KHRIH IH FIALMI

KHRIH IH FIALMI

Hminsin: Cangantui dinhmun theifiang dingin, Casiartu Hnenah timi thu hi siar hmaisa aw.

[5.1]

Hmuhdan Bangawklonak

Tulai kawhhran sungih lungruallonak a suah ciamconak bik cu Dungthluntu pawl le Jesuh Khrih in an hnenih a pek mi tuanvo famkimter thluh ding timi thu kan theihfianglo ruangah a si. Hi thu hi thungaithlak in kan thinlung le ruahnak sungih kan ret lo ahcun vanse pittawpkan si dingih thurin zuangzam men in in cimbuai vivo ding a si. Thukham Thar ngantu pawlkan ringhlel ih Pathian fial mi an famkimter theh ti kan zumlo a si ahcun, an nganmi pawl a dikin a hman a si ti cu ziangtin kan ti thei ding? Cuti sisehla thlemnak hi teh ziangtin kan kham thei ding, kanmai lam tidan vek cun? Hiti vekin Israel fate pawl khal kha an hruaitu umlo in thuthentu san lai ahkhan an rak um ve hai. Pathian belruat mi pawl an um hlan ah cun Israel mi pawl cun anmai tha ti zawng hlir an rak tuah (Thut.21:25). Cun Pathian hmai ih a tha mi tuah hi teh ziang a si pei? Tulai san sinsin ahcun kan luar sawn, cuvek rori kan si ko. Thukham Thar ngantu pawl ih zirhnak pawl hi sual theilo le famkim ti pom duhlo in kanmai duhdan le lungkimdan zawng vek hlirin kan phuah theu mei ih cumi in rinhlelnak le buainak a thlenter ( IIPiter 1:21).

[5.2]

Bible hi kan ngaihlo zawng, kan thinlung sawh deuh le kan ti theilo mi fialnak thu deuh a um a sile kan hnawl tahrat ih a ngantu ih diklo tiang kan puh mei theu. Thukham Thar then thum ih then hnih hi amah in a ngan ruangah Paul tla hi cuvek in kan puh theu. Cun mihrekkhat a hmin men ih Khrihfa tiaw pawl cun Bible ih sim mi pawl hi hnam hleice, nunphung hleice le Bible ngan sanlai hrang lawngih nganmi a si ti zawngin an ruat mei fawn. Cuvek in nunau in mipa thu zirh le Pastor tuanter awih lo, thlacam le thuphuan tikah an lu khuhter le khawm can ah daitei umter ti thuvek tla kan hrial ve theu. Cuvek thotho in pakhat leh pa khat ke kholhsak, Bawipa zanriah hman can ih no pakhat hman, sang hlomkhat ei khawm tivek khal hi hrial theih mi thotho an si. Cun Baptistma thu khal ah a remcannak hawlih tidaihman mai ai in hnimphumnak hi kan hril thei. Bible ih simmi sual thuthen dan thu tla hi kan theihfianglo ruangah zuk le hmawm khal kan tuah mei theu. Mipa pawl in Pathian hnen thlacam lole thuphuan tik khalah an lukhuh phelh a tul cuanglo, an innsang lubik le thuneitu si khal a tul kherlo ih sungkua cawm thluh ding tuanvo neih ding khal a si cuanglo an ti. Hi bang pawl hi hlon thluh in, siarcawklo khawp in thudang bet khal awla, a netnak ah ziang atang pei? Ongkual ih khat mi thuthlung pakhat te lawng a tang ding a si.

[5.3]

Tuini ahhin, thuphan rel nak in kanmah le kanmah kan bum aw thei; Bible ca cu kanmai duhdan zawngin kan ngan sal thei ko, a sinan ziang a cang pei? Pathian hmai ih kan din tikah ziangtin kan um ding? Thuthennak tohkham kulhluanli in in kulh dingih tohkham hlei hnih parah Thukham Thar sungih a sim mi Dungthluntu pawl an to ding a si. Cu tikah ziang tin? Thukham Thar ngan mi pawl diknak thu kan rel tikah a ngantu pawl hi Pathian in thla rau lam thuneihnak a pek tinak a si. Bible thu hi a ringhlel zawngin thu kan sut a si ahcun anganter tu Pathian ringhlel in thuthennak tihnungza dil kan si mei. Ziangvek thuneihnak ih sin an thu ngan ding an hril? Zo ih thilti theinak, zo ih hmin le zo ih thuneihnak an ngah, zo in a thlah? Nang teh a thlahtu pa hnenah a tumtahnak hnakih mal deuh lawng a hnenah a kir ti simtu si na duh maw?

[5.4]

Dungthluntu Paul in zumtu pawl hi kan zaten Pathian thu zir ding in duhsak. Paul in Thla rau Thianghlim hruainak in hibang ca pawl hi a rak ngan a si ti kan pom a sile Pathian kaih hruainak kan co ve tinak a si. ( II Tim.2:15). Curuangah, Pathian in Paul hrangih a sim mi cu Bible Cathianghlim hmuahhmuah hi Amai thawkkhumnak ih rak ngan mi, cucu zirhawk nak ah, nun remthatawknak leh nun simawknak hrangah a tha (II Tim.3:16). A sile san a man nawn lo mi hi tulai san zirhawknak ah a tha kei maw ? A si lole remthatsalnak leh a sual mi tuahthatsalnak ah a tlak taktak maw? Pathian hin miphun khat lawng hi a dawr hai ding maw, cui miphun te lawng a dam sungih tlemter a si lole kawhhran thuanthu kan zoh tikah miphun khat te lawng a cawisannak a um maw? Um lamlam lo, Thleidan nei mi a rak si pang lo ahcun. Amai a sim vekin a thlengawk dahlo ruangah khuihmun ah ziang a ret ti pawl a lailang thluh lai ding ( I Kor.11:16, 14:34 ; I Thess.2:14 : Kol.4:16). Ziangkhal a sile, kei ih hmuhdan cun thil fatebik tiang in a ti kimlo mi a um lo. Taksa thisen zungzam pawl hman khi Pathian ih rem a sinak thu pawl, sual mawhnak a neihlo thu pawl a phuanglang thluh lai ding. Mihrek cun mi thabik dinhmun si zohnu ih bel tlaktlailo sisal ding cu a cang theilo an ti men thei. Curuangah keimah khal hi Pathian thu himtei kil thei dingah ka fam kimlo ti cu ka thei aw ve. Mitkharh vek thawn kan zoh tikah sualnak ih kaihhnoihnak fiangfailo mi pawl hi kan hmu theilo nan Pathian cun a zate'n a hmu ih a thei thluh fawn. Hi bang thil pawl an can thluh hnu ah van boruak a tuahnak thu hi teh a kilhim thei ding maw? Kan theihhngilh lo dingah minung lamih cangtheilo mi cu Pathian thaw cun a cangthei thluh (Lk.18:27). Tu ah kannih cu taksa in kan um lai nan thil ziangkim hi Jesuh Khrih cahnak in kanti thei ve a si ( Phil. 4:13 ).

[5.5]

Thukham Thar ngantu pawlin Pathian ih tumtah mi kha anmai fimnak leh cahnak in fiangterrak tum cio hai sehla harsatnak tumpi an ton ka zum. Hi Thukham Thar cabu hi a ngan ih bakah annih in ziangti zawng khalin ti danglam theinak an nei lo. Annih hi Pathian cangan tu dingih a serh thianghlim mi an si. Amah thawn an pehzom aw ih hmailam ih kawhhran pawl hnenah a duh thu an ngan sak. Pathian ih thawtkhum ca hi theh ko tuan ding hi an hna bik a si, ih a huham le kaihhruainak in an ngansuak hai a si. A thuhla zianghman sual umlo tei an ngansuah thei hi mangbangthlak thil a tling. Thukham Thar cabu ngantu pawl hi mikhual vaktawi le cambang men an silo. A hrekkhat le phei cu midang rualpi pawl thawinel aw takih pawl aw mi tla an si hai. An tuah cio mi mangbangza thil pawl hi a sual leh a lem an si maw? Mitcaw pa kha nikhat lawng a mit a damter maw! lole kezengpa kha teh nazi pakhat te sung lawng maw damnak a hmuh? Hibang pawl hi Pathian ih a hleice in a thlansuah mi an si. Thilmak tuahnak khal hi a sual theilo ti a sile, hi an ngansuah mi ca a sual thei lo mi thu hi ziangruangah kan rinhlelh theu? Hi thu hi thilmak dang tuahnak ah teha tlak lo maw si? Mithi kaihthawh ai in teh a harsa cuang maw? A silo le A hrangah, lole hu ham a pek mi pawl hrangah teh thil harsa a um maw?

[5.6]

Jesuh Khrih cu milai hnen laksawng pek mi lakih tumbik a si, mangbangza tuahmi lak ih a maksakbik cu a sual neilo nun, mai duhnak tan ih thihnak le mangbangza huham thawn a khat mi a thawhsalnak a si. Cun a pahnihnak laksawng cu Cathianghlim ngansuak mi hi a siih cumi ihsin hmaisa ih a pek mi laksawng hmuhfiang theinak dingah fimnak le theihnak laksawng a peknak a siih kan thlarau rundamnak thlentu a si. Hi laksawng lole thilmak hi asual theilo mi Pathian theihfiangnak ah le hminsinnak ih a rak peknak a si. Hi thu pawl hi rak sual tariai sehla Setan hin Pathian a rak neh riai ding; Pathian thu hi a caklo ding tinak a siih Pathian thiltum hi a diklozawng ah a rak cang ding. A sinan anih cun sualnak a tuah dahlo! Bible thiang ih sunglam famkimnak cu Pathian ih hminsinak tacik a si. A si, lehcop cabu hrekkhat ahcun a sual pang mei thei, a sinan A thutum leh thuhla cu a thamsiat ban lo. Pathian in a minung pawl hnen ih a pek mi laksawng pathumnak cu a kawhhran hi a si. Cumi cu Pathian Lalram timi a si.

[5.7]

Mihrekkhat pawl hin Thukham thar bu hi Bible a silo an ti, ziangahtile an rak ngan mi hmai sa ah a tlangpi ih hman mi tong a rak um lo. Kan theih dingmi cu suahlannak cabu an rak ngan laiah, thlatinsuak thuthang ca vek a rak si, cucu Moses in a rak kilkhawi; a sungah Pathian hril hnamthlan Israel pawl ih thuanthu ngankhum a si. Cun David ih Sam hla pawl tla hi mahte in Pathian pawlnak leh Pathian mi pawl thu, Thufim bu hi mifim Lal pa ih ruahnak peknak cabu a si.

[5.8]

Tikcu le can thil kan hmanmi pawl hin Bible a dik thu an phuang, tihi thudik a si. Thukham Thar bu in kan tulzual mi thil pawl leh an sidan thu pawl in sim. Hi hi Pathian ih thawkkhum mi tongkam, kan hnenah in sim thluh zo ih A minung pawl hmangin fiangfaizet in ngan luhkhum mi an si, ih Amai remti le duhdan vekciah ih tuah leh phuan an si. Zuk suaitu pa in zuk a suai zik tikah a thinlung ih a ruahman vek hi a si. Rong phunphun hmangin zuk cu a suai hlanah a zuksuai dingmi cu a thinlung ah a zuk thluhzo. Voihnih khat cu a ruahnak vekin a suai zom ih theh ko a suai theu. Jesuh cu hmuhtheihlo Pathian a si (Kol.1:15 )Pathian, kanmah in sersiamtu cun kan sidan ding A fapa ah in suai thluh zo ( Rom. 8:29 ). Cutin A Cathiang sungah kan sidan ding pawl cu famkim in A tong hlanah a hnatuan hi a rak theh thluh zo.

[5.9]

Pathian in a hnatuannak ah zuksuaitu in pianhmang a suai cia vekin minung hi Amai hmui hmel kengin a rak sersiam. Cutikah ralringten thilri a rak hril ih cucu zuksuaitu ih thilri vek a si, A hman ding mi thil a hril hnu ah danglam hleice milai ah A tuah. Mi pakhat le phei cun a uar leh lutuk ih, dingzet ih titiangti tei a rin hnu ah a rak semsuah a ti. A si, tuahtu Pathianhin a tul ding thilri a theifiang ih, ka theh tikah ziangvek in a si ding ti khal a thei thluh, a si lole Pathian thu ih kan rel a sile ziang a tong ding ih ziang a tuah ding ti pawl khal a theicia zo. Hi thu a siamtu pawl parah ziangtluk tiangin a hnawihnih ban ding ti pawl hi A thei thluhko. A sual theilo ih supmi leh phuahcop thu pawl khal a tel lo. Cun amai kaihhruainak ih anngansuah mi hi a famkimtawk ih an theih mi Thu cu dikfel ten an rak ngankhum hai a si. Thukham Thar ngantu pawl hi Pathian ih buarrawt (brush) vek an si, an kut in a kaihruai hai. Cucu ziang thawn a bangaw tile milem suaitu pai hman mi buarrawt thawn an bangaw, annih cu Pathian hrilmi pawl an si. Milem suaitu pai buarrawt bangin bulpak cio inA hril hai ih A tumtah mi hna hi phundang cio in amai remruahnak vekih an theh cio theinak dingah hriamnam tha thinlung a pek cio hai a si.

[5.10]

Hipawl Hi Mi Ziangvek An Si?

Hibang pawl hi mihleice/cungcuang an si hai maw? Thil ropi hleice huham a si lole mi menmen leh thlemnak tuar ringring pawl teh an si maw? Jesuh ih minung pawl hi milailak pawl an si. Mi menmen vekih um ding a duhsak hai pei maw? Kannih vek hi teh in thlem ve pei maw? A si, minung ve mei an si cio ruangah midang vek meimei in silon cahnak huham a pe maw pelo ha? Hi thusuhnak pawl ih a sannak cu an bangaw thluh. A si, silo na ti khal leAnih cu Pathian fapa a si. Pathian fapa neihsun, Amah ihsin pai duhnak kha in sim mi a fa le pawl (Matt. 12:50 ) kan si. Mangbangza thil a tuah na ti khal le kannih khalin cu ai ih ro pi sawn in kan tuah thei ve ( Jn. 14:12) ding thu in sim. Jesuh cu Amai huham le cahnak thawn a pai duhzawng tuah dingah a ra. Thudik a sinan Dungthlun pawl kha cu Pa le Fapaih cahnak huham thawn tirhsuah an si ( Jn.17:6,20:21 ). Jesuh Khrih cu Pa in bulpak ih mi sual pawl runsuaktu dingih a hril mi a si. Dungthluntu pawl lawngte cu Pathian in a Lalram hi lei ih dintu dingah a hrilsuah mi an siih Jesuh Khrih in a ko hai, cumi cu a kawhhran a si ih catuan nunnak hmuh tu dingah a si ( Matt.28:19-20 ).

[5.11]

Thukham Thar ngantu pawl kha Pathian in a kutcak in a hruai hai ih an tulmi pawl hmuah hmuah thehsuak thei dingah danglam deuh in a thuam hai ih hnatuan a pe hai. Ziangtin hacutivek mi a rak hrilsuah, Khrih ih tuahmi vek le Pathian thu ngantu dingah? Ziangtin, zo in hibang tiang si thei dingin a rak ruat? A rak ruattu hi Pathian a siih Thlarau Thianghlim in pakhat cio a zirh hnu ah an ngan khumnak ah an tuldan ih zirin ( Jn.14:25 ) a kaihruai hai a si.Khuahlan lai profet pawl bangin Pathian thu aupi dingah a hril mi an si. Cutikah anmai duh zawng thu men le bulpak thuhla relnak tivek ( II Pit.1:20 )a tel lo. Annih cu Pathian ih pum pe aw mi an si vekin an theih vek leh a fialdan vek cekci lawng (II Pit.3:14-17 ) in an ngan khum a si.

[5.12]

Annih Silo Amai Hna Sawn

Dungthluntu pawl le hi ca ngantu pawl hi anmai hnatuan dingih thlahmi silo in Pathian in a mai hrangih thlahmi an si. Anmai cahnak le huham silon Amai huham sawnih thlahsuah mi an si. Anmai nundan ih kawhhran thansoh ter ding silo in Jesuh Khrih tumtahmi pawl hlensuaktu dingah le tuansuaktu dingah tirhsuah an si. Jesuh Khrih khal rung langin amai duh mi, a si lole a hna tuan dingin an hnenah a rung lo. A pai hna leh duhmi pawl tuansak dingah a si sawn(Jn. 4:34). Cuvek thotho in hi ca ngantu leh Dungthlun pawl khal an mai hnatuan ding silo in anmah a thlahtu pai tumtah mi tuah dingih thlah an si. Jesuh Khrih ih tongkam hi cing ringring aw, Jesun a ti, kei ka pai i thlah bangin, nannih khal ka lo thlah ve a si (Jn.20:21).

[5.13]

Huham Cahnak Danglam

Kan simcia bangin Thukham Thar ih huham cahnak hi a mifel ca ngantu bulpak hnen rori ah pek a rak si. Hi cangantu pawl hi anmai ruahnak in an ngan ti kan rauh ahcun a thu an balter dingih tlunah thlakthleng mi an rak nei ding, cu tikah khuimi bik ha Thlarau ih thawk khum bik tiah hrilbik an rak nei dingih anmah rori hi bible ti borhhlawhtu an si ding, simduh mi cu an ruahnak hlir an rak ngansuak ding. Hiti a sile Thlarau thawkkhumnak cu kanmai lam in nasa takih dil a tul ding, ziangahtile tisa in kan um laiih a siat ol mi kan siih tlunah hrilmi khal kan silo. Annih, cangantu pawl cu hril mi an si.

[5.14]

Ca Thianghlim ngantu pawl hi Pathian hril an si tihi thilmak a silo. Pathian ih thawkkhum mi in cuhnak ih thilmak sawn cu minung hmangin a tuah maw? Annih pawl hi hriak a rak culh ih, Dungthlun pawl leh an rak tuanpi mi pawl khan cak takin hna tampi an rak tuan hai, mi lai ih tlinlo ding tiangin thilti theinak a pe hai, Cutikah mitcaw pawlin khua an hmu, miphar pawl an dam, zeng pawl an damih mithi pawl kha kaihthawh in an rak um. Kannih zumtu pawlin cui thilti theinak cu kan co ve, amah kan thangthat tik khalah a thilti theinak hi a mi nung pawl hmangin tuansuak in a um a si. Cuti si cingin kan ringhlel hrih ding maw? Cun, Pathian hin cutluk in a vilveng hai lo tin kan ruat hrih ding maw, Amah hi zohthim tlak le a sisi? Pathian ih damter mi, khaw hmusal mitcaw, hibang amai ngankhum mi tleunak hin mi hmuahhmuah hnenah a sun eng thluh zo a si. Hi hi teh mak na ti ve maw? Mi pakhat in damnak a ngah tikah amak na tilo maw, himi hi Pathian kutcak a si, cuhnak hmanin a zum tu hmuahhmuah in kumkhaw nunnak an ngah thu an rak ngankhum mi hi teh thilmak ah na ruat maw? Ziangti zawng khalin siseh thutak ihsin ra suak an si lo sawm?

[5.15]

Cathiang ngantu pawl hi Pathian in a pek mi hna theh ko ih tuansuak thei hai dingah a hlei ce in huham a pek hai. Cui profet pawl leh Dungthlun pawl cun ramri kham nei in an tuan hai ih pupa dan, nunphung dan pawl hi tlunlam ih pekmi dan vekin Jesuh Khrih kawhhran hrangah an rak tuansuak. Hi Thukham thar Dungthlun pawl hi a kawh tikah huham dang lam a rak pe ih, cumi cun Khrih ih ram hrangah danglam hleice in an rak tuan hai. Curuangah kawhhran hi bulhram pakhat par lawngah, thumaw le ramri nei in a hram a bun ding a si. Kawhhran cu hram bunnak pakhat, lungto par lawngah a din aw ding a si. Cunah cun mi zate'n PathianThlarau Inn a si mi Khrih le Dungthlungtu pawl parah a hram a bun aw ding ( Efe. 2:20 ). A sinan ziangvekin an si ding ti cu ralrin zet a tul ( I Kor. 3:10-11). Mi zo khalin cui inn cu a taksa a siat thei mi le meisa ih kangral thei mi parah a sak pang a sile cui thilri pawl cu an siat mei dingih nikhat ni ahcun an ralsal thluh leh ding (I Kor. 3:13-15 ).Curuang ah kannih cu a nung mi lungto Thlarau Thianghlim ro khawmtu/ cotu kan si (I Kor.3:16 ), Thlarau ih dinsuah mi, sui le ngun, lung mankhung pawl, zanthing le mirang leilung vekih sakmi inn silo in Pathian Thlarau Inn kan si ( I Kor.3:12 ).

I Piter 2:5 Nannih khal ra uhla a nungmi Lungto bangtukin Thlarau Biak Inn saknak hrangih Pathian ihhman mi lungto si uh, Cutawkah puithiam thianghlim hnatuan nan tuan dingih cohlan tlak mi thlarau raithawinak kha Jesuh Khrih thawngin Pathian hnenah nan pe ding.

[5.16]

Tui ni ah Dungthlun pawlih hna kha ti kauh vivo a si tikah tulai missionary pawl par khalah huham le rongbawl hna khal pek sawng an si, curuangah cui Dungthluntu hmaisa pawl cu tluk ruallo an rak si. Anmah lawng hi Pathian in huham le thuneihnak pe in a kawhhran mi hrangah a thlam in a Cathiang ngantu pawl hnenah hnatuan a rak fial. Cule Khrih hrangah thu an sim ih a thuneihnak an keng. Khrih khal in a pai hrangih rong a bawlnak ih thuneih nak huham a rak neih vek a si. Paul in Thessalonica khaw mi pawl kha daitei um ding thu zir a fial tikah a neih mi thuneihnak kha ruat hnik uh, an pumcawmnak ding khalah an mai thazang ciar hmang dingin dungthlutu pawl ih sim mi kha a forh sal (Thes.4:11). An hnen ah Bawipai duhnak sungih thuawih nun neih a tulzia an theihzo mi pawl kha a theihter bet ( II Thes. 4:2 ). Paul hin pupa dan thlun ding thuzirhnak kha cu hoisan sal dingin a simbet (II Thess.3:6 ). Cang hleili nak sung khalah a zirhnak pawl leh simmi thlunlotu pawl cu pawllo dingin a sim bet. Hivek thu le thupeknak pawl hi hmundang khalah kan hmu thei II Thes.3:4; I Kor. 7: 10; Dung. 16:18 ).

[5.17]

Paul hi Thukham Thar bu thenthum ih thenkhat tluk rak ngansuak tu a si ko nan a hnatuan mi pawl hi Piter leh Johan vekin mi a hlawm ve hai ruangah a thilti theinak pawl hi fiangten Bible ah kan hmu ve thei. Piter cun kawhhran sungih a hnatuan dan pawl kha profet pawl bang khan Pathian dan pek mi vekin a rak tuah thu a unau dang pawl hnenah cing ringringcio dingin a rak sim ( II Pet. 3:2 ). Curuangah zumtu thar Zentel pawl khal Thlarau Thiang hlim laksawng an congah cun baptisma la cio dingin thu a pe hai ( Dung. 10:48 ). Johan khal in cuvek thuneihnak thawn dan thar a ngansuak ve ( I Jn. 2:8 ). Cun, Jeim cakuat cun a dang cakuat pawl aiin thilti theinak cungcuang in a nganaw aw. A sinan hi ca pawl ngan suak dingah minung ih phuahcop le duhnak tivek pawl hi hman awihlo bepbep an si. Hi mi thiang pawl hnen ihsin Pathian cun ziang thu a sim ti leh ziang a simduh ti pawl kha a sim fiang hai.

[5.18]

Annih cu Jesuh khrih leitlun a len laiih rak umtlangtu hmaisabik an si. Annih cun a aw an thei ih, an mit rori in an hmu, thilmak a tuahmi pawl khal an hmuhpi ve. Sersiamtu Jesuh kha an taksa rorin an kutin an tham cio hai. Anmah lawng hi Pathian kut ih kaingahtu an si ( Jn. 17:6 ). Anmah lawng hi mipi hrangih a nunnak leh a bulpak nun hmu ngahtu an si. Anmah lawng hi a kawhhran rak dintu dingih kawhmi an si ( Matt. 16:18 ) ih Thlarau ramri nei in a si ( Efe. 2: 20 ). Annih cu Cathiang ngan tuanvo pek hleice mi an siih cucu Thlarau Thianghlim ih thawkkhumnak leh lam hruainak in a si( Jn. 14:26 ). Anmah lawng hi mang bangza thilti theinak huham a si mi, mina leh misual pawl parih thil titheinak nei hmaisabik tu an si ( II Kor. 10:8; Mk. 13:34; Jn. 10:19-20 ). Anmah lawng hi sual ngaidam ding le ngaidamlo nak ding thuneihnak (liecense) pek an si ( Jn. 20:23 ). Anmah lawng hi Israel pawl parih roreltu dingih thupek an si (Matt. 19:28). Hi Dungthluntu minung hleihnih pawlih hmin lawng hi Jerusalem Thar Innban phunnak ah an hmin ngan an si ( Thup. 21:14 ).

[5.19]

Curuangah kannih khal Jesuh Khrih zumnak ah le theihnak ih thansoh ding kan hngakhlap ih mi famkim si thei vivo dingah Khrih hi tahfung ah kan hmang, kan hmabak mi cu Dung thluntu pawlih rak ngansuah mi thu thlun ding lawng a si. Cuti a sile hi thu zum phah cinginnauhak aa te pawl bangin zumcan zumlo can um in kan um dualdo ding maw si( Efe. 4:13-14 ). Silo e, kannih cun hi Dungthluntu pawl hi ziangtik hmanah kan ringhlel dahlo ding. An ca ngansuah mi pawl hi anmai duhdan in a si ti hi kan ngaithiam lo lawlaw. Kawhhran sungih an rak tel laiih felfainak lam thuron an rak pek theu mi pipu dan, nunau mipatnak le thuanthu umzia an zirhmi pawl hi kan thlahthlam lo ding mi an si ( Kol.4:16 ). Cutin Thlarau daihnak kan pawkhnget ringring le ( Efe. 4:3) thenthek awknak leh darhsarhnak umlo thin lung hmunkhat in kan zom aw ding ( I Kor.1:10 ), Thlarau ih pekmi huham congahtu kan si dingih, a hrilmi pawl thuhla kan pom ngah thei ding a si. Hi mankhung tongkam kan pom thei hlanlo cu zohman pumkhat awknak nun, mai tanghma siallo nun a um theilo a si. Je suh in a huham kha san aw sawng vivo dingah in pe zo a si. Hi Cathiang ngantu pawl kan pom lo a sile anmah umpitu kan pom velo tinak a si. Tu ah Jesuh Khrih in in rinsan ve cio maw?