah hi an hmin zulh in an si thluh tinak asi.

[4.45]

“Jesuh” ti hi a sinak hmin men lawng a silo. “Jehovah in a run hai” a si lole “Jesuh cu run damnak a si” tihi a hmin san an si. A hmin theifiang ding cun a mizia khal theih a tul tinak asi. A sinan thildang khal a um lai hokhaw. Jesuh cu amah le mah ai awh aw ding silo in a Pai ai awhsak sawn dingin a ra. Curuangah Jesuh cun a Pai hminsal in a ti langfiang. Cucu leitlun ih a hnatuan nak leh a hmin pumhlum Jesuh, Jehovah ti cu kan rundamnak ti pawl hin kan theifiang thei a si.

[4.46] “ Na hmin cu ka langter zo”----(Jn.17:6). “ Ka pa ih thu in ka tuah mi thil pawl”---(Jn.10:25).

Pathian Hmuihmel Phuansuahnak

Hebrai cakuat bung khatnak ahcun Jesuh cu Pathian hmuihmel phuansuah awknak a si thu kan hmu thei. “Amah cu Pathian sunlawinak langtertu a siih Pathian vek cekci a si (Heb.1:3 NSRV)

“ Amah cu a sunlawinak rung tleusuak, Pathian ih sinaktak puansuahnak a si (Heb.1:3, Green literal translation).

[4.47]

“Sinaktak” timi hi tongkam dik a si, ziangahtile Jesuh cu a diktak in Pathian ih mizia “ruah" nak a si. Culo cu leitlun ah thildang zianghman a cekci ih relnak a um lo. Anih cu Pathian si nak cekci kengkawh tu a si. Tu ah kan rel ding cu kan rel theh zo ih: cucu Thlarau ih lang fiangnak thu le thutak timi khaikhin duh ruangah a si, kan theih dingmi ah thutak kan timi himibulpak (person) a si.  

[4.48]

A Dikmi Lungphum

Voikhat cu ka umnak khaw kiangah Coffee cetzung ih hnatuantu pa thawn an tuahdan thu rel in kan to tlang. Cupa cun Pathian ih thil tuahmi pawl hi Bible sungah kan hmu theilo timithu pom dingin i sim ciamco. Jesuh hi Pathian phuansuahawknak a sinak rello in boruakih seh dandan in thil hi ra cangmi an si ti thu leh nunphung dan leh tehton thil pawl khal hi cu vek ihsin ra cangsuak mi an si sawn thu, Pathian ih thil tuahmi pawl hi kan theihnak leng lam thil (theihbanlo) an si thu theilo in amai ruahnak thu in sim ciamco.

[4.49]

“Jesuh Khrih cu Pathian hmuihmel cekci a phuanawknak”  ti thu kan ruah tinten kha pa kha ka mang ringring ih hi thutak hi theifel ve sehla tihi ka saduhthah mi a si. Cun Khrihfa hmuahhmuah cun Jesuh lawngah thutak kan hmu thei ti'n kan ruatih cutin a netnak ahcun Pathian khal a Fapa ah a rung phuangsuak aw----timi thutak hi Ted khal in dik le felzet in a rak rel mi a si.

[4.50]

Ziangah Na Fapa Neihsun Na Tirh?

Pathian hi sersiam mi hmuahhmuah tlunah huham tumbik a neitu a si. A duh dandan in a lungtum cu a ti famkim thei ih a kimter ding a si. Pathian in minung hi Sinai tlang parah kai terih veithum helter in a rundam duh a si ahcun cutin a tuah thei thotho. Pathian ih thilti thei nak tlun ahhin thildang ziang um? Cuti a sile hi Setan uknak ihsin milai runsuaktu dingah ziangah a Fapa ngelcel a run hril? Ziangruangah so thildang tla hril sawn lo in a um?

[4.51]

Hibang thu pawl saupi ih kan ruah hnu ah theih theinak ruahnak pakhat ka lo sim duh. Hihika hrangah thudik a si. A siko thil uanthlak vek tla a bang nan thudik a si. Tu ah ka sualnakpi thaw hin thi tariai sehla Pathian ih thuthennak tohkham hmai ah ka thleng dingih vokpi hriamhma pu bangin ka ngek ngurngo ding ti ka thei. Hi thu ah thudang relcih lo in Pathianhi cu a va sual lawmmam em ka ti ko ding. “Maw Pathian na van ralkap pawl thawn na vanah to uhla na duh mi hmuahhmuah kha lo tuahsak thluh hai seh a sinan nang cu hna na tuan dahlo, insang khal mi na bawm dahlo ih na dawnkham mi pawl siatsuah lo dingin a phunphun in na be-leem ih rittheih in ding thu ah siseh, fala tlangval sualnak thu ah siseh hibang pawl hi a tlaitluan in na on ringring fawn. Cuitlun ah sual tuah pawl hi ziangtik hmanah na hminsin dah hai lo, an insang khal na siatsuah dahlo hruh ding hnipuan leh umnak ding inn na pe lamlam ih tlunah fimthiamnak tla na vur betbet. Cun ka duhnak khal theih na tum dahlo ih ka harsatnak, ka riahsiatnak le natnak pawl khal i theihpi duh lo. I bawm aw he ka cak na ti si! Hell ram ih thlak i duh a sile ziang ka tuah hrih ding? Na diknak thu i sim hnik. Na rak tuah mi sia le tha theihnak thingkung a si lole rulpi hnenin ka tlansuak duh lo tin ka ti ding. Thudang ruatlo in hibang thu pawl hin el ka duh mei thei, a sinan Pathian hnen ah a zate’i tuah dingah ziang thu na sim ding? Hi thu ah hin kannih in zianghman rel ve ding kan neih ve lo ruangah a si a Fapa neihsun cu Pathian in a run tirh suah. Cuti a sile ziang sim ding kan nei hrih? Cumi ruangah cun thuthennak hmuahhmuah cu amai hnenahpek thluh a si zo (Jn.5:22).

Johan 5:22 22. Pa in zo ih hnen hmanah thuthennak a tuah lo. Fapa hnenah thuneihnak a pe zo.

[4.52]

Jesuh  Tlawm Sehla Ziang A Cang Ding?

Mi tampi cun Jesuh a tlawm ding tihi a ruah khal an ruat dahlo. Anih cu mi famkim a siih ziangtinso a tlawm thei ding Pathian a silo maw? an ti. A si a tlawm theilo ti kan thei ko nankanmah milai vekin tlaksiat a tong, cucu kan hrang sual thawinak a si ruangah ti kan ruat ban lo. Kei khal in Jesuh hin sual a rak tuah pang teh a si kei maw ti'n ka ti theu. Setan hi Thlarau lam thilthu ah kannih ai in a thei sawn ziangah tile vancung le vanram uktu ah Pa thian in hna a rak pe lawk (Ezek.28:11-19). Pathian zumzet vekin Jesuh nelrawn ramcar ih a rak thlemdan kha na ruat dah ngelcel maw, a sinan Anih hrang ahcun sual tuah ding cu thil cangthei mi a silo (Matt.4:1-11)?

[4.53]

Kan theihdan a suallo nak dingah fiangten ka sim duh mi cu, Jesuh kha milai taksa a rak ken veten tawpcin nei vekah a cangih cahlonak ih khat thil siat ol vekah a run tuah aw. A mah thlun ding in fial. Cuvek ih mi cuangcuang (super man) a si ahcun ziangtin kan thlun thei ding? Sual tuah theilo sisi in sual ka nehzo ti cu thil cangthei a si maw? Kanmah vek si lo in ziangtinso kan puithiam sang a si thei ding (Heb.5:1)? Puithiam sang kan timi cu mi cungcuang, ai awhtu tinak a si. Cuvekin Aaron cu Israel mi pawlih puithiam sang a si, a si nan a sual thei ve. Jesuh lawng te cu a sual thei dahlo.

Hebrai 5:1 1. Puithiam sang hmuahhmuah cu a mipi sung ihsin hrilmi an ai awhtu ah Pathian hnatuan tu dingih ret mi a si.

[4.54]

Ke khat lawng tha mi (kebai) pawl tlanzuamnak ah na ke hnih hmangin na tel tum a sile thilcangthei a si pei maw? A silo. A sinan ke khat tawntar in khatlam lawng tha vekin tel tla cu a cangthei ko. Jesuh hi taksa le thisen nei in a run tikah zianghman hamthatnak a nei ve cuang lo. Ziang a simduh? Cucu amah le mah a titawp aw tinak a si. Hi thu ah Berean mi pawl vek nan si ka lo duh, Hebrai bung hnih cang hleiruk ihsin hleisarih tiang kha nangmai hrangah siar hnik aw. Tlawm theinak a umlo ahcun thlemnak teh a um ding maw? CuvekinAnih khal thinlung ruahnak nei, siatral theimi taksa, le thlemnak tong thei mi pumrua ah milai ah a rung cang. Amah cu Satan in a hmuitinbik mi cu a si.

Hebrai 2:16-17 16. Ziangah tile a bom mi pawl cu vancungmi an silo ti a fiang. Ca thianghlim in a sim vek in, “Abraham ih tefasin pawl an si” ti a si sawn. 17. Cuti a si ruangah ziangtinkim ah a unau pawl vek a si ve a tul ih cuti a sinak cu minung pawlin sual ngaidamnak an co theinak dingah Pathian hna a tuannak ih rinsantlak le zang fahnak neitu Puithiam sang a si theinak dingah a si. 18. Amah rori in sualforhnak le harsatnak a tuar zo ruangah a tu ah sualforhnak a tong mi pawl a bawm thei a si.

Hebrai 4:14-16 14. Curuangah kan zumnak hi khohzet in kaihnget uh si. Ziangahtile Pathian Fapa Jesuh cu kan Puithiam sang a siih amah cu Puithiam umnak rori ah a thleng zo. 15. Kan Puithiam sang cu kan tontaihnak in theihsak lo tu Puithiam a silo. Kanmah vekih sualforhnak a phunphun tong ve mi a si. 16.Cuti a si ruangah zangfah lainatnak umnak Pathian bawi tohkham cu ralthazet in pan uh si. Cutawkah zangfah lainatnak cu kan tul can ah kan ngah ding a si.

[4.55]  

Jesuh cu kanmah vekin a san sung hmuahhmuah ah thlemnak a tong. Culawnghman silo in a Dungthluntu pawl tiangin. Annih in hmunkip ah an thlun hai. Tu cu thlemnak voithum a ton thu kha kan ruat duak kei uh. Jesuh hin a ton ding mi thil hi a theih thluh ruangah a rualpi thabik mi pathum thawn Getsmani hmuanah an feh. Hihi a rongbawlnak ih thazang thar a ngah lehnak ding hrangah a si; mangbangza in dodalnak a tong. An phatsan ding leh mualphozet ih an tuah ding thu pawl khal a theicia theh, reilo te sung an hliam dingih sim theih lo tiangin a tuar ding thu khal a theicia theh ko, cuvek dinhmun in thlemnak cu a rak tong ve a si. Hihi ziangha a si? Hmindang kan sak ngam ve ding maw?

[4.56]

Cuvekin na hnenah ra in, umngaihnak ka theilo ka lung a ngai tuk ka thi men ding tin ka ra ti tikah, ka thih tumnak cu ziangtin i rak sawn pei? Nangmah te thahawk na tum a sile cu a dik ko, mi pakhat amahte thahawk tum mi cu ziangtin midang in an tuahsak in an phelhsakthei ding, a tumtah mi a tulh hlan ahcun? Ka naihbik le ka rinsanbik rualpi pawl cu ka pan dingih in kil tha dingin ka beisei hai ko ding, Na si ve lo pei maw? Cuvekin Jesuh khal kha thlemnak nasatuk a tuar tikah a rualpi pathum pawl panin a va fuk hai a si kha. Jesuh in “thi ding khawpin ka lung a ngai; hinah um hrih awla, in rak hngak hrih” (Matt.26:38) a ti vek khan kan ti ko ding. Setan hin Pathian Tufano hi thinglamtah parih hlanawknak le thawinak famkim tuahsuak lo dingin a phunphun in a thlem thlu tum rero a si.

[4.57]

Cutheh in Jesuh cu luatter thei dingin thuneihnak a nei tu Pilat hmai ah a thleng. Cutikah Pilat in upa pawl leh puithiam sang pawl ih duhnak kha kimter sak a duhlo, Jesuh thah a remti fawnlo (Matt. 27:23). Hifangah ziang a cang? Pathian cun a Fapa himtliang cu hi leilung tlun ah thawinak pe dingin a run thlah si khawh. Jesuh hin a hna a thehlo a sile, leilung hin a kumkhaw nunnak a hloh ding. Curuangah Setan hin Jesuh kha a harsabik hmunah a umter. Hilaifang ah hi cun Jesuh khal a cangvai ve thei talo. Pilat hnenah khan thudik sim seh la a thlah mei ko ding, cutin himtliang rai a run thawi ta a si. Pilat hnenah khan a sual thu rak sim tariai sehla thuphan per a si dingih himtliang raithawinak ah a tling nawnlo dingih Pai cohlan a tlak nawnlo ding. Ziang a tuah nawn ding? A sinan anih cun profet Isaiah rak simcia bang khan, “tuu a hmul mettu hmaiah daite’i a um bangin, Anih khal a ka a ang lo,”(Isa.53:7) famkim ten a run tuahsuak thluh. Jesuh kha a dodaltu pawlin an phiarhrim a si ti Pilat in a theih tikah, a luatnak dingah thiamthu a rel velo a si hi ti a theifiang. Hi tivek diklo lutuk thlemnak lak khal ah Jesuh cun zianghman ah a thiamthu a rel ve dahlo. A voihnih nakah Setan pa cun himtliang rai cu tibuai dingin a si lole biaktheng parah thawi aw dingin a thlem sal, thuthimnakah, biaktheng raithawi hnu in thinglamtah parah, a sinan Setan pa cu a sung ruairo thotho.

[4.58]

Jesuh Khrih hnatuan milai runsuah hna hi tisiat dingah Setan pa hin neh tumin tumtahnak pahnih a rak nei. Jesuh Khrih hin sualnak a neihlo ruangah thinglamtah parih khenbeh dingah a tling. Hi thawinak hin luat dingin rak zuam ta sehla Anih khal sual tuah ah a cang dingih raitluan a tling nawnlo ding. Hiti a sile a rundamnak thutum cu a riaral ta ding, thisensuahlo in (himtliang) sual ngaidamnak a um lo ti a si fawn (Matt.26:28; Heb.9:22). Jesuh insual rak tuah tariai sehla ziang kan cang ding?

[4.59]

Jesuh ih hmabak cu himtliang raithawinak thinglamtah parih thih hi a si. Ka zumnak ah hihilo theihlo thil a si cengmang ahcun thinglamtah khal kha a kut zungpi rori’n a tah ko dingihGolgotha ih thinglamtah bankhur khal kha Amai kut rori’n a rak lai men ding. Amahte'n a phun dingih a kai khal a kai thei ko. A si kanmah vekin Jesuh in thazang cahnak cu a dil veko, cumi cu a hna thehsuaknak dingah pek in a um.

[4.60]

Setan in tingaihnak a thei nawnlo ih a netabik ah mipi au-aw hmangin Jesuh sulhsek thei dan ding a zuam salih titer aw takin, “Pathian Fapa na si ngaingai le thinglamtah par ihsin rung tum aw he (Matt.27:40) a ti. Cutikah Jesuh cun a Pa le a ralpa’i hnenah “hihi ka theh zo” (Jn.19:30) ti’n a ti. Cule cui himtliang rai khal cu cosak in a um ih tu ah rundamnak cu a hlawhtling ter, cumi cu kanmai zuamnak le tuanvenak tullo in sual ngaidamnak kan co thei hi thil mangbangthlak a si.

[4.61]

Pathian cu minung mithmai zohtu a silo ( Dung.10:34) ruangah boruak parah siseh, a hrin fale pawl siseh, vancungmi pawl hnenah siseh a thlengaw dahlo ih mi thleidannak a nei lo ( Mal.3:6; Heb.13:8).Thuthentu dik ( II Tim.4:8) a siih mi thleidannak dan a nei lo. Cuti a silea fa le pawl leh zumlotu pawl hi bangrep ten sual kan tuahtlang tikah a zuah ce cuang dingmaw si. Setan hi a dodal ruangah vancung ihsin hlonthla in hellram ah a hlonthla bik ding maw? A zangfah ce cuanglo ding.

Dungthluntu 10:34 34. Piter cun a thawh ih, “Pathian in zozo khal bangran ten mi a zoh a si, ti kha a tu ihsin ka thei.

Malakhi 3:6 6. Cungnungbik Bawipa in, kei a thleng aw dahlo mi ka si. Curuangah nannih Jacob tefa sin pawl cu nan cimit hrih lo ding a si.

Hebrai 13:8 6. Jesuh Khrih cu mizan, tui sun le kumkhua in a hmun ringring a si.

II Timote 4:8 8. A tu cu kan Bawipa, a ding mi thuthentu Bawi in cui NI ah i pek dingmi nehnak laksawngka hrangih in ret sakmi cu ka hngak. Cui laksawng cu dingnak Suilukhum a siih keimai hrang lawngah a silo; duhdawtnak thawn amah lang ding a hngaktu hmuahhmuah hrang khalah a si.

[4.62]

Jesuh hin sual a tuah thei ve maw? Tuah thei ve lo, a sinan kanmah in humnak ding ruang ah tuah thei ve a bang. Cuti a sile ziangtin a si ding? Jesuh hi thlemnak ah veikhatte rak tluve bang sehla Pathian a dodal ve lo ding maw si? Sualnak hmuahhmuah hi dodalnak kan ti fawn si? Vancung kan Pa hin a duhdawt tuk kan ti fawn? Kanmah in humtuknak ruangah a Fapa neihsun cu a then thei ding maw si? Cuvekin Jesuh khal hin a Pa a duhdawt tuk ruangah A duhzawng thlunnak ah a se zawngin in hmu ding maw si (Jn.3:16)? Pa thawn kan rualrem lehsalnak dingah hremnak leh ti duhdahnak tuarin Pa thawn kumkhua cun an then aw thei ding maw? Jesuh cun kan hrangah a nun a pe, cucu a hleice ih pekmi lak sawng lawng silo in, a danglam hleice, sualnak khal a neilo. Mi hmuahhmuah in an nun za te deuhthaw in an duhmi hrang ahcun an pe ngam cio hai, hihi thil hleice a sinan thilmak danglam cu a silo. Kannih cu Jesuh ih thihnak thu lawngin kan thinlung luahkhat hlah seh, a nunnak tla ruah cih a tul. Jesuh Khrih hi thlemnak veikhat rak doneh lo ta sehla Anih khal Setan vek thotho in a van a se ve ding. Thinglamtah ban parih a nunnak thu thei silo cun ziangtinso a thihnak lawng cu kan uar thei ding, Pa le Fapa ih tuannak mankhun zia theilo in ziangtin kan uar thei ding? Mi hrekkhat cun A hrangih thihsak in dil lo nak ah thih kan ngam tla a si men thei. A sinan Anih cun a hrangih nun ding in dil sawn. Pathian in “cuti a si ruangah ka u le ka nau tla, Pathian zangfahnak thawngin Pathian hnenah nan ruangpi kha a thicia raithawinak vekin thawi uh," a tilo," a nungmi raithawinak vekin” (Rom 12:1-2) ati sawn. Jesuh Khrih in a taksa thih ding lawng hi a tumtah mi a silo; kumkhaw nun kan ngahsalnak dingah a zuam mi sawn a si. Rak tlinlo sehla cu, Pa le kanmah zaten in hloh thluh ding a si.

[4.63]

A tangsun mi kan damsung can tawite hi Amah riannak hrang lawngih hmang dingah in dil, in sawm ringring. Tu ihsin Khrih ih laksawng famkim kan hmuh thei zo ruangah Baptist tu Johan vek khan tu ah kan zaten kan pumhlum le kan lukun in Amah be phah in, “Zoh uh Pathian Tufano Khi,” kan ti cio thlang kei uh.